“Sizin belə bədbəxt, acınacaqlı durumda yaşamağınızın günahkarı öncə öz “lider”, “qəhrəman” hesab etdiyiniz keçmiş hakimiyyət sahibləri və komandirlər, Köçəryanlar, Sərkisyanlar, Ohanyanlar, Babayanlardır...”  

 

Tanınmış Qarabağ qazisi, peşəkar döyüşçü, keçmiş tabor komandiri, ehtiyatda olan polkovnik Azay Kərimov Qarabağ və Ermənistandakı ermənilərə müraciət ünvanlayıb.

 

Moderator.az müraciəti nəzərinizə çatdırır:

 

 

“Özləri xarici güclərin, o cümlədən Moskvanın təhriki ilə Qarabağda qondarma “münaqişə”ni başladanadək böyük hörmət qoyduğumuz, yurdumuzda, evimizdə qonaq etdiyimiz, qayğı göstərdiyimiz erməni toplumuna müraciət edirəm. Mən, 1-ci Qarabağ savaşının iştirakçısı, polkovnik Azay Kərimov Şuşa rayonunun Malıbəyli kəndində anadan olmuşam və uşaqlıq, gənclik illərimi o dədə-baba yurdumda yaşamışam. Qarabağdakı yaşlı ermənilərdən məni tanıyan da olar. O dövrdə bizim kəndlə Xankəndi arasında cəmi 2 km məsafə vardı. Son 30 illik işğal dövründə isə Malıbəyli ilə Xankəndi demək olar ki, birləşib və artıq dəqiq məlumatımıza görə, kəndimizin ərazisində 44 günlük müharibədən sonra Hadrut və digər ərazilərdən köçmüş ermənilər üçün yeni binalar tikilir... 

 

1988-ci ilədək mən və valideynlərim, doğmalarım, eləcə də həmkəndlilərim ermənilərlə necə mehriban, dinc yaşamağımızın şahidi olmuşuq. Yaxşı bir kəlam  var ki, pis millət yoxdur – pis adamlar var... Erməni toplumunun, xüsusən də Qarabağda – Azərbaycan torpaqlarında yaşamış ermənilərin bugünkü duruma düşməsinin əsas səbəbkarları 1987-1988-ci illərdən bəri Kremlin, erməni lobbisinin göstərişi ilə bu “münaqişə”ni körükləyib qızışdırmış Zori Balayan, Serjik Sərkisyan, Robert Köçəryan, Vitali Balasanyan, Bako Saakyan, Samvel Babayan və başqalarıdır. Bu gün də Araik Arutyunyan, David Babayan və digərləri erməni toplumunun zehninin daha da zəhərlənməsinə yönəlmiş  həmin oyun və təxribatları davam etdirirlər. Bunu edənlər özləri on illərlə Azərbaycanın işğal və talan edilmiş ərazilərinin, eləcə də Ermənistanın sərvətləri hesabına hədsiz varlandılar, Qarabağda, Ermənistanda və xaricdə böyük mal-mülk, çirkli biznes sahibi oldular. Yəni qəti bilin ki, Sərkisyanlar, Köçəryanlar, Saakyanlar, Manuçaryanlar, Balasanyanlar, Arutyunyanlar, Babayanlar və s. qətiyyən erməni toplumunu düşünmürlər. Onları yalnız Rusiya, Avropa və ABŞ-dakı  ağalarının əmr və göstərişlərini layiqincə yerinə yetirib varlanmaqlarını davam etdirmək maraqlandırır.... 

 

1-ci Qarabağ savaşından bəri erməni mediası, erməni siyasətbazları guya Azərbaycan hərbçilərinin dinc erməniləri günahsız yerə qətlə yetirməsi haqda hədyanlar yazır. Dünən də guya Xocavənddə bir dinc(?) erməninin qətlə yetirilməsi haqda xəbər yayıldı... Bilin ki, belə təxrubatları da təşkil edənlər ermənilərlə azərbaycanlılar arasında sülh yaranmasını istəməyən xarici güclər, çox güman ki, əsasən Rusiyanın imperialist hakimiyyəti və onların əlində alət olan Köçəryan, Sərkisyan, Babayanlar, eləcə də on illərlə  bu saxta “Artsax”, “Böyük Ermənistan” xəyallarına uymuş xəstə təxəyyüllü gənc və yaşlı ermənilərdir...

