Yaxın Şərq planı: ABŞ Türkiyə ilə birgə hərəkət edəcək – Açıqlama

Bizi sosial şəbəkələrdən izləyin:

Türkiyə ABŞ-la Yaxın Şərq üçün danışıqlar aparacaq və ortaq planlar hazırlayacaq. Bu barədə Suriyadakı son hadisələrlə bağlı Türkiyə mətbuatında qeyd edilib.

Moderator.az-a danışan siyasi şərhçi Zeynal Əmrəliyev bildirib ki, hazırda ABŞ və Türkiyə arasında Suriya məsələsində müəyyən qədər ziddiyyətlər hökm sürür:

“Bayden administrasiyası bütün mümkün vasitələrlə YPG və PKK-nı silahlandırmaqda davam edir, eyni zamanda hətta onların mühafizəsi üçün tədbirlər görülür. İsrail də bir tərəfdən YPG və PKK-nı silahlandırır, digər tərəfdən isə Suriyanın strateji məntəqələrini ələ keçirərək yeni hökumətə qarşı təzyiq siyasəti kimi istifadə etməyə çalışır və bunu açıq şəkildə nümayiş etdirir. Bu, ümumilikdə Türkiyə, ABŞ və İsrailin bölgədə qarşı - qarşıya gəlməsinə şərait yaradacaq amildir, ancaq Ankara çox ehtiyatlı şəkildə davranır. Faktiki olaraq Suriya ilə bağlı siyasət yürüdən xarici işlər naziri Hakan Fidanın Dəməşq səfəri və verdiyi açıqlamalar göstərir ki, hələ ki, Amerika Birləşmiş Ştatları gözləmə mövqeyindədir”.

Z.Əmrəliyev qeyd edib ki, ABŞ bir aydan sonra hakimiyyətə Donald Trampın gəlməsini gözləyir:

“Çünki Trampın Türkiyə ilə bağlı, xüsusilə Türkiyənin Suriya siyasəti ilə bağlı verdiyi müsbət açıqlamalar var və Türkiyə bu məsələdə ABŞ- la razılığa gələ bilər və Suriyada birlikdə hərəkət edə bilərlər.Təbii ki, bütün bunlar terror qruplaşmalarının və İsrailin bölgədən çıxarılmasına şərait yaradacaq amillərdir və İsrailin ehtiyat etdiyi məsələdə əsasən budur ki, Türkiyə və ABŞ birlikdə hərəkət edəcək. Onsuz da İsrailin Suriyada çox da bir gücü qalmayıb. Hazırda Suriyada əsas güc məhz Türkiyənin əlindədir. Türkiyənin istər MİT rəhbəri İbrahim Kalın, istər də xarici işlər naziri Hakan Fidanın Dəməşq səfəri və yerli hökumətin rəhbərliyi ilə görüşlərdə verdikləri açıqlamalar göstərir ki, Türkiyənin Suriyadakı mövqeyi çox güclüdür. Eyni zamanda Amerika Birləşmiş Ştatlarının da yeni hakimiyyətə başlayacaq hakimiyyətinin verdiyi müsbət açıqlamalar Suriyada bu ölkənin Türkiyə ilə birlikdə hərəkət etmək niyyətinin ifadəsidir”.

Siyasi şərhçinin sözlərinə görə, Tramp hakimiyyəti də YPG və PKK qruplaşmalarından çox tez belə vaz keçə bilməz:

“Hər halda Türkiyə çalışacaq ki, bölgədə bir kürd dövlətçiliyinin əsası qoyulmasın. Çünki bu, Türkiyənin özünə qarşı real təhlükədir və çalışacaq ki, PKK uzantıları olan bu kimi təşkilatlar tərksilah edilsin, Suriyada vahid bir hökumətin əsası qoyulsun. Bütün bunlar gələcəkdə ABŞ və Türkiyə arasında əsas müzakirə mövzusu olacaq. İstənilən halda İsrailin burada edə biləcəyi çox da bir şey yoxdur və İsrailin öz qoşunlarını, hətta tutduğu strateji məntəqələrdən belə geri çəkərək Suriya ərazisini birdəfəlik tərk etmək ehtimalı çox böyükdür”.