Son bir ildə Azərbaycandan xarici ölkələrdə gedən hərbi əməliyyatlara qatılan gənclərin sayının sürətlə artması, onların bəlli bir qisminin hüquq-mühafizə orqanları tərəfindən məsuliyyətə cəlb edilməsi gənclər arasında radikal və terrorçu qruplara olan marağın getdikcə artdığını göstərir. Maraqlıdır, gənclərin terrorizmə, radikalizmə meylinin artması nə ilə bağlıdır? Bunun mövcud təhsil sistemi ilə hər hansı bağlantısı varmı? Bir insanın terrorçu olması üçün onun hansı şərtlərlə əhatələnməsi gərəkir?
Bununla
bağlı Moderator.az-a açıqlama verən “Psixoqamma” praktik psixologiya üzrə resurs mərkəzinin rəhbəri,
psixologiya üzrə fəlsəfə doktoru, dosent Limunət Əmrahlı gənclərin radikalizmə
meylinin bir sıra amillərdən qaynaqlandığını vurğuladı:
“Azərbaycan gənclərini terrorizmə meyilləndirən sosial-psixoloji amillər
var. Gənclərdə terrrorizmə meyillilik birdən-birə baş vermir. Bunun üçün
insanın həyat yolunda bir sıra məsələlər üst-üstə düşməliidir: genetik amillər,
fərdi xüsusiyyətlər, düzgün qurulmayan ailə tərbiyəsi, uşaq, yeniyetmə və gənclik
dövründə insanların təhsil prosesində üzləşdikləri haqsızlıqlar, pedaqoqların
kobud münasibətləri və s. Valideyn də, müəllim də, iş yerindəki rəhbər də nəzərə
almalıdır ki, bütün insanların həyatda özəl tələbatları var: fiziki, məhəbbət,
təhlikəsizlik, qəbul olunmaq, özünə hormət, ləyaqətin qorunması, özünüqiymətləndirmə,
özünüinkişaf, özünüreallaşdırma və s. Müxtəlif yaş dövrlərində bu tələbatların
hansısa biri daha aktual olur. Ona görə də kimin nə zaman, harada və hansı
neqativ təsirlərlə üzləşdiyini, bunları yadda saxlayaraq kimlərə qarşı
zorakılıq etmək, qisas almaq, işgəncə vermək, öldürmək isəyinin yaranmasını təyin
etmək çətindir. Ancaq nəticələrlə bağlı konkret fikirlər söyləmək olar”.
L.Əmrahlının
fikrincə, iki qisim insanlarda terrorizmə daha çox meyl müşahidə edilir: “Terrorizmə
meyillilik əsasən iki qisim insanlarda daha güclü olur: birincilər "ifrat
vətənpərvər"lərdir. Onlar hansısa təsirlərdən sahib olduqları doğru-yalan
dəyərlərini qorumağa çalışaraq baş verən proseslərin zorakılıq yolu ilə həllini
qəbul edirlər. Sonda uğursuzluqlara düçar olur, böyük əksəriyyəti öz məqsədlərinə
çatmadan həyatlarını itirir, həbs olunurlar. İkincilər, ümumiyyətlə, heç bir dəyərə
sahib olmadan hər kəsin təsirinə düşərək situativ hərəkət edənlərdir. Əlbəttə
ki, hər iki qisim şəxslərdə terrorizmə meyilliyin yaranmasının əsas səbəbini
istər-istəməz tərbiyə mühitində və təhsil sistemindəki boşluqlarda axtarmalı
oluruq. Baxın, indi Azərbaycan ailələrində nə qədər valideyn öz övladlarının, hətta
qidalanmaq, ev, iş qurmaq ehtiyaclarını ödəmək imkanında deyillər. Azərbaycan
teleməkanında təbliğ olunan “xoşbəxt həyat” görüntüləri ilə müqayisədə bir çoxları
öz yaşayışlarına miskinlik, kasıblıq, çarəsizlik, rəzillik, bir sözlə, dəyərsizlik
kimi yanaşırlar. Onlara elə gəlir ki, özündən başqa hamı yaxşı yaşayır. Gənclər
iş tapa, iş qura bilmir, qızlar xoşbəxtliyi yalnız bu kriteriyalara sahib
olanlara ərə getməkdə görürlər. Artıq onlar üçün bir çox insani keyfiyyətlər
arxa plana keçməkdədir. Bu kimi səbəblərdən oğlanlarımız 30 yaşına çatır,
işsizlikdən, evsizlikdən ailə qura bilmirlər. Təhsil sisteminə gəldikdə, vəziyyət
o qədər də fərqli deyil. Hələ məktəbəqədər təhsil müəssisələrindən başlayaraq
ali təhsil, elmi pillələrinə qədər nələr baş vermir? Hər şey alınır, satılır.
