Vahid Azərbaycan Milli Birlik Partiyasının sədri, istiqlalçı deputat, tarixçi professor Hacıbaba Əzimov facebook səhifəsində maraqlı status paylaşıb. Moderator.az həmin statusu olduğu kimi oxucuların diqqətinə çatdırır:

“Dəyərli dostlar! Acı təəssüf hissiylə xatırladırıq ki, ölkəmizin milli müstəqil dövlətçiliyinə həm xaricdə, həm də ölkə daxilində təhlükə yaradan antiazərbaycan qüvvələri mövcuddur. Bu qüvvələrdən ən məkrlisi və qorxulusu isə “Azərbaycan evi”nin içərisindədir və bəzi dövlət orqanlarında mühüm vəzifələrə yerləşdirilmişdir. Əsasən Rusiyanın “beşinci kolon”una mənsub olan həmin antimilli zümrə uzun illərdir ki, tutduğu vəzifə mövqelərindən istifadə edərək açıq və ya gizli şəkildə ictimai-siyasi, hüquqi, sosial-iqtisadi və digər sahələrdə dövlət siyasətinə qarşı təxribatlar həyata keçirir, analoqu olmayan özbaşınalıqlar edirlər. Bunları nəzərə alaraq bir müddətdir ki, feys.-də sual-cavab şəklində antimilli qruplaşmanın dünyada, ən azı Avropada analoqu olmayan rüsvayçı özbaşınalıqlarından, təxribatlarından bir halı ictimaiyyətin müzakirəsinə təqdim etmişik. Dərin kədər və ürək ağrısı ilə bir daha bildiririk ki, bizim bu müzakirəni açdığımız günlərdə, mayın 19-da məmur ”“ sahibkar zümrəsinin analoqu olmayan özbaşınalığı nəticəsində Binəqədi rayonunda 16 mərtəbəli bir binanın qısa bir vaxt ərzində bütünlüklə yanması, 16 nəfərin həlak olması, 60 nəfərin ciddi xəsarət alması kimi dəhşətli faciəvi hadisə baş vermişdir.
Biz, təxminən bir ay bundan əvvəl antimilli ünsürlərin təxribat xaraterli fəaliyyətinə ictimaiyyətin diqqətini cəlb etmək məqsədi ilə bilə-bilə əvvəlcədən konkret faktları şərh etmədən ümumiləşdirilmiş şəkildə hakimiyyət orqanlarından birinin köməkçi-xidmətçi qurumunun (aparatının) rəhbərinin səlahiyyətlərini aşaraq və vəzifə cinayəti törədərək sosial təminatla bağlı bir sıra qanunlara, o cümlədən sabiq deputatlar üçün güzəştli pensiya müəyyən edilməsinə dair qanunvericiliyə antikonstitusion şərhlər verməsi və aidiyyəti üzrə digər dövlət orqanlarının və hətta məhkəmələrin isə əslində heç bir hüquqi qüvvəsi olmayan bu şərhləri əsas tutaraq ədalətsiz qərarlar qəbul etməsi kimi rüsvayçı özbaşınalıq halını ictimai müzakirəyə çıxarmışdıq. İndiki yazımızda isə həqiqətən dünyada analoqu olmayan bu məmur-məhkəmə özbaşınalığı halına hüquq normaları əsasında şərh verməyə çalışırıq. İndiyədək müzakirədə iştirak edən dəyərli dostlara razlığımızı bildirir və belə hesab edirik ki, onların bir qisminin bu görünməmiş özbaşınalığı “analoqu olmayan cinayət” adlandırması da dürüst dəyərləndirmədir. Bunu aşağıdakı təkzibedilməz faktlar və hüquq normaları da açıq ”“ aydın sübut edir:
1. Əvvələn, göstərməliyik ki, Avropa məkanında analoqu olmayan bu cinayət halının baş verməsinin səbəbkarı və günahkarı nə qədər inanılmaz olsa da, Milli Məclisin köməkçi-xidmətçi qurumunun (aparatının) rəhbəri S.Mirzəyevdir. Əldə etdiyimiz faktlar göstərir ki, S.Mirzəyev dəfələrlə qanunlara, o cümlədən Milli Məclisin sabiq deputatlarının və dövlət qulluqçularının sosial təminatı ilə bağlı qanunlara rəsmi antikonstitusion şərh verməklə öz vəzifə səlahiyyətlərini aşmış və Konstitusiya Məhkəməsinin müstəsna səlahiyyətinə qeyri-qanuni müdaxilələr etmişdir ki, bu da əslində cinayət əməlidir. Məsələn, S.Mirzəyev Əmək və Əhalinin Sosial Təminatı Nazirliyinə göndərdiyi 19 dekabr 2000-ci il tarixli məktubunda pensiya ilə bağlı qanuna qəsdən, qısasçılıq məqsədilə belə bir antikonstitusion şərh vermişdir ki, güya 1991-1995-ci illərdə işlədilən “Milli Məclisin üzvü” ifadəsi ilə sonralar istifadə olunan “Milli Məclisin deputatı” məfhumu fərqli hüquq normalarıdır və sabiq deputatlar üçün müəyyən olunmuş güzəştli pensiya yalnız 1995-ci ildən sonra seçilmiş və “Milli Məclisin deputatı” adlanan şəxslərə şamil oluna bilər. 
