“Zəngilanımızın işğaldan azad edilməsi günü münasibətilə ora çəkilişə getmişdik. Dəvət alan kimi buna razılıq verdim, amma baxmayaraq ki, işlərim çox idi. Amma yenə də bu arzudan keçə bilməzdim. Çünki illərdir ki, həsrətindəydim yoldaşımın, qayınanamın, balalarımın ata babasının yurdu olan Zəngilanı gördüm”

 

Bunu Moderator.az-a açıqlamasında Xalq artisti Gülyanaq Məmmədova deyib. G.Məmmədova Zəngilan səfəri haqda təəssüratlarını bizimlə bölüşüb: 

 

“Arzum idi ki, illərdir Zəngilana gedim. Evdə də uşaqlarla Zəngilana gedəcəyimiz günü səbirsizliklə gözləyirdik. Bu gün artıq o arzumuza çatdıq və buna görə də fürsət düşən kimi Zəngilana getməyə razılıq verdik. Baxmayaraq ki, ilk dəfədir ki, mən Zəngilanı görürdüm. Çox kövrəldim, ürəyim ağrıdı. Evlər dağılıb, hər yeri kol-kos basıb. Çünki həyat yoldaşım və ailəsi mənə Zəngilanı o qədər gözəl təqdim etmişdilər ki. Amma gedib gördüm ki, Zəngilanın havasından başqa düşmənlərimiz hər şeyi xarabalığa çeviriblər. Buna görə çox ürəyim ağrıdı. Yəni çəkiliş üçün bir normal yer tapa bilmirdik göstərək ki, bura Zəngilandır. Təsəvvür edin orda nə çətinliklər çəkdik.

 

Buna baxmayaraq yenə istədiyim yerləri görmək mənim üçün xoş oldu. Yolumuz Horadizə qədər rahat oldu, amma ondan sonra Zəngilana qədər yollar narahat idi. Amma hal-hazırda sürətlə quruculuq işləri də dövlətimiz tərəfindən aparılır. Rayonlarımızın hamısı öz əvvəlki gözəlliyinə qovuşacaq. Orda yaşayan insanların çox gözəl xatirələri olub və o yerlər onlar üçün çox doğma, əzizdir. Amma mənə orda yaşamaya-yaşamaya o mənzərələri görmək çox çətin oldu. Nəylə qarşılacağımızı bilirdik və buna da hazır idik. Amma sevincliyik ki, torpaqlarımız işğaldan azad edilib. 

 

Zəngilandan birbaşa qayınanamla telefon bağlantısı yaradıb görüntülü danışdıq. Mincivandan Zəngilana qədər onların qurbanları var və onu da inşallah yerinə yetirəcəyik. Mənim üçün o yerlərə getmək, görmək çox xoş oldu. Sonda onu deyə bilərəm ki, şükürlər olsun ki, Qarabağımıza qovuşmuşuq. Mən Zəngilanda üç böyük nəslin gəliniyəm”.