Hazırda həbsdə olan “Xural” qəzetinin baş redaktoru Əvəz Zeynallının Mətbuat Şurasına (MŞ) qarşı məhkəmə iddiası əsasında keçirilən sonuncu prosesdə maraqlı polemika yaşandı. Əvəz Zeynallı prosesdə iştirak edən MŞ sədrinin müavini Müşfiq Ələsgərliyə müraciət edərək “Xural” qəzetinin “reket” siyahısında, yoxsa “qara siyahı”da olduğunu soruşdu. Müşfiq Ələsgərlinin “”qara siyahı”da deməsi isə mətbuatda fərqli təqdim olunduğundan bu məsələyə bir daha qayıtmaq zərurəti yaranıb. Moderator.az Müşfiq bəyə müraciət edərək bu anlaşılmazlığı aydınlaşdırmağa çalışıb:

“2008-ci ildən 2010-cu ilədək peşə etika qaydalarını pozan, neqativ əməllərlə məşğul olan, MŞ çıxardığı qərarlara, xəbərdarlıqlara əhəmiyyət verməyənlər birmənalı olaraq “reket” siyahısına salınırdı. “Reket” sözü də bizdə həmişə dırnaqda yazılıb. Yəni bu ifadənin mahiyyəti o idi ki, bu nəşrlər Azərbaycan jurnalistlərinin peşə davranış qaydalarını pozurlar. “Reket” sözünü ona görə dırnaqda yazırdıq ki, reketin Cinayət Məcəlləsində konkret tövsifi var. Ancaq deyim ki, bu cür adlandırılsa belə bu hüququi məsuliyyət yaratmırdı. Bu sadəcə bir ictimai qınaq formasıydı ki, onları neqativ əməllərdən çəkindirsin. Amma sonradan qərara alındı ki, “qara siyahı” tərtib olunsun. Elə məhkəmə prosesində də Əvəz mənə sual verdi ki, bəs MŞ-da “reket” qəzetlərlə bağlı komissiya nə üçün fəaliyyət göstərir? Məsələ ondadır ki, daxil olan şikayətlər arasında təhqir, böhtandan əlavə elə müraciətlər də olur ki, bəzi qəzet redaktorları insanları hədələməklə, şantaj etməklə onlardan pul tələb edirlər. Bax bu cür müraciətlərə “reket” komissiyasında baxılır. Araşdırmanın nəticəsində biz müraciət etmiş şəxsə bildirirk ki, bu artıq hüquq-mühafizə orqanlarının işidir, onlara müraciət edilməlidir.”

“Bəziləri iddia edir ki, “qara siyahı”ya düşdünsə sonradan fəaliyyətində nə qədər dönüş etsən də ordan çıxarılma uzundərə məsələdir, bu iddialar barədə nə deyə bilərsiniz”sualına cavabında

M. Ələsgərli bu iddianı da əsassız hesab etdiyini bildirdi:

“Bu cür əsassız fikirlər ondan qaynaqlanır ki, insanlar MŞ-nın təlimatlarını oxumurlar. Yaxud bəziləri bunu özlərinə sərf edən tərzdə yozaraq ictimai rəyi çaşdırırlar. Təlimatda aydınca qeyd olunur ki, “qara siyahı”ya salındıqdan sonra bir il müddətində fəaliyyətində yaxşılığa doğru dəyişiklik edirsə və xəbərdarlıqdan, ictimai qınaqdan nəticə çıxarırsa, eyni zamanda bir il müddətində fəaliyyətindən MŞ-a şikayət gəlmirsə həmin nəşrin rəhbəri müraciət edir MŞ rəhbərliyinə, komissiya da araşdırıb qərar verərək həmin nəşri qara siyahıdan çıxarır. Əvəz Zeynallı isə deyir ki, üstündən bir il müddət keçib, ona görə də bizim adımızı həmin siyahıdan çıxarmalısınız. Ancaq ona izah olundu ki, təlimatın başqa şərtinə də əməl olunmalıdır. Yəni “qara siyahı”ya düşmüş nəşr rəhbəri MŞ müraciət etməlidir ki, ötən müddətdə fəaliyyətimizdə dönüş etmişik, artıq peşə davranış qaydalarını pozmuruq, bir il müddətində də bizdən şikayət olunmayıb, ona görə də xahiş edirik ki, adımızı həmin siyahıdan çıxarın.”

“Axı bir ildən çoxdur ki, “Xural” fəaliyyətini dayandırıbsa MŞ nə qərarı verməlidir?”

MŞ sədrinin müavini bu məsələdə də cəmiyyətə yanlış məlumat verildiyini bildirir: “Qəzet fəaliyyətini dayandırsa da “xural.com” saytı fəaliyyət göstərir və hər gün yenilənir. Ancaq istənilən halda o müraciət etməlidir ki, fəaliyyətimizdə dönüş etmişik, xəbərdarlıqlardan nəticə çıxarmışıq, bundan sonra peşə davranış qaydalarının pozulmasına yol verməyəcəyik. Əvəz Zeynallı isə israr edir ki, bir il tamam olubsa müraciət etməyə ehtiyac yoxdur, bizim adımızı çıxarmalısınız.”