“Özümə bir dekor şirkəti yaratmışam, pandemiyada ordan gələn cüzi gəlirlə dolanıram. Bilirsiniz ki, toy və xınayaxdı yoxdur. İndi evlərdə çox az adamla nigah mərasimləri təşkil edirlər. Bir də görürsən ki, ya operator, ya bəy-gəlini fotosessiya etməyə fotoqraf istəyirlər. Sifariş işçilərimə gəlir, bu zaman da şirkətin müəyyən qazancı olur. Şükürlər olsun ki, həyat yoldaşım da çalışır. Halımdan narazı deyiləm, ağlamıram, Allah heç bir bəndəsini ac qoymur” 

 

Bunu Moderator.az-a açıqlamasında tanınmış müğənni Xuraman Şuşalı bildirib. Sənətçi biznesini genişləndirəcəyini də açıqlayıb.

 

“İndiyə qədər ancaq bəzək dekorları ilə məşğul olurduq, bundan sonra həm də mətbəx biznesini də götürmüşəm. Sifarişlər qəbul edəcəyəm, istər aşbazlar, istərsə də ofisiantlar. Ev yiyəsi əziyyət çəkmədən həm yeməklərini hazırlayacağıq, həm də süfrələrini bəzəyəcəyik. İnşallah ki, açıq havada toyların keçirilməsinə icazə verərlər. Vallah çox oldu bu işsizliyimiz. Xına yoxdur, toy yoxdur, onda belə çıxır ki, 6 ildən sonra məktəbə gedən uşaq da olmayacaq. Birazdan ginekoloqların da işi olmayacaq. Toy yoxdursa, dünyaya uşaq gətirən də olmayacaq, nə uşaq geyimləri, nə də qidaları alınmayacaq. Hamı tək nigahla toy etmir ki. Elə valideynlər var, arzusu var ki, dəbdəbəli toy etsinlər, qızını vağzalı ilə evindən çıxarsın. Toyların olmaması gələcəkdə hər kəsə ziyanını vuracaq. İnşallah ki, qara duman başımızın üstündən çəkilər. Zatən xəstəliyə yoluxan yoluxur, yaxşı onda karantinlə hər şey keçib gedirdisə, onda niyə Baloğlan Əşrəfov, başqa cavanlar dünyasını dəyişdi?! Əgər karantinlə bu xəstəlikdən insanları xilas edə biliriksə, niyə ölüm sayı hələ də azalmayıb?” deyə müğənni bildirib.

 

 

Xuraman həmkarlarının xına biznesinə də toxunub.

 

“Allah hamının ruzisini verir, hamıya bərəkətli, halal çörək verir və içində də mənə. Mən əsla onları qısqanmıram. Çünki Allahın rəhmindən xəbərim var. Təki xoş günlər nəsibimiz olsun, qalan hər şey düzələr. Mehribanlıq olan yerdə hər şey düzələcək. Hamısını çox istəyirəm, öz ruziləri ilə çalışan xanımlardır” deyə bildirib.

 

 

“Hicabdan əvvəlki həyatınızda nə üçün darıxırsız?” sualına isə Xuraman Şuşalı belə cavab verib.

 

“Sualı mənə ünvanlayanda fikirləşdim ki, görəsən nə üçün darıxıram?! Heç nə üçün darıxmıram, mənə belə çox rahatdır. Hicaba keçəndən sonra Allah mənə qəribə bir rahatlıq verdi. Bir tək anam üçün darıxıram. Anamın sığalı, sevgisi üçün ölürəm. Anadan başqa qalan hər şey əvəz olunur. Anası olanlar, hər saniyənizin qədrini bilib, qiymətləndirin” deyə Xuraman Şuşalı bildirib.