Say və miqdarı artdıqca çəki və sanbal baxımından ciddi itkilərə məruz qalan Azərbaycan KİV-nin özünəməxsus eybəcərliklərindən biri mediada yer alan informasiyaların bəzən oxuculara ən riyakar və xoşagəlməz üsullarla təqdim edilməsi ilə bağlıdır. Bu üsullardan ən maraqlısı ölkə mediasında işıqlandırılan materialların sosial şəbəkələrdə gözəl qız şəkilləri ilə bəzədilən saxta profillər vasitəsi ilə təqdim olunmasıdır.
Nə qədər qəribə olsa da,
ölkədəki əksər saytlar daha oxunaqlı olmaq üçün öz yazılarını sosial şəbəkələrdə
gözəl qız şəkilləri ilə bəzədilmiş saxta profillər vasitəsi ilə yayır ki, bu da
səbəbsiz deyil. Belə ki, çağdaş cəmiyyətin zövq və ruhuna yaxşı bələd olan
saytlara əksər oxucuların profil sahibinə onun təqdim etdiyi xəbərdən daha çox
maraq göstərdiyi bəllidir. Hətta heç bir ciddi informasiya yükünə malik olmayan
xəbərlərin belə sadəcə qadın niki ilə paylaşıldığı üçün sürətlə “like” edilməsi,
şərh bölümündə geninə-boluna müzakirə olunması da bu reallığın göstəricisidir.
Bəli, bu günün oxucusu
üçün önəmli olan xəbərin özü, onun mahiyyəti deyil, bu xəbərin kimin təqdimatında
ona çatdırılmasıdır. Çağdaş Azərbaycan oxucusunun hansısa informasiyanı oxuması
üçün ona bu xəbəri təqdim edən şəxsin ekrandan boylanan parıltılı çöhrəsi, şəhvətli
baxışları, yarıçılpaq bədəni olamlıdır. Onun sifət cizgiləri dil açıb
danışmalı, ekrandan ona baxan hər kəsi həyacanlandırmalı, riqqətə gətirməlidir.
Onun baxışlarından elə bir coşğu, elə bir ehtiras boylanmalıdır ki, bu baxışlar
ən möhkəm etiqad sahibini belə yoldan çıxartmalıdır. Ekran qarşısında dayanan hətta
İsa peyğəmbərin özü olsa belə, xəbər təqdimatçısının şəklinə, onun iblisanə gözəlliyinə
etinadsız qalmamalıdır.
Xəbər paylaşımı məqsədi
ilə yaradılan saxta qadın profillərində dostluqların rekord həddə olması, bu
profillərə ünvanlanan dostluq mesajlarının saysız-hesabsızlığı da müasir Azərbaycan
oxucusunun mahiyyətindən xəbər verir.
Əslində, sosial şəbəkələrdəki
qadın profillərinə olan marağın hədsiz böyüklüyü, bu marağın az qala psixoloji
asılılıq halını alması cəmiyyətdəki qadın aclığından xəbər verir. Uzun illərdir
ki, yürüdülən idarəetmə siyasəti, mənəvi
dəyərlərdən qismən və ya tamamilə imtina Azərbaycan cəmiyyətində yeni maraq və
zövqlərin meydana gəlməsinə səbəb olub. Bu gün cəmiyyətin böyük bir qismi
yaşamın mənasını qızıl kisəsində, içki və qadın məclisində axtarmaqdadır. Qadın
aclığı vəhşi bir qurd, amansız xərçəng kimi cəmiyyəti içəridən yeyib bitirməkdə,
onu hər gün bir az da simasızlaşdırmaqdadır.
Bu baxımdan, saxta qadın
nikləri yaradıb onu idman və kino ulduzu olan qadınların şəkilləri ilə bəzəməyin
özü də Azərbaycan cəmiyyətinə xas əcaiblik, əxlaqsızlıqdır. Bu, sadəcə
oxucuları aldatmağa, hansısa materialları zorla gözə soxmağa, oxucu sayını süni
şəkildə artırmağa hesablanan bir addım deyil. Bu, həm də ciddi bir əxlaqsızlıq
və acizlik əlamətidir. Çünki hər bir peşə və sənətdə yalan və əxlaqsızlıq o
vaxt dövriyyəyə girir ki, insanlar dürüst və əxlaqlı yollarla öz maraqlarını təmin
edə, özlərini, öz bacarıqlarını təsdiq edə bilmirlər. Çarəsizlik, əqli səbatsızlıq
yalan və fırıldağa yol açır. Bir yalan isə həmişə olduğu kimi digər yalanı çəkib
gətirir.
Odur ki, bundan sonra bəyəndiyiniz
informasiyaların kimlər tərəfindən təqdim edildiyinə diqqət edin. Unutmayın ki,
diqqət çəkmək üçün bəyəndiyiniz, şərh yazdığınız profillərin əsl sahibi ölkə
saytlarının bığlı-saqqalı “gözəlçələridir”. Hansı ki, onların qadına olan
aclığı sizin aclığınızdan heç də az deyil. Yox, əgər sizi həqiqətən də xəbər və
onun mahiyyəti maraqlandırırsa, o zaman bu informasiyaların kim tərəfindən təqdimatının
elə bir əhəmiyyəti yoxdur. Daha doğrusu olmamalıdır...
Seymur Əliyev
e-mail: [email protected]