2. Milli Məclisin Aparatının rəhbəri S.Mirzəyevin səlahiyyətlərini aşaraq pensiya ilə bağlı qanunlara antikonstitusion şərhlər verməsi, heç bir qanun normasına istinad etmədən ilk Milli Məclisin deputatlarının güzəştli pensiya almaq hüququnu inkar etməsi təsadüfi olmayıb, onun Rusiyanın Azərbaycandakı “beşinci kolon”unun əsas fiqurlarından biri və PKK lideri A.Öcalanın 1999-cu ilin fevral ayında Türkiyə kəşfiyyatına (MİT-ə) verdiyi istintaq ifadəsində etiraf etdiyi kimi, PKK tərəfdaşı olması, vaxtilə açıq şəkildə Azərbaycanın dövlət müstəqilliyinin əleyhinə çıxış etməsi və digər səbəblərdən istiqlalçı deputatlara (siqnatorlara ) qarşı qərəzli, siyasi revanşizm niyyəti güdməsi ilə bağlıdır. Məhz buna görə də o, göstərilən qanunsuz əməlini ört-basdır etmək üçün dəfələrlə mətbuata verdiyi açıqlamalarında, dərc etdirdiyi yazılarında ilk Milli Məclisin varlığını, onun deputatlarının statusunu və xidmətlərini danmağa cəhdlər göstərmişdir. S.Mirzəyevin ilk Milli Məclisə və onun deputatlarına qarşı siyasi diskriminativ münasibətini sübut edən əsaslı faktlardan biri də budur ki, onun idarəçiliyində olan Milli Məclisin saytının (bax: meclis. gov.az) “Milli Məclisin tarixi” səhifəsində 1991-1995-ci illəri əhatə edən dövr boş buraxılmışdır. Saytda həmin dövrdə Milli Məclisin, umumiyyətlə qanunverici hakimiyyət orqanının varlığı əks etdirilmir və belə təqdim olunur ki, güya Milli Məclisin tarixi 1995- ci ildən başlayır. 
3. Sabiq deputatların bir qisminin (Məryəm Həsənova, Hacıbaba Əzimov və Firudin Cəlilovun) pensiya hüququnun pozulması ilə bağlı məhkəmələrə müraciətindən sonra isə S.Mirzəyev ədalət mühakiməsi zamanı günahkar olmasının üzə çıxacağını və məsuliyyətə cəlb edilə biləcəyini dərk edərək, həm özünun qulluq vəzifəsindən, həm də qardaşı, Ali Məhkəmənin İnzibati-İqtisadi Kollegiyasının sədri H.Mirzəyevin vəzifə mövqeyindən yararlanaraq mübahisələndirilən işin icraatına qanunsuz müdaxilələr etmiş, hakimlərə təzyiq göstərmiş və məhkəmələrin ədalətli qərar çıxarmasına imkan verməmişdir. 
4. Dövlətçiliyimiz üçün dünyada analoqu olmayan rüsvayçı hal həm də budur ki, Dövlət Sosial Müdafiə Fondu və məhkəmələr qərar qəbul edərkən ölkə Konstitusiyasının və Avropa Konvensiyasının norma və prinsiplərini deyil, S.Mirzəyevin hüquqi qüvvəsi olmayan, antikonstitusion mahiyyətli məktubunu və onun qardaşı, Ali Məhkəmənin İnzibati-İqtisadi Kollegiyasının sədri H.Mirzəyevin şəxsi rəyini və siyasi iradəsini əsas tutmuşlar.
5.1. Məhkəmələrin ölkə Konstitusiyasının və Avropa Konvensiyasının norma və prinsiplərinə zidd olaraq tamamilə qərəzli və qanunsuz qərarlar qəbul etdiyini sübut edən mühüm hallardan və faktlardan bir qismi də bundan ibarətdir ki, cavabdehlər tərəfindən irəli sürülən iddialar, məhkəmələr tərəfindən mübahisələndirilən iş üzrə verilən şərhlər və çıxarılan nəticələr heç də birmənalı oxşarlıq və eyniyyət təşkil etməmiş, əksinə, bir-birindən kəskin dərəcədə fərqli olmuşdur. 
