Xəbər verdiyimiz kimi bu gün şair Zakir Fəxrinin doğum günüdür. Moderator.az-ın əməkdaşı bu münasibətlə şairin yaxın dostları ilə əlaqə saxlayaraq arzularını öyrənib.

Millət vəkili, yazıçı Aqil Abbas Moderator.az-a açıqlamasında Zakir müəllimi təbrik edib və onunla bağlı xatirələrini bölüşüb:

“Zakir Azərbaycanın gözəl klassik şairlərindən biridir. Bu gün Azərbaycanda bir dördlük var, Vaqif Bayatlı, Ramiz Rövşən, Zakir Fəxri və təbii ki, bir də Vaqif Bəhmənli. Bunlar Azərbaycanın klassikinə çevrilməkdədirlər və əslində çevriliblər də. Zakir mənim həm də yaxın qohumum və dostumdur. O, cəsarətli, ürəkli bir oğlandır, böyük istedaddı. Onun özünəməxsus şeir üslubu var. Şeiri oxuyan kimi bilirsən bu Zakirindi. Amma bəzən bir şeiri oxuyursan, amma bilmirsən kimin şeiridi. Zakir çox vətənpərvər bir oğlandır. Birinci Qarabağ savaşında biz bir yerdə səngərləri gəzərdik, ərzaq aparardıq. Onun qardaşı Kamil nişanlı idi, hüquq fakültəsində oxuyurdu. Ağdamda Naxçıvanik deyilən ərazidə bizim uşaqlar mühasirəyə düşmüşdü, kömək etmək mümkün deyildi. Onda Kamil BTR-lə keçib Naxçıvanikə girib 20-dən çox hərbçimizi mühasirədən çıxarmışdı. İkinci dəfə geri qayıdıb digər yoldaşları da mühasirədən çıxaranda ermənilər BTR-i vurmuşdu və Kamilin əl-qolunu bağlayıb yandırmışdılar. Mən onun nəşini qucağımda Ağdama gətirmişəm. Onda Milli Qəhrəman Allahverdi Bağırovun səyi ilə Kamilin nəşini ermənilərdən aldıq. 

 

Zakir həm də həbsxananın ağrı-acısını yaşamış adamdı. Haqsız həbs olunmuş insandı. Onu 10 il azadlıqdan mərhum etmişdilər. Sonra o, Rəsul Rzaya həbsxanadan bir məktub göndərdi və yazmışdı ki, haqsız həbs edilmişəm. Onda R.Rza bütün gücünü qoyub beş ildən sonra Zakiri əfv elətdirdi. Zakir azadlığa çıxandan bir müddət sonra R.Rza rəhmətə getdi. Hətta Anar deyirdi ki, “Rəsulu yaşadan o idi ki, Zakiri həbsxanadan çıxarsın. Onu həbsdən çıxardı və rahat da dünyadan köçdü”. 

Zakir Bakıda həbsdə olarkən daha sonra onu Sibirə göndərdilər və bunun da səbəbi var. Deməli bir gün həbsxanada dustaqlar qiyam edir. Hökumət iki gün çalışsa da, heç kim kazarmaya girmir. Orda deyirlər ki, “burda bir Zakir adında şair yatır, dustaqlar onu çox sevirlər. Onu dəvət edib söhbət edək”. Zakiri dəvət edirlər və o, da dustaqların tələblinin həll olunmasının vacib olduğunu bildirir. Rəhbərlik müəyyən təklifləri qəbul edir. Zakir çıxıb dustaqlara deyir ki, “tələbləriniz həll olunacaq, dağılışaq”. Dustaqlar onun sözünü eşidib dağılırlar. İki gün sonra isə Zakiri Sibirə göndərirlər və deyirlər ki, qiyamı sən təşkil etmisən. Zakir həbsxana həyatı ilə bağlı gözəl də roman yazıb. O, çox sədaqətli, ölümünə gedən dostdur. 

 

Zakirin özü Ağdamdandı, amma sonra köçüb Yevlaxda yaşayıblar. Onun Qarabağla, müharibəylə bağlı yazdığı şeirləri isə bütün dünyanı fırlanır. Yəni Zakir təmiz fərqli bir adamdır. O, həm də gözəl yol-yoldaşıdır. Onunla dünyanın bir çox ölkələrini gəzmişik. Sizə onunla bağlı bir maraqlı əhvalat da danışım. Deməli Zakir o vaxt bir şirkətdə işləyirdi və tez-tez İstanbula gedib-gəlirdi. Demək olar ayın çox gününü İstanbulda olurdu. Bir gün Zakirlə İstanbulda bir mağazaya girdik və ordakılar hamısı onun dostları idi. Birdən mağaza sahibi onu qucaqlayıb öpdü və dedi ki, “Zakir, bir həftədi görünmürsən, haralardaydın?”. Dedi ki, “Bakıya getmişdim”. Guya bu İstanbulda yaşayırdı. (Gülür) Yəni Zakirin çox maceraları var. Bir daha onun doğum gününü təbrik edirəm”.

 

Şair Rəşad Məcid də Zakir müəllimi təbrik edib və onun həyatındakı ağrıları içində çəkdiyini bildirib:

“Zakir müəllimin doğum gününü indi zəng vurub təbrik edəcəm. O bizim uzun illərdir ki, dostumuzdur. Aprelin 3-də isə onu ad günlərində demək olar ki, təbrik etmişik. O, gözəl şairimizdir. Xüsusən onun Qarabağla bağlı şeirləri çox təsirlidir. Zakir fədakar insandı, həssas dostdu. Kimin problemi olarsa, birinci köməyə çatan adamdı. O vaxtlar hətta yadımdadır ki, Aydın Məmmədovla bir yerdə Tərcümə Mərkəzində işləyəndə Zakirə “təcili yardım” deyirdi. Zakirin qardaşı Kamil Qarabağda şəhid olub. Onun ağrısını belə Zakirlə biz dostları bir yerdə yaşamışıq. Daha sonra öz oğlunu qəzada itirdi. İndi biz Qarabağ haqqında yazılan şeirlərlə bağlı kitab hazırlayırıq. Orda Zakirin “Qarabağsız” şeirini də çap edəcəyik. Şeiri oxudum və çox təsirlidir. Təəssüf edirəm ki, Zakir son illər az yazır. Ürəyimdən keçir ki, onun şeirlərini daha çox oxuyaq. Onun vaxtilə həbsxanadan-həbsxanaya yazdığı memuarları 80-ci illərin axırında çox məşhur idi. Mən Zakirə cansağlığı arzulayıram. Arzu edirəm ki, tez-tez görüşmək imkanımız olsun. Vaxtilə onunla Şuşada, İsa bulağında olmuşuq və yenə biz birlikdə o yerlərə bir də gedək”.