 

Yaxşı yadımdadır, 1990-cı ildən bəri Qarabağda əsasən xaricdən gəlmiş  yaraqlılar döyüşürdü. Həmin birləşmələrə erməni ekstremistləri öz aralarında “Qarabağ xilasetmə dəstəsi” deyirdilər. Özü də onlar birinci eşelonda yox, ikinci eşelonda, yəni Azərbaycana qarşı qurulmuş müdafiə və hücum xəttindəki ikinci cərgədə yerləşirdilər. Həmin dəstələrin əsas vəzifəsi Sərkisyanın, Köçəryanın, Samvel Babayanın, Seyran Ohanyanın və s. əmri ilə  1-ci eşelondan qaçan erməni gənclərini gülləmək idi. Və onlar bu işi çəkinmədən icra edirdilər. Bundan əlavə, Azərbaycana qarşı döyüşmək istəməyən ermənilərin evlərinə  gecələr hücum edərək onlara işgəncələr verir, gözlərinin qarşısında qız-gəlinlərini zorlayır, var-yoxlarını əllərindən alırdılar. Buna görə də Qarabağdakı bütün, ən yoxsul ermənilər də bu dırnaqarası “azadlıq mübarizəsi”nə qoşulmağa məcbur olurdular... Bir sözlə, Qarabağ savaşları boyu  hərbçi və mülki erməniləri Azərbaycan hərbçilərindən daha çox adlarını çəkdiyim qaniçən, guya qatı millətçi kimi millətini sevən erməni liderləri qətlə yetirib və yetirdib.  Sərkisyanların, Köçəryanların, Balayanların  erməni camaatını  azərbaycanlılara qatı düşmən etmək üçün daha hansı oyunlardan çıxdığını Qarabağ və Ermənistandakı vicdanlı araşdırmaçılar, ziyalılar, blogerlər daha yaxşı bilir... Sonda onlar Ermənistandan azərbaycanlıların qovulmasına nail olmaqla və  Azərbaycan torpaqlarını işğal etdirməklə yalnız 1 milyondan çox azərbaycanlını deyil, həm Qarabağ, həm Bakı, Sumqayıt, Gəncə, həm də Ermənistandakı erməniləri hədsiz acınacaqlı duruma saldı. Hazırda Azərbaycandakı qaçqın və köçkün soydaşlarımızın böyük əksəriyyəti öz rahat həyatlarını qura biliblər. Ancaq özünüz yaxşı bilirsiz ki, əvvəllər Qarabağ, Bakı, Sumqayıt və s. bölgə və şəhərlərimizdə  biz azərbaycanlılardan da yaxşı, rahat, varlı yaşayan ermənilərin çoxu hələ də Ermənistanda və Qarabağın digər ərazilərindəki yarımuçuq tikililərdə, yataqxanalarda evsiz-eşiksiz, işsiz-gücsüz, ac-yalavac durumdadırlar. Və bir daha təkrar edirəm, bunun günahkarı öncə öz “lider”, “qəhrəman” hesab etdiyiniz keçmiş hakimiyyət sahibləri və komandirlərdir....  

 

