Yeni Klinikanın rəhbəri Pərviz Abbasovun korrupsiya cinayətlərində ittiham olunaraq həbs edilməsindən bir neçə gün keçməsinə baxmayaraq media və tibb ictimaiyyəti bu bareədə təəssüflə danışır. Onun xaricdə təhsil almış istedadlı və böyük gələcəyi olan bir alim kimi özünü təsdiq etməsinə baxmayaraq qısa zamanda özünü biabır etməsi çək-çevir mövzusuna çevrilib.

 

Yeri gəlmişkən, səhiyyə naziri Oqtay Şirəliyev də yola salındı və nazirliyin şöbə müdiri Teymur Musayev onun yerinə təyin edildi. Təqdimat mərasimində çıxış edən Teymur Musayev ona göstərilən yüksək etimada görə Prezident İlham Əliyevə və Birinci vitse-prezident Mehriban Əliyevaya minnətdarlığını bildirib. Teymur Musayev qeyd edib ki, Azərbaycan Prezidentinin təşəbbüsü ilə bu gün bütün sahələrdə gənc, peşəkar, vətənsevər kadrlara etimad göstərilir. Fəaliyyəti zamanı dövlətçilik, yüksək peşəkarlıq, şəffaflıq və ədalət prinsiplərini daim özünə rəhbər tutacaq.

 

Doğrudanmı ölkədə bütün sahələrdə gənc, peşəkar, vətənsevər kadrlara etimad göstərilir? Tutaq ki, səhiyyə sahəsində Oqtay Şirəliyevi əvəz edəcək nüfuzlu gənc ağ xalatlılarımız çoxdurmu? 

 

Moderator.az-ın əməkdaşı xaricdə təhsil alıb, işləyən həkimlərimizlə bağlı deputatlar arasında sorğu keçirib.

 

Millət vəkili, yazıçı Aqil Abbas sualımızı cavablandırarkən bildirdi ki, həkimlərin adını bilmir, amma qardaş Türkiyədə bu cür gənclərimizlə görüşüb:

 

“Adlarını bilmirəm, amma tanıyıram. Məsələn, bir dəfə Ankarada gənc həkimlərimizlə görüşdüm. Ürək əməliyyatı edirdilər. Professor dedi ki, bunlar gözümün qabağında əməliyyat edirlər. Hətta onlara təklif etdim ki, gəlin Azərbaycanda işləyin. Dedilər ki, gəlib Azərbaycanda 250 manata işləyəcəyik? Burda 4-5 min pul alırıq”. 

 

Deputat Fəzail Ağamalı isə bildirdi ki, bu cür həkimlərimizi ölkəmizə dəvət edə bilərik, amma onlara xaricdə alacaqları maaşı verə biləcəyikmi?

 

“Tanıdıqlarım yoxdur. Qaldı ki, gənc həkimlərimizi deyək ki, xaricdən ölkəmizə dəvət etdik. Bəs görən onlar orda aldıqları maaşı bizdə ala biləcəklərmi? Hər kəs sərbəstdir. Kim harda təhsil alır, işləyirsə bu onun müstəqil fikridir. Çox istəyərdim ki, o həkimlərimiz gəlib Azərbaycanda imkanlarını, iş qabiliyyətini vətənə və vətən övladlarına sərf etsin. Bu bizim istək və arzumuzdur. Ancaq hər kəsin özü seçimi var və biz buna da hörmətlə yanaşmalıyıq”.