5.2. Milli Məclisin sabiq deputatlarının güzəştli pensiya almaq iddiasının təmin edilməməsinin səbəbinin izahında cavabdehlərin “dəlillər”i bir-birindən, məhkəmələrin nəticəvi “əsaslar”ı bir- birindən fərqli olduğu kimi, cavabdehlərlə məhkəmələrin arasında da ziddiyətli yanaşmalar olmuşdur. Bütün bu ziddiyyətli hallar, faktlar və hüquq normaları sübut edir ki, əslində həm cavabdehlərin, həm də məhkəmələrin göstərilən iddiaları, “hökm”ləri milli və beynəlxalq hüquq normalarına tamamilə zidd, uydurma mülahizələrdir. Bunu oxşar məhkəmə aktlarına münasibətdə Avropa Məhkəməsinin və Azərbaycan Respublikası Konstitusiya Məhkəməsinin bir sıra qərarlarında formalaşdırdığı hüquqi mövqeyi də sübut edir. 
6. Avropa Məhkəməsinin Avropa Konvensiyasının 14-cü maddəsi ilə bağlı presedent hüququna görə, analoji və ya əhəmiyyətli dərəcədə oxşar vəziyyətdə, xüsusən eyni hakimiyyət orqanı, o cümlədən qanunverici hakimiyyət daxilində olan şəxslər və ya qruplarla rəftarda fərqləndirmə olmamalıdır. Avropa Konvensiyanın 14-cü maddəsi şəxsi xüsusiyyətlərə, yaxud da şəxslərin və ya qrupların birini digərindən ayıran “statusa” əsaslanmaqla onlarla fərqli rəftar edilməsini qadağan edir. 
7. Ölkə Konstitusiyanın və Avropa Məhkəməsinin presedent hüququ tələbləri mövqeyindən çıxış edərək Konstitusiya Məhkəməsinin Plenumu “Məhkəmələr və hakimlər haqqında” Qanunun müvafiq müddəalarının şərh edilməsinə dair 23 yanvar 2001-ci il, 27 iyun 2001-ci il, 29 aprel 2003-cü il və 18 iyul 2008-ci il tarixli qərarlarında belə bir mövqe müəyyənləşdirmişdir ki, fəaliyyət göstərdikləri dövrdən asılı olmayaraq hakim vəzifəsini yerinə yetirmiş şəxslərin sosial təminatı heç bir fərq qoyulmadan Konstitusiyada təsbit olunmuş bərabərlik hüququ prinsipi (maddə 25 və 149) əsas götürülməklə həll edilməlidir.
8. Lakin Dövlət Sosial Müdafiə Fondu və mübahisələndirilən işə baxan məhkəmələr qanunvericilik hakimiyyəti (Milli Məclis) daxilində eyni kateqoriyaya (Milli Məclisin sabiq deputatlarına) aid olan bir qrupun - Azərbaycanda dövlət müstəqilliyinin əldə edilməsində, müstəqil Azərbaycan Respublikasının dövlət atributlarının, ölkə Konstitusiyasının və qanunvericilik bazasının hazırlanıb qəbul edilməsində müstəsna xidmətləri olan ilk Milli Məclisin deputatlarnın sosial təminatına fərqli mövqedən yanaşaraq və uydurma “status” fərqliliyi bəhanəsi ilə onların güzəştli pensiya almaq hüququnu pozmuşlar ki, bu da açıq-aşkar Konstitusiyanın 25-ci maddəsinin I bəndi və Avropa Konvensiyasının 14-cü maddəsi üzrə Avropa Məhkəməsinin presedent hüququna tamamilə zidd olub sosial sahədə dövlət siyasətinə ikili standartlardan yanaşılması və diskriminasiya tətbiq edilməsi deməkdir. 
