"Harda ki, güc şahlıq edir, orda qanunlar gücsüzdür”
Menandr
Baş prokurorun keçmiş müavini, Sosial Ədalət Partiyasının sədri Mətləb Mütəllimli Moderator.az-a rəsmi Bakının xarici siyasət kursunun mahiyyəti və bu siyasətin doğurduğu fəsadlarla bağlı maraqlı yazı göndərib. Həmin yazını olduğu kimi oxuculara təqdim edirik:
Bu günlər, yenə aləm dəyib bir- birinə. Başı rüşvətə, alverə, müxalifəti əzib suyunu içməyə, seksə, əlbəttə ,ömürlük saxta prezident seçkilərinə qarışmış müsəlman ölkələrindən cəmi bir-ikisi yaxasını cırır ki, bəs deməzsən, cuppulu bir dövlətin başçısı, roma papası (hirsimdən, həmrəylik nümayiş etdirərək mən də adları kiçik hərflərlə yazıram) bir qələt eləyib. Əslən ermənilərin tüğyan etdiyi Argentinadan olan Fransisk , yatıb-yatıb birdən durub bəyan edib ki, bəs, deməzsən, 1915-ci ildə Türkiyə “erməni soyqırımı” törədilib. Burda faciə təkcə onda deyil ki, romanın 266-cı papası vəzifəyə keçən kimi özünün “Xorse Marto Berqalito “ adını kənara tullayıb Fransisk oldu. Bədbəxtçilik həm də onda oldu ki, bizim və türklərin ona qoyduğu maya tamamilə batdı, kəllə-mayallaq oldu. Bizimkilər hələ da baş aça bilmirlər ki, görəsən , Fransiskini yoldan çıxaran nə oldu? İnsafən desək, bizim yol-yolağ bilən, özgələrə yarımaqda pərgar olan hakimiyyət ona bərk girişmişdi və nəticəsi də var idi, pis deyildi . Məsələ təkcə onda deyildi ki, bizim başbilənlər hər il Romaya gedir, onları ziyarət edib əllərini sıxır, pay püşklərini verib kefi kök, damağı saz geri qayıdırdılar. Məsələ həm də onda idi ki, bu üzlərini mürdəşir yumuş ermənilərdən fərqli olaraq biz o nankorlar üçün hambal kimi gecə-gündüz iş görürdük, acından qarnı paravoz kimi fit çalan xalqın pulunu onlara xərcləyirdik. Söz vaxtına çəkər, keçən ilin bu vaxtları, H.Əliyev fondunun prezidenti M.Əliyeva Roma papası ilə görüşmüş, Azərbaycan ilə Vatikan arasında ikitərəfli əlaqələrin yüksələn xətlə inkişaf etdiyini demişdi. Düzünə qalsa, Həzrət Abbas haqqı, mən göz dəyməsinə o qədər də inanmıram, amma, bu faktdır ki, bizə göz dəydi, nəzərə gəldik, özü də çox pis nəzərə gəldik. İnsafən, o vaxt ,indi olmasın, hamımızın sevimlisi papa da fondun dəstəyi ilə Müqəddəs Roma katakombalarının bərpasına yüksək qiymət vermişdi. Başqa cür də ola bilməz, biz öz millətimizə bir qəpik də xərcləməsək heç nə olmaz, dünya dağılmaz. Həm də, bütün dünya bilir və şahiddir ki, bizim xalq dözümlü xalqdır, acından ölər, amma, quru bəyliyindən əl çəkməz. Əsas odur ki, var-yoxumuzu ona buna, özgələrə peşkəş edək, əliaçıqlığımızı, səxavətimizi dünyaya nümayiş etdirək. Az qala, dövlət büdcəsi qədər pulu olan və bu pulların mənbəyinin dövlət sirrindən də artıq gizli saxlanılan fondun hesabından 50 min avro Berlin qəsrinin bərpası üçün bağışlamadıqmı? Bağışladıq, qoy, nemeslərin halal xoşları olsun. Rimin Kapitoliya muzeyində “Filosoflar zalı”nı bərpa ermədikmi? Etdik, bu da katoliklərin sağlığına qismət olsun.Müqəddəs Marçellino və Pietro katakombaları külli miqdarda xərc hesabına (rəqəm dövlət sirri olduğundan, açıqlaya bilmərəm ) bərpa etdikmi, bəli ,necə lazımdır bərpa etdik. Biz qətiyyən bununla kifayətlənə bilməzdik,necə ki, kifayətlənmədik də. Fondun rəhbərliyi onu da diqqətə çatdırdı ki, Vatikan Apostol kitabxanasında mövcud olan bir çox əlyazmalar fondun dəstəyi ilə bərpa olunmuşdur.Hələ, bu harasıdır, görünür, onlar bizi o qədər də yaxşı tanımırlar. Fondun rəhbərliyi ilə Vatikan Apostol kitabxanasının rəhbərliyi arasında ” 2015- 2016-cı illərdə yeni əlyazmaların bərpa edilməsi və onların rəqəmsallaşdırılması”na dair daha bir müqavilə imzalamışıq. H.