Uşaq kiçik yaşlarından ailədə valideynin tərbiyəçiyə, müəllimə hörmət edə bilmədiyinə
görə onun uşağına fərqli yanaşmasından, diqqətsizliyindən gilieylənir. Yuxarı
siniflərdə vəziyyət daha da ciddiləşir. Uşaqlar artıq özləri bilavasitə belə
sayğısızlıqların şahidi olurlar. Əlbəttə ki, təhsil işçiləri subyekt olaraq bu
kimi ciddi məsələləri özləri həll etmək gücündə deyillər. Digər tərəfdən, son
illər təhsil sistemində aparılan islahatlarda bir çox psixoloji məqamlardakı
boşluqlar, yerli mütəxəssislərin etnopsixologiya ilə bağlı rəylərinin nəzərə
alınmaması da problemin həllini çətinləşdirib. Eyni zamanda, gənclərin radikal qruplara
meyilliyi sahəsində psixoloji tədqiqatların aparılaraq real vəziyyətin aşkar
edilməməsi də bunu başlıca səbəblərini üzə çıxarmağa imkan vermir. Yaxşı ki,
ailələrimizin bir çoxu övladlarında özlərini neqativ təsirlərdən qoruya biləcək
şəxsiyyətlər formalaşdıra bilirlər. Ancaq, təəssüf ki, digər qisim, qeyd
etdiyimiz kimi, bunu bacarmır. Nəticədə onların övaldları kənar təsirlərə açıq
olurlar. Tez aldanır, təsirə düşür, onlara edilən təkliflərə xəyallarında gözlədikləri
“Ağ atlı xilaskar oğlan” kimi yanaşırlar. Bunun səbəbi təhsil müəssisələri və
ailələr arasında səmimi münasibətlərin zəif inkişaf etməsi, təhsil prosesində
uşaq, yeniyetmə və gənclərdə rasional dünyagörüşün, aydın təfəkkürün
yaradılmamasıdır. Bunun üçün, əlbəttə ki, əvvəlcə təhsil verənlər bu səviyyədə
hazırlanmalı, pedaqoji kadr hazırlığı sahəsində ciddi islahatlar aparılmalıdır”.
L.Əmrahlının
qənaətincə, vəziyyətdən çıxış yollarından biri də insanlar arasında psixoloji
biliklərin yayılmasıdır:
“Mövzunun
vacibliyini nəzərə alaraq bir məsələni də qeyd etmək istərdim. Düşdüyümüz vəziyyətdən
ən tez, operativ və optimal çıxış yolu cəmiyyətdə psixoloji biliklərin
yayılması, insanların özünüdərkinə, özünüreallaşdırmasına düzgün yolların göstərilməsidir.
Azərbaycan xalqı böyük mədəniyyət sahibdir. İnanıram və əminəm ki, bunu
bacaracaq.
Digər
yol Azərbaycanda “Psixologiya İnstututu”nun yaradılması, “Psixoloji Xidmət
Haqqında Qanun”un qəbul olunması, “Təhsil Sistemində Psixoloji Xidmət Haqqında
Əsasnamənin” təsdiq edilməsidir. Buna çox ciddi ehtiyac var. 2003-cü ildən
başlayaraq bu sitiqamətdə cəhdlər göstərilsə də hansısa müəmmalar bunu reallaşmasını
mümkünsüzlüyə çevirib. Övladlarımızın tərbiyəsində və təhsilində yol verilən
nöqsanlar bizim havaya atdığımız bumeranq kimidir. Nə zamansa qayıdıb özümüzə və
cəmiyyətə dəyməlidir. İndi Azərbaycan cəmiyyəti atdığı bumeranqların zərbələrini
almaq mərhələsinə çatıb. Ehtiyatlı olmalıyıq!”
Seymur Əliyev