Dünən Azərbaycan Turizm və Menecment Universitetində
bir hadisə ilə rastlaşdım. Bir amerikalı ilə ATMU-nun Beynəlxalq Əlaqələr şöbəsi
əməkdaşlarının müzəkirəsinə şahid oldum. ATMU-da tələbələrin belə bir neçə
xarici dildə sərbəst danışması adi hal olmasına baxmnayaraq, şöbənin əməkdaşı
Orxan Musanın amerikalı ilə çox sərbəst və sürətli şəkildə ingiliscə söhbət etməsi
çox xoşuma gəldi. Ancaq bir anda mən bir anlaşılmazlıq yaşadım. Bayaqdan
universitetin əməkdaşı Orxan Musa sürətlə və sərbəst şəkildə ingiliscə
danışdığı halda indi həmin amerikalı çox sərbəst şəkildə və sürətlə azərbaycan
türkcəsində danışırdı. Öncə düşündüm ki, yəqin amerikalı dilimizdə bildiyi
beş-on kəlməni qəsdən işlədir ki, bizdə
özünə rəğbət yaratsın. Amma söhbətin davamında gördüm ki, bu amerikalı bütün
fikirlərini, nəinki təkcə elm və təhsillə bağlı, digər məsələlərlə bağlı olan
fikirlərini də Azərbaycan türkcəsində çox sərbəst və səlis ifadə edir. Düşünə
bilərsiz ki, yəqin Amerikada yaşayan türklərdən biridir bu bəy. Xeyir. Təmiz ingilisdir. Virgil Tanner, Xəzər
Universitetində dərs deyir. Bu amerikalı ingilisin dilimizdə belə gözəl
danışması məndə iki sual yaratdı?
1. Nədən bizim caamatın böyük bir hissəsi, xüsusi ilə
aydınlar- sənətçilər, yazarlar, təhsil işçiləri, iş adamları, məmurlar dilimizə
belə laqeyd, umursamazdılar?
2. Kütləvi informasiya vasitələrində, xüsusi ilə
televiziya kanallarında çalışanların əksəriyyətində niyə dilimizə sevgi yoxdur,
onlar niyə milli düşüncədən yoxsundular?
Məncə, bu suallar cəmiyyətimizdə ciddi və geniş şəkildə
müzakirə olunmalır. Fikrimcə, bu
gün dilimizin inkişafının
qarşısı nəinki alınıb, hətta deyərdim ki, dilimiz sürətlə məhv olmağa doğru
gedir. Kimlərsə mənə etiraz edə bilər. Amma nə yazıq ki, bu etirazlar realığa
yox, özünümüdafiəyə
və duyğusallığa söykənimş olar.
Onu qeyd edim ki, son vaxtlar ölkədə dilimizini
qorunması, tətbiqi və inkişafı ilə bağlı çoxlu qanun və dövlət proqramı qəbul
edilib, Prezident tərəfindən fərman və sərəncamlar verilib.
Amma bütün bunlar dilimizi gözləyən təhlükədən qurtarmağa, üzləşdiyi sorunları
çozməyə yetərli olmayıb. Cəmiyyətə təsir imkanı olan şəxslərin, xüsusi ilə təhsil
işçilərinin, sənətçilərin, yazarların, məmurların və . b. dilimizə laqeyd,
umursamaz münasibəti, danışıqlarında dilimizdə qarşılığı olduğu halda çoxlu
yabançı söz işlətmələri, hətta bəzi hallarda isə dilimizi aşağılayan ifadələri
cəmiyyətin digər təbəqələrində dilimizə qarşı,
yumşaq desək,
bir kasıblıq, zəiflik,
imkansızlıq, ehtinasızlıq fikri yaradır, dilimizi sevmək və qorumaq
instiktini öldürür. İndi siz düşünün ki,
böyük bir tədbirdə adlı-sanlı, tanınmış, nüfuzlu bir alim, təhsil işçisi və ya
sənətçi çıxış edir. Hər sözü cəmiyyətə təsir edən bu adamın çıxışında,
danışığında, müraciətində ya da cavabında işlətdiyi yabançı sözlər əhalidə, onu
dinləyənlərdə hansı təsiri yaradır. İndi siz düşünün ki, “Xalq” və “Əməkdar xadim” titullu bir çox sənətçi var ki, ən azından aldığı titula belə hörmət
etmir, o titulun sahibi olan xalqın dilinə hörmətsizlik edir.
Yaxud, xüsusi fərman
imzalayıb ona belə yüksək adı verən dövlət başşısının
dilimizin qorunması, tətbiqi və inkişafı
ilə bağlı imzaladığı digər fərmana hörmətlə yanaşmır. Eyni sözləri bəzi yüksək rütbəli məmurlar, hətta
hökumət üzvləri haqda da demək olar.
Təsəvvür edin ki, elə hökumət üzvüləri var, Azərbaycan dilində normal
danışa bilmir, danışdığını dinləyənlərin çoxu anlamır. Naziri, tanınmış iş
adamı, alimi, sənətçisi bu gündə olan xalın sabahını düşünəndə adamı çarəsizlik
bürüyür. Fikirləşirəm, görən bu nazirlər, məmurlar, bu tanınmış
adamlar-alimlər, sənətçilər, iş adamları görüşdükləri, münasibət qurduqları
qonşu dövlətlərdən olan həmkarları və ya tanınmışlarla ünsiyyətdə olanda bir zərrə
də olsa özlərinin də bir dövləti təmsil elədiklərini düşünüb təmsil etdikləri
dövlətin dövlət dilində səlis danışa bilmədikləri, ya da danışarkən çoxlu sayda
yabançı kəlmə işlətdikləri üçün azca da olsa utanc hissi keçirirlərmi?