Əliyev fondunun rəhbərliyi hətta onu da vurğulamışdır ki, Müqəddəs Roma katakombalarının bərpası ilə yanaşı, digər layihələr də həyata keçirilə bilər. Bəli, biz beləyik, biz humanistik, əl tutmağı bacarırıq, çünki, əl tutmaq Əlidən qalıb. Burda bütün imamlarımız üçün bir salavat zikr edək. Hə, nə olsun ki,rəsmi dövlət statistikasına malik Vatikan ən kiçik cırtdan dövlətdir, əhalisinin sayı min nəfəri keçmir, cəmi 530 daimi sakini vardır. Nə olsun , “zat to” , dünyanın təxminən 7 milyard insanından 1,2 milyard katolikini idarə edir. Bundan başqa, Roma yepiskopu katolik kilsəsinə aid 300 milyard (!) dollarlıq sərvətə nəzarət edir, ki, biz də onun xəzinəsinin başının pozulmasına, azalmasına imkan verə bilməzdik, vermədik də.
İndi, siz deyin,möhtərəm oxucu, gəl , əyri oturaq, düz danışaq: biz bunlara pul xərcləməyək, bəs, nə edək? Nə olsun ki, onlar öz milyardlarına toxunmur, bizi hərif yerinə qoyub bir “ malades”ə görə dərimizi soyurlar. Nə olsun ki, bir çox rayonlarımızda uşaqlarımız məktəb əvəzinə at tövləsinə bənzəyən uçuq-sökük xarabalıqlarda dərs keçir? Nə olsun ki, şəhid ailələri, qarabağ əlillərimiz acından köpük qusur, imkansızlıqdan adam kimi ağıllı başlı müalicə ala bilmir, qocaların aldıqları qəpik-quruş pensiya da heç onların dərman puluna bəs etmir. Eybi yox, biz dünyanın ən dözümlü xalqıyıq. İstəsəniz ,sizinlə mərc gələrəm ki, (bəri başdan deyirəm, mərc gəlməyin, uduzarsız) dünya üzrə dözümlülüyə görə yarış keçirilsə,birinci yer nağd bizimdir.
İndi də,dünyanın işinə baxın, görün, Papanın axmaq soyqırım söhbəti nə həddə çatıb ki, hətta, siyasətdən uzaq adamlar belə, səbrini saxlaya bilmir, papanı hax yoluna dəvət edirlər. Elə, götürək YAP-ın icra katibinin müavini, Milli Məclisə təyin olunmuş Siyavuş Novruzovu. İş o həddə çatıb ki, həmişə ağır oturub batman gələn, müxalifətin mitinqlərini siçan deşiyindən izləməklə beynəlxalq dərəcəli ekspert, iki daşın arasında “hüquq elmləri doktoru” elmi dərəcəni qapazlayıb diplomunu cibişdanına dürtən əkə bircə cümlə ilə bütün xalqın arzularını, istəklərini dilə gətirib ki, “ Roma papası bu bəyanatı verməzdən əvvəl gərək götür-qoy edəydi.” Təmiz söhbət! Düz sözə nə deyəsən ki?
Yaxud da ,hamımızın sevimli müğənnisi, ömürlük deputat Zeynəb xanım Xanlarova bir az da uzağa germiş , quşu dimdiyindən vurmuşdur.Xanım millətin vəkili demişdir ki, ” Mən belə hesab edirəm ki, qırxı çıxmış papa haqqında danışmağa dəyməz, çünki, onun ətrafı bizə qarşı olan insanlardır.” Ah, əzizim Zeynəb xanım, siz nə edirsiniz, bizi dünya ilə üzbəüz qoyub düşmənmi eləmək istəyirsiniz? Birincisi, papa hələ ölməyib, onda ki, bu üz var, çətin ölər. İkincisi də , bu papa helə belə papa deyil, dünyanın əhalisinin 1,2 milyard katolikinin papasıdır, axı?!
