Keçmiş prezident Donald Trampın dövründə ABŞ dövlət katibi olmuş Mayk Pompeo Rusiya və Çinin təhdidləri fonunda ABŞ-ı nüvə qüvvələrini modernləşdirməyə və strateji silahlar hazırlamağa çağırıb.
Moderator.az bu barədə Amerkanın “The Washington Times” nəşrinə istinadla yazır. Nəşr bildirir ki, Pompeo Moskva ilə Pekin arasında ittifaqın yaradılmasının qarşısının alınmasının vacibliyinə də işarə edib. ABŞ-ın keçmiş dövlət katibi Mayk Pompeo Rusiya və Çin tərəfindən artan nüvə və strateji təhlükəyə qarşı çıxmaq üçün keçmiş prezident Ronald Reyqan dövründə olduğu kimi, yeni Strateji Müdafiə Təşəbbüsünü (SDI) yaratmağa çağırıb.
Hazırkı prezident Co Baydenin administrasiyasının əsas strateji nüvə sənədi olan “Nüvə siyasətinin icmalı”nı hazırlaması fonunda Pompeo bildirib ki, sülhü qorumaq üçün müasir silahlara və imkanlara əsaslanan yeni, daha etibarlı strateji çəkindirici vasitə lazımdır. “Dövrümüzün Strateji Müdafiə Təşəbbüsü - SDI II üçün keçmiş prezident Ronald Reyqanın müdafiəyə dair uzaqgörənliyi ilə örnəklənən nümunəsi vacibdir”, - deyə Pompeo bildirib.
Keçmiş prezident Donald Tramp dövrünün dövlət katibi xəbərdarlıq edib ki, Çin və Rusiya çəkinmə yolunu tutmayacaq, hətta ABŞ bunu etsə belə, bu, yalnız müharibə riskini artıracaq. Onun sözlərinə görə, “çəkinmə heç də zəiflikdən deyil, gücdən yaranır” və Vaşinqton birtərəfli məhdudlaşdırma yolu ilə getsə, məhz zəiflik göstərəcək, çünki bu, artan təhlükələr qarşısında Amerikanın gücünü məhdudlaşdıracaq. "Birtərəfli məhdudlaşdırma zəiflikdən xəbər verə bilər ki, bu da heç bir şeyin onları məhdudlaşdırmadığına inanan ölkələrdən təhlükəli cavab tədbirləri silsiləsinə səbəb ola bilər", - deyə Pompeo bildirib.
Bununla belə, nəşrin icmalla artıq tanış olmuş mənbələrinə görə, Bayden nüvə silahlarına və ABŞ-ın digər strateji qüvvələrinə bir sıra məhdudiyyətlərin qəbul edilməsi imkanını nəzərdən keçirir. Lakin Çin də öz növbəsində yüzlərlə yeni raket, o cümlədən nüvə silahı daşıya bilən hipersəsli uçuş aparatı yaradır. Həmçinin Rusiya da yeni raketlərin və digər strateji silahların, o cümlədən bir çox sahilyanı şəhərləri məhv etməyə qadir olan nüvə torpedası üzərində işləyir.
2024-cü il prezident seçkilərində respublikaçıların milli təhlükəsizlik siyasətinin əsas aspektlərini açıqlayan və partiyanın ehtimal olunan prezidentliyə namizədi Pompeo ABŞ-ın qurudan, dənizdən buraxılan raketlər və bombardmançı təyyarələrdən ibarət nüvə triadını saxlamasının vacib olduğunu söyləyib. “The Washington Times” xatırladır ki, Bayden administrasiyasının rəsmiləri əvvəllər ABŞ-ın yerüstü nüvə raketlərindən imtina edə biləcəyini iddia edirdilər.
Bundan əlavə, Vaşinqton həmçinin iddia edib ki, ABŞ-ın nüvə silahından ilk istifadə etməyəcəyinə dair öhdəlik götürə biləcəyi şərtləri nəzərdən keçirməyə hazırdır. Bununla belə, Pompeonun sözlərinə görə, bu, kimyəvi və ya bioloji silahlardan istifadə etməklə qeyri-nüvə hücumları riskini artıracaq.
Siyasətçi həmçinin nüvə qüvvələrinin genişmiqyaslı modernləşdirilməsi üzrə mövcud planları dayandırmamağa çağırıb. Pompeo bildirib ki, Çin və Rusiyadan gələn təhdidlərin qarşısını almaq üçün ABŞ təcili olaraq ən azı 150 yeni “B-21 Raider” bombardmançı təyyarəsi, ən azı 12 “Columbia” tipli sualtı qayıq, 400 və ya daha çox yeni quru raketi yaratmalıdır. Bundan əlavə, o, yeni B-21-lər yerləşdirilənə qədər köhnəlmiş B-52 bombardmançılarından buraxıla bilən yeni uzun mənzilli qanadlı raketin yaradılmasına və istifadəsinə çağırıb.
Yeni Strateji Müdafiə Təşəbbüsünün bir hissəsi olaraq keçmiş dövlət katibi həm də yeni müdafiə sistemlərinə, o cümlədən kosmik müdafiə sistemlərini yaratmağa çağırıb. Pompeo əlavə edib ki, Çin və Rusiya tərəfindən Amerika peyklərinə dağıdıcı raket hücumu təhlükəsi fonunda “ABŞ-ın tez bir zamanda peyk əleyhinə sistemlər yerləşdirməkdən başqa seçimi yoxdur”.
Digər məsələlərlə yanaşı, onun fikrincə, ABŞ Çin və Rusiya arasında mümkün alyansın yaranmasına mane olmalıdır. Bunu Reyqan dövrünün rus xalqına yaxınlaşma modelinə riayət etməklə və Pompeonun dediyi kimi, “qeyri-sabitlik və təxribat yolu ilə hakimiyyətə can atan Kremldəki kleptokratik elementləri” hakimiyyətdən uzaqlaşdırmağa məcbur etməklə həyata keçirmək olar. Siyasətçi xatırladır ki, Reyqan dövründəki Strateji Müdafiə Təşəbbüsü Sovet İttifaqının iflasına kömək edib və 1991-ci ildə rejimin süqutuna gətirib çıxarıb.
Bundan əlavə, Pompeo qlobal hegemonluğa və yeni soyuq müharibədə qələbəyə can atan Çin kommunist hökumətinə qarşı ideoloji səylər göstərməyə çağırıb. “The Washington Times” qəzeti yazır ki, keçmiş dövlət katibi ABŞ-ın Hind-Sakit okean regionunda aparıcı güc kimi sıxışdırılmasına can atan Səma İmperiyasının mövqeyini qəbuledilməz hesab edir. "Bir vaxtlar dəyişməz hesab edilən Amerikanın mövqeyi Hind-Sakit okean regionunda sülhün əsasıdır və onun qorunması isə vacibdir", - deyə Pompeo qeyd edib.
Miraslan