Hesab edirəm ki,  əslində erməni toplumu bütövlükdə öz gələcəyini düşünmür və böyük ağılsızlıq edir ki, hələ də bir qismi Köçəryanların, Sərkisyanların, Ohanyanların, Babayanların başına yığışıb yenidən Qarabağı işğal edib gələcəkdə “xoşbəxt”  olmaq istəyirlər. Belələri bununla öz gələcək daha da, bugünkündən də bədbəxt günlərinin bünövrəsini qoyurlar.  Halbuki, ermənilərin ağlı olsa, özlərinin övladlarının gələcəyini düçünsələr,   Köçəryanları, Sərkisyanları, Ohanyanları və onlara dəstək verən digər “lider”ləri tutub  linç edər, tikə-tikə doğrayar, ən azı, Ermənistandan birdəfəlik qovarlar. Və bundan sonra Azərbaycan və Türkiyə ilə sülh bağlayıb əsl dinc, rahat, xoşbəxt həyat sürərlər.  Əslində Paşinyan hakimiyyəti də gecikir. Bu hakimiyyət Moskvanın, Putinin təzyiqlərinə baxmayaraq Köçəryanları, Sərkisyanları, Ohanyanları ən azı Ermənistana qarşı törətdikləri cinayətlərə görə dərhal həbsə atmalıdır. İnanın ki, əsas belə kukla “lider”ləriniz zərərsizləşdirilsə, sizə bizlərlə qonşuluqda dinc, xoşbəxt həyat qurmağa heç bir xarici güc mane ola bilməyəcək... Amma ya hakimiyyətiniz, ya da özünüz bunları  etməyəcəksinizsə, yenidən revanşist duyğulara qapanıb Azərbaycanla, Türkiyə ilə qarşıdurmaya gedəcəksinizsə, 44 günlük savaşdakından da qat-qat ağır zərbələr alacaqsınız...

 

Dediyim kimi, mən Şuşanın Malıbəyli kəndindənəm. Və tezliklə həmişə getdiyimiz yolla Ağdamdan, Əsgərandan, Xocalıdan keçib öz doğma kəndimə gəlib qalan ömrümü doğma dədə-baba yurdumda yaşamaq əzmindəyəm. Odur ki, nə qədər gec deyil, yaxşı olar ki, siz ermənilər bütün qanunsuz məskunlaşdığınız, yəni sovet dövründən yaşamadığınız şəhər və kəndləri, o cümlədən Malıbəylini  tərk edəsiniz. Əks halda biz azərbaycanlılar, o cümlədən mən həmin yerlərdən sizlərin zorla çıxarılmasına nail olacağıq. Yəni elə bilməyin ki, bundan sonra da bizim halal yurdlarımızda rahat yaşayacaqsınız. Hər tərəfiniz Azərbaycan ordusudur. Lazım gəlsə, Türkiyədən də qardaşlarımız köməyə gələcək və sizin bütün qanunsuz silahlı dəstələrinizi tezliklə ya tərksilah, ya da məhv edəcəyik və azərbaycanlılar qayıdıb əvvəlki kimi, Xankəndində, Malıbəylidə, Şuşanın digər kəndlərində, Kərkicahanda, Xocalıda, Laçında və s. yaşayacaq... 

 

Xatırladım ki, Malıbəylidə biri kəndin mərkəzində, digəri isə yuxarı hissədə olmaqla  XVIII əsrə aid iki məscid olub. Onların minarələri olmasa da, daxili quruluşları Şuşadakı Gövhərağa məscidlərinin memarlığına uyğun idi. Malıbəylidə də eynilə Şuşadakı “Məşədi İbad” hamamı kimi qədim hamam mövcud olub... Bütün kəndimizi, bütün tarixi, dini abidələrimizi sizin uyduğunuz “lider”ləriniz dağıtdırıb...  Bilin ki, bunu edənləri heç cür bağışlamayacağıq... Odur ki, Malıbəylidə-filanda zəhmət çəkib bina tikib Hadrutdan gələnləri də oralara yığmayın. Biz öz vətənlərimizə gəlirik, vaxt varkən yurdlarımızı tərk edin. Yoxsa bunun bədəlini özünüz də, övladlarınız da ödəməli olacaq... 

 

Erməni camaatı, yaxşısı budur, öz şərəfsiz, vicdansız, sizləri sevməyən faşist xislətli dırnaqarası “lider” və komandirlərinizi deyil,  Azərbaycan dövlətini, xalqını, Qarabağın əsl sakinlərini – bizləri dinləyin. Allah da  bilir ki, biz sizə ədalətli yol təklif edirik”.

 

Təqdim etdi:  Sultan Laçın