 

Deputat Zahid Oruc isə tanıdığı həkimlərimizin adını çəkdi. Bununla yanaşı, bu cür həkimlərimizin Azərbaycana gəlməsini və burda klinika açmaq üçün onlara dövlətin kömək etməsinin vacibliyini vurğuladı:

 

“Əlbəttə, həkim Nuran Abdullayevi tanıyıram, şəxsən görüşmüşük, ölkəmizə gəlib. Onun ötən il ərzində informasiya məkanında çox aktiv bir fəaliyyət apardığı, həm media nümayəndələrinin suallarına cavab verməsi, həmçinin dövlətimiz tərəfindən verilən qərarların dəyərləndirilməsini aparır, həm də beynəlxalq təcrübəylə müqayisəli təhlillərini verir. Paralel şəkildə onların yanaşmalarını irəli sürür və bu da müsbətdir ki, cəmiyyətimiz üçün çox faydalıdır. O cümlədən Məmməd Məmmədov adlı həkimimiz çox tanınmış həkimlərimizdən biridir. O, da özünəməxsus bir yol keçib. Azərbaycanı hər bir halda kənarda təmsil edən insanlarımız sırasındadır. O cümlədən qardaş ölkədə həkimlərimiz var və onlardan Kamran həkim beyin cərahiyyəsi sahəsində dünyada qəbul olunan həkimlərdən biridir. Bu cür həkimlərimizin adını çox çəkmək olar. Düşünürəm ki, mühüm məsələlərdən biri ondan ibarətdir ki, bu siyasət dövlət tərəfindən tətbiq olunub. Faktiki olaraq ürək cərahiyyəsi sahəsində Rəşad Mahmudov, Kamran Musayev və daha bir neçə tanınmış simalar hörmətli Mehriban xanım Əliyevanın rəhbərlik etdiyi Heydər Əliyev Fondu tərəfindən bilavasitə həyata keçirilmişdir. Qeyd etdiyimiz həkimlər təkcə Azərbaycanda deyil, regionda tanınan isimlərdir. Onlar bu sahədə yalnız Azərbaycan vətəndaşlarını problemini həll etməyiblər, eləcə də onlara xaricdən də müraciətlər bu gün də davam edir. Digər tərəfdən də dünyada səhiyyə turizmi deyilən bir deyim var və bu da ondan ibarətdir ki, dünyada insanlar öz sağlığının qorunması üçün müxtəlif ölkələrə səfərlər edirlər. Əgər biz ürək cərahiyyəsi  problemini daxildə çözürüksə, bu adlarını çəkdiyim həkimlərimizin hesabına baş verir. 

 

Heç şübhəsiz ki, dövlətimiz tərəfindən ölkə daxilində olan, amma hər hansı şəraitdə öndə tutulmayan və səhiyyə adminstrasiyasını təşkil edə biləcək simalar mövcuddur. Burda da bir məsələni düzgün başa düşmək lazımdır. Elələri var ki, çox peşəkar həkimdirlər, amma idarəetmə sistemi çox fərqlidir.  Tanınmış həkimlərimizin ölkəmizə dəvəti dövlət tərəfindən həyata keçirilə bilər. Bununla bərabər biz onun fərqindəyik ki, rəsmi olaraq bunu demək istəyirəm ki, insanlar arasında sorğu keçirəndə onlar həkimlərimizin fədakarlığını, 44 günlük müharibədəki zəhmətini uğurlu qeyd etsələr də, səhiyyə administrasiyasından bir o qədər narazlıqlarını bildirirlər. Bu çox mühüm bir hadisədir. Xaricdə təhsil alıb, orda çalışan və yüksək əmək haqqı alan şəxslərin Azərbaycana gəlməsini elə qurmaq mümkündür ki, onlar burda müasir klinikalar yaratsınlar. Onları uğrulu iqtisadi şərtlərlə təmin etmək lazımdır. Bundan ötrü vergi, rüsumlar və digər məsələlərdə onlara yardımçı olmaq lazımdır. Bəlkə bir neçə il həmin klinikaların hamısını müxtəlif növ öhdəliklərdən azad etmək olar. Şəxsən mənə müraciət edən insanların sırasında belələri var. Onlar qeyd edirlər ki, özəl sektor burda aparıcı rol oynaya bilər, amma onların istəkləri həyata keçirilməlidir. Daha sonra bu şəraitdə qeyd etdiyimiz sahədə uğurlu layihələrini gerçəkləşdirə bilərlər və yüz minlərlə insanlarımızın sağlıq problemlərini yoluna qoya bilərlər”.