Görən, onlar bircə dəfə
də olsa fikirləşirlərmi ki, Azərbaycanın yox, deyək ki, qonşu dövlətlərin hər
hansı birinin -Rusiyanın,
İranın, Türkiyənin hökumətində təmsil olunsaydılar (bu başqa məsələdir ki, bu adamların çoxu həmin
dövlətlərdə heç vaxt indiki mövqeyə yaxın buraxılmazdılar),
o dövlətin dilinə qarşı belə abırsızlıq, hörmətsizlik edə bilərdilərmi? Bunu
etsəydilər nələrlə üzləşərdilər? Məncə yox. Çünki bu hiisləri keçirsəydilər,
yaxud da düşünsəydilər ən azından dövlət dilinə hər dəfə etdikləri hörmətsizliyi
davam etdirməzdilər. Bir də siz diqqət edin ki, mən ana dili yox,
məhz dövlət dili terminini işlədirəm. Ola
bilər ki, Azərbaycan dili bu adamların (istər nazir,
ya məmur olsun, istərsə də alim, sənətçi,
ya iş adamı) ana dili olmasın.
Azərbaycan dili hətta bu adamların nə ana dili, nə də ata dili
ola bilər. Bu da kimsəni narahat etməməlidir.
Ona görə ki, hər bir Azərbaycan vətəndaşı kimi onların da seçmək, seçilmək
və hansısa vəzifəyə təyin olunmaq haqqı var. Bu dediklərimiz Azərbaycan dili nə
ana, nə də ata dili olan hər bir Azərbaycan vətəndaşının haqqı olduğu kimi, Azərbaycan
dilini bilmək, bu dildə səlis yazmaq və
danışmaq da həmin adamların bir vətəndaşlıq vəzifəsi və borcudu. Dərd
burasındadır ki, dilimizi başqa millətlərə məxsus Azərbaycan vətəndaşlarından
çox, özünü sırf azərbaycanlı,
hələ yeri gələndə özünü aşırı millətçi və dövlətçi sayanlar daha çox korlayır.
Bu amerikalı ingilis Virgil Tannerin danışığından
sonra mənim cavab axtardığım ikinci sual isə televiziyalarda çalışanlarımızıla
bağlıdır. Kütləvi informasiya vasitələri ədəbi dilin formalaşmasında həllidici
vasitədir. Xüsusi ilə də televiziya kanalları, internet televiziyaları və
saytlar. Lakin çox acınacaqlı haldır ki, dilimizin qorunmasında, tətbiqində və inkişaf etməsində, eyni zamanda ədəbi dilin
formalaşmasında mühüm rol oynamalı olan bu KİV quruluşları, dilimizi qorumaq və
inkişaf etdirmək, ədəbi dili formalaşdırmaq bir yana, dilimizin amansıscasına məhvinə istiqamətlənmiş fəaliyyət
göstərirlər. Bu hal təkcə birbaşa, canlı yayımlarda olsaydı,
bəlkə də kanallara müəyyən
qədər haq vermək olardı ki, kanal yönəticiləri və ya aparıcıları kimlərinsə
köntöy danışığına ya da ifadələrinə müdaxilə
edə bilmir. Ancaq bu halın video yazılarda da və daimi baş verməsi, bu
abırsızlıqların (biabır abırsız deməkdir) qarşısının alınmamasına yönəlik heç
bir əlamətin görünməməsi bu işin sistemli və düşünülmüş oması fikrini yaradır.
Yuxarıda da qeyd etdik ki, dilimizlə bağlı çoxlu sayda qanun, dövlət proqramı olması, fərman
və sərəncam verilməsi yetərli olmayıb. Bütün yuxarıda deyilənləri nəzərə alaraq
düşünürəm ki, bəlkə Dövlət dilinə qarşı olan bu saymazlığın, hörmətsizliyin və
abırsızlığın qaşısını almaq üçün ayrıca Dil qurumu yaradılmalı, ya da AMEA-nın
Dilçilik İnstitutunun səlahiyyətləri genişləndirilərək Dövlət dilini umursamayanlara, saymazyana
yanaşanlara qarşı ciddi tədbirlər görülməlidir?! Bəlkə bütün nazirlik, komitə,
baş idarələrdə, Ali təhsil müəssiələrində, böyük şirkətlərdə Dövlət dilinin işlədilməsi,
inkişaf etdirilməsi və bir çox yabançı sözün qarşılığının tapılması və ya yeni
sözlərin yaradılması üçün bir struktur (bu Dil şöbəsi, Terminologiya şöbəsi və
s. adlana bilər) yaradılmalıdır?!
Yaxud hər bir
adamın işə götürülməsində əsas tələblərdən biri də Dövlət dilində səlis və sərbəst
yazıb oxuya bilməsi olmalıdır?!
Bu dediklərimin hansı olmalıdır, ya olmamalıdır,
yaxud da bəlkə hamısı olmalıdır, bilmirəm, bu dövlət orqanlarının işidir. Amma
onu bilirəm ki, əgər bu sürətlə və genişmiqyaslı şəkildə ki dilimiz korlanır,
təcili tədbirlər görülməsə, tezliklə
dilimiz həftəbecərə çevriləcək. Bugünə qədər olan istər tarixi, istər elmi və
istərsə də bədii ədəbiyyatı oxuyub başa düşmək üçün gələcək nəsillərimizin
xüsusi dilmanca, yaxud da lüğətlərə ehtiyacı olacaq.
Bünyamin Qəmbərli