Ölkədə Milli Məclis seçkiləri yaxınlaşdıqca bu məclisdə millət vəkili kimi iştirak etmək hər bir ziyalının arzusudur. Demək olar ki, bu həftə deputatlığa namizədlərin qeydə alınması başa çatacaqdır. Lakin indiyə kimi Respublikamızda vətəndaşlar arasında seçki ab-havası yaşamır. Bunu sübut etmək üçün çox uzağa getmək lazım deyil. Çıx küçəyə bir neçə vətəndaş arasında sorğu apar, sorğunuza cavab olaraq bildirəcəklər ki, bu seçki barədə heç bir məlumatımız yoxdur. Hətta keçən seçki zamanı hansı namizədə səs vermisiniz və kimi millət vəkili seçmisiniz əksəriyyəti buna dəqiq cavab verməyəcək. Bəs vətəndaşlarımızın seçkilərə bu qədər laqeyd yanaşması nədən irəli gəlir? Başqa dövlətlərin vətəndaşlarına nisbətən bizim vətəndaşlarımızı seçki fəallığı çox aşağı səviyyədədir. Qonşu və qardaş Türkiyə Respublikasında keçirilən parlament seçkiləri çox yüksək səviyyədə və dəqiqliklə aparılır. Burada heç kim vətəndaşın səsini oğurlaya bilməz və öz xeyirinə hesablada bilməz. Çünki, seçkilər tam demokratik şəraitdə aparılır. Demək olar ki, bizdə də seçki təlimatına uyğun olaraq, seçkinin aparılması üçün bütün maddi texniki bazalar yaradılır, şəffaf qutulardan istifadə edilir, seçicilərə vaxtında çağırış vərəqəsi təqdim edilir. Bir sözlə, seçki nizamnaməsinə uyğun bütün tədbirlər görülür. Bütün bunlara baxmayaraq, yenə də seçici aktivliyi artmır. Çox maraqlıdır ki, əgər vətəndaş öz seçdiyi millət vəkilini tanımırsa bəs onlara kim səs verib və parlamentə nə cür düşüb? Hazırki seçkilərlə əlaqədar bir həmkarımla söhbət edirdim. Söhbət əsasında məlum oldu ki, bu həmkarım da öz namizədliyini irəli sürür və imza toplamaq kompaniyasına başlayıb. Mən ona bildirdim ki, sənin bu sahədə həm təcrübən yox, həm də maddi imkanın. Üstəlik həmin dairədə yaşayan vətəndaşlar tərəfindən tanınmırsan. Bilə-bilə ki, seçilməyəcəksən vaxtını boş yerə niyə keçirirsən. O, isə mənə bildirdi ki, məqsədim heç də deputat seçilmək deyil. Sadəcə seçkinin necə aparıldığını və saxtalaşdırdığını öyrənməkdir.

Milli Məclisin iclaslarında parlament müxbiri kimi fəaliyyət göstərdiyim zaman millət vəkilləri əksəriyyətinin çıxışını, hər hansı qanunu qəbul etdikdə həmin qanuna düzəliş etmək təkliflərini görmədim. Bu millət vəkilləri parlamentdə susan deputatlar qrupuna aid edilmişdir. Onların bir devizi vardır: “Danışmaq gümüşdürsə, susmaq qızıldır”. Amma cənab millət vəkilləri bu atalar sözü Milli Məclisə aid deyil. Burada danışmaq, təklif vermək, problemləri qabartmaq lazımdır. Bildiyiniz kimi Avropa İttifaqı dövlətləri daimi Azərbaycanda keçirilən seçkilərə hər hansı formada öz iradlarını bildirmişdilər. Hətta builki seçkilərdə müşahidəçi ki kimi belə iştirak etməyəcəklərini bildirmişlər. Düşünürəm ki, seçki komissiyasının sədri cənab Məzahir Pənahov onların acığına elə bir seçki keçirəcək ki, dünyada bizim bu seçkinin analoqu olmayacaq və avropalıları belə düşünməyə peşman edəcək.