Bir də ki, ...bəlkə, heç bunu deməyim,Zeynəb xanım ? Yaxşı da, bir halda ki, söz gəldi, qoy deyim, amma, bəri başdan xəbərdar edirəm ki, təkcə bu sözünüzə görə siz bir də deputat mandatı görməyəcəksiniz.O mandatı verən şəxs sizin bu siyasi səhvinizi bağışlayarmı? Durub deyirsiniz ki, papanın ətrafındakılar pis adamlardır, bizə qarşı olan insanlardır. Vay, dədəm vay! Bu, nə sözdür siz demişiniz? Məgər, siz hələ də bilmirsiniz ki, papanın ən-ən yaxınında duran Müqəddəs Arxelogiya üzrə Şuranın Sədri , papanın can ciyəri kardinal Can-Franko Ravazi bizim “ Dostluq “ ordeni ilə təltif edilib? Belə çıxır ki, prezidentimiz belə yüksək ordeni pis , bizi sevməyən adama verib? Çox heyif o ömürlük deputat mandatına. Mən sizi qarğamıran, amma, bəri başdan 100 faiz əminliklə deyirəm ki, gələn il siz təmtəraqla 80 yaşınızı qeyd edəndə 30 il cibinizdə gəzdirdiyiniz deputat mandatını bir də görməyəcəksiniz.
Bəli, indi, hamı baş sındırır ki, bu necə oldu, papa niyə belə etdi. Əşşi, Papa cəhənnəm,soyqırım cəhənnəm,bizin çəkdiyimiz o qədər xərc niyə batdı, səbəbkar, günahkar kim oldu? Bəziləri, hətta, heyifsilənirlər ki, heyif o antikvar xalçalara, zərli-zibalı dolçalara, qiymətli əşyalara, katakombalara çəkilən xərclərə (dövlət sirri olduğu üçün rəqəmləri deyə bilmərəm.)
Sizi çox da intizarda qoymaq istəmirəm, bunun əsas səbəbini bilmirsinizsə , bilin və agah olun. Bunun əsas günahkarı elə biz özümüzük, ona görə ki, nağdı qoyub nisyənin dalınca qaçmışıq. Başqa sözlə, katakombalara çəkilən mənasız xərclər Roma papasının, adını dəyişmiş bu kişinin nəyinə lazım idi? Xaricdən gəlib bizdə pul qoymaq istəyən, abidələrimizə xərc çəkmək istəyən birisinə( hələ ki, belə hərif bizə rast gəlməyib) şərait yaradarıqmı? Əsla, qətiyyən,heç bir zaman! Ölkəmizə iş görmək üçün gələn hərifə biz həmişə qaz kimi baxmışıq, baxırıq,baxacağıq. Qoy, nə verirsə, nağd versin, ən azından, 50-nin 50-yə bizimlə şərikinə getsin. Sözümün canı odur ki, bu xərcləri vaxtında, poezd getməmişdən əvvəl şəxsən Fransiskin özünə çəkməli idik. O vaxtı bütün dünya bar-bar bağırırdı ki, a kişilər, bu Fransiskonun ağ ciyərinin biri yoxdur. Bu yerdə, keçmiş səhiyyə naziri Əli İnsanovun atası Binnət kişiyə gecə-gündüz rəhmət oxutduran, səhiyyədən xəbərsiz, indiki səhiyyə nazirinin kreslosunu bekara yerə zanit edən , səhiyyəni it gününə qoyan, bu sahəni rüşvətlə bərk bərk şirələyən Oqtay Şirəliyev təcili tədbir görə bilməzdimi? Ən azından, çoxlarının dad etdiyi ağ ciyər institutundan bir ciyər təşkil edə bilməzdimi? Bu nə çətin iş idi ki ? Bu da o deyil ki, bu boyda ölkədə Sumqayıta adi cərrah göndərməyə gedəsi, 30 min dollar verəsi birisi tapılmır. Bu da o deyil ki, hökumətin sonuncu müşavirəsində dərmanların həddən artıq baha olmasına görə səhiyyənin ünvanına prezident tərəfindən itin sözü deyilmiş, səhiyyə naziri isə, heç, tükünü də darağa verməmişdi. Çünki, bu şoğərib dərman biznesinin ona qətiyyən aidiyyəti yox idi və haqlı olaraq belə fikirləşir ki,bu biznes də onu söyənlərin öz sahəsidir,çörək ağacıdır.