9. Təsadüfi deyildir ki, hakimiyyətin varisliyinin və Konstitusiyanın bərabərlik hüququ prinsipinin qorunması mövqeyindən çıxış edərək Milli Məclisin fəaliyyətdə olan 21 nəfər deputatı hələ 2007-ci il martın 7-də Prezident İ.Əliyevə məktubunda sabiq deputatların bir hissəsinə qarşı ayrı-seçkilik olduğunu ifadə edərək göstərmişdır ki, “bərabərlik hüququ hələ də ilk Milli Məclisin deputatlarına şamil edilməyib. Həmin sabiq deputatların pensiya təminatı məsələsini həll etmək üçün isə qanunvericiliyə hər hansı dəyişiklik və əlavələr etməyə ehtiyac yoxdur. Bunun üçün sadəcə Dövlət Sosial Müdafiə Fondu öz vəzifə borcuna müvafiq olaraq mövcud “Əmək pensiyaları haqqında” qanuna əməl etməlidir”. Göründüyü kimi, bu məktubda deputatlar həm də mövcud qanunvericilik aktlarının ilk Milli Məclisin deputatlarına güzəştli pensiya verilməsinə təminat verdiyini, lakin Dövlət Sosial Müdafiə Fondunun öz vəzifə borcuna əməl etmədiyini də xüsusi olaraq vurğulamışlar. Bütün bunlara baxmayaraq yenə də analoqu olmayan bir hal baş vermiş, deputatların göstərilən məktubu qəsdən Prezident İ.Əliyevə deyil, Nazirlər Kabinetinin təhsil şöbəsinə göndərilmiş və orada da “dəfn” edilmişdir. 
10. Göründüyü kimi, S.Mirzəyev səlahiyyətlərini aşaraq və Konstitusiya Məhkəməsinin müstəsna səlahiyyətinə aid funksiyalarını mənimsəmək cəhdi göstərərək qanunlara rəsmi şərh vermiş, Dövlət Sosial Müdafiə Fondu və məhkəmələr dövlət adından qəsdən, bilə-bilə daimi fəaliyyət göstərən qanunvericilik hakimiyyəti (Milli Məclis) daxilində eyni və bərabər vəziyyətdə olan sabiq deputatların bir hissəsinə diskriminasiya tətbiq etməklə onların güzəştli pensiya almaq hüququnu kobud şəkildə pozan qanunsuz qərarlar qəbul etmiş və bununla da Azərbaycan Respublikası Konstitusiyanın 13, 25, 26, 29, 38, 60, 71, 127, 149-cü maddələrində, Avropa Konvensiyasının 6.1, 14 və 17-ci maddələrində, Konvensiyanın 1 saylı Protokolunun 1-ci maddəsində təsbit olunmuş norma və prinsipləri, Avropa Məhkəməsinin Konvensiyanın 6.1, 14 və 1saylı Protokolunun 1-ci maddələri üzrə presedent hüququ ilə müəyyən olunmuş tələbləri kobud şəkildə pozmuşlar.
11. Azərbaycan həqiqətən də Avropada və hətta postsovet məkanında analoqu olmayan yeganə ölkədir ki, burada dövlət müstəqilliyi bərqərar olduqdan sonra seçilmiş və daimi fəaliyyət göstərən parlamentin ”“ ilk Milli Məclisin deputatlarının böyük əksəriyyəti səlahiyyətləri başa çatdıqdan sonra işsiz saxlanılmış və həm də deputat pensiyalarını almaqdan məhrum edildiklərinə görə agır maddi-mənəvi sıxıntılar, ciddi səhhət pozuntuları içərisində çətin həyat yaşamaga məhkum edilmişlər. Son dərəcə acınacaqlıdır ki, cəmi 51 nəfərdən ibarət seçilmiş ilk Milli Məclisin üzvlərindən hazırda 20 nəfəri pensiya yaşına çatmışdır ki, onlardan da 8 nəfəri həm işsiz saxlanıldığına və yalnız pensiya ümidinə qaldığına, həm də deputat pensiyasını almaqdan məhrum edilərək agır maddi sıxıntılara və “mənəvi-məxməri terrora” məruz qoyulduğuna görə vaxtsız vəfat etmişdir.
Şübhə yoxdur ki, bütün bu rüsvayçı hallar, analoqu olmayan qanunsuz qərarlar, ilk Milli Məclisin varlığının inkar edilməsi, onun üzvlərinin status və hüquqlarının pozulması mahiyyətcə həm də şəxsiyyətə, cəmiyyətə, dövlətə təhlükə yaradan cinayət əməlləri, milli müstəqil Azərbaycan dövlətçiliyinə qarşı təxribat və həqarət, ölkəmizin beynəlxalq nüfuzuna ciddi zərər vuran hüquqi-siyasi aktlardır. 
Odur ki, dəyərli dostları, sabiq və hazırkı deputatları, siyasətçiləri, hüquq müdafiəçilərini, vicdanlı dövlət qulluqçularını və bütün Azərbaycan ictimaiyyətini dünyada analoqu olmayan bu məmur-məhkəmə özbaşınalığına biganə qalmamağa, öz münasibətlərini bildirməyə və aidiyyəti üzrə dövlət orqanlarını isə müqəssirləri məsuliyyətə cəlb etməyə çağırırıq”.