Yaxud da, bizdən başqa bütün dünya əzbər bilirdi ki, Roma papası Fransisk həkimlərin pəhriz rejimi ilə bağlı tövsiyyələrinə riayət etməyərək həddən artıq makaron yeyir. Ah, necə də əldən buraxılası mümkün olmayan məqam idi! Axı, biz bilməli idik ki, həkimlər makarona qarşı ifrat sevgisi olan papaya həftədə yalnız iki dəfə onun dadına baxmağa icazə verirdilər. Biz belə bir fürsəti əldən buraxmışıq ki, bizim özünü bərk gedən hesab edən, əslində isə, hakimiyyətə yaltaqlanmaqdan,öz biznesini inkişaf etdirməkdən başqa işi -gücü olmayan bir televiziya kanalının (kanalizasiya yox ha) rəhbərliyinin halallıca makaron fabrikindən çoxluca makaron tədarük edib Romaya göndərə bilməzdikmi ? Necə olsa,atalar demiş, qarın qardaşdan irəlidir, axı. Əlbəttə, göndərə bilərdik, ağlımız kəsməyib, gözəl ideya rüşvətsevər beynimizə girməyib.
Hələ bunu da bağışlamaq olardı, bunun sonrası olmasaydı. Adını dəyişmiş bu kişi vaxtilə bizə və bizim kimi həriflərə siqnal vermişdi, bəyan etmişdi ki, onun dünyada yeganə arzusu -Vatikandan çıxıb, kənarda bir pizza yeməkdir. Pah atoynan, dünyanın işinə bir bax: 300 milyard dollar dəyərində sərvətin ola, buna baxmayaraq, bir pizzadan ötrü ürəyin gedə? Sən allah,əziz oxucu, düzünü de, heç belə şansı da əldən buraxmaq olardımı ? Bu milyardçı yetim oğlu yetim bundan da artıq ,bundan da aydın daha nə deməli idi ki? Məgər, bütün işi gücü buraxıb,mənasız və lazımsız birinci Avropa oyununu,pula tələ qurulmuş bu oyunu bir kənara tolazlayıb papanı təcili Bakıya dəvət etmək olmazdımı, pizzanı qabağına doldurmaq mümkün deyildimi ? Bəli,bu şansı da belə buraxdıq. Mən tam əminəm ki, biz onu burda yüksək səviyyədə qəbul edə bilərdik. Əlbəttə, mən ona da əminəm ki, filosof Əbülhəsən müəllimin sözü olmasın , ”ustad administrator” Ramiz Mehdiyev bu işi elə belə başlı başıbına buraxmazdı, durub onu hansısa əntər pizzəxanaya aparmazdı? Ən azından, prezidentin ailəsinə məxsus olduğu deyilən “Park Bulvar”a aparar, “bəsdi” deyənə qədər kişinin qarnın doydurardı. Sonra da Rusiya prezidenti, papa kimi ermənilərin dayağı Putinin hərbi gəmilərinə qoyduqlarından papanın da gəmisinə qoyardı. Bununla da məsələ əla, əladan da əla tamamlanardı. Heyif, çox heyif, mayamızın batması bir yana, bu dəfə öz doğma prinsiplərimizə də naxələf çıxdıq. Bu bizə ömürlük acı bir dərs olmalıdır. Bundan sonra bütün biliyimizi, bacarığımızı, səriştəmizi səfərbər edib ortaya qoymalıyıq ki, növbəti dəfə belə kobud, bağışlanılmaz və axmaq səhvə yol verməyək.Var gücümüzlə çalışıb papanın şəxsi etimadını qazanaq, onun özünə, oğul-uşağına, öz işimizə xatir ,lap elə bütün qohum əqrabəsinin cibinə mülayimliklə, belə də istəməsələr ,lap zorla dollar, qır-qızıl dürtək. Axı, hamımız bilirik ki, bu dünya “ver” dünyasıdır. Bir də , atalar demiş, soğan olsun,nağd olsun!”