Fevral ayının 13-də Sumqayıt Dövlət Universitetində “AzəriKimya” İstehsalat birliyi və  Azərbaycan Dövlət Neft şirkətinin İnsan Resursları Departamentinin aparıcı əməkdaşları Kimya, Mühəndislik,  Fizika və Elekroenergetika fakültələrinin sonuncu kurs tələbələri ilə müəssisiələrdə gənc mütəxəssislərin işə qəbulu ilə bağlı görüş keçirdi.

 Tədbirdə Azəri Kimya İstehsalat birliyinin nümayəndələri Firudin Mustafayev, Qiyas Məmmədov, Rövşən İsgəndərov, İnsan Resursları Departamentinin nümayəndələri Səadət Nurməmmədova və Cavid Umbayev iştirak etdilər.

Universitetin Elm və İnnovasiyalar üzrə prorektoru, professor Ramazan Məmmədov görüşü açaraq tədbir işrirakçılarını universitetin rektoru Elxan Hüseynovun adından salamladı və onları universitetdə gördüyündən məmnun olduğunu bildirdi. Sonra sözü “AzəriKimya” İstehsalat Birliyinin icraçı direktorunun kadr, rejim və informasiya texnologiyaları üzrə müavini Xalıq Mustafayeva verdi.

Xalıq Mustafayev çıxışında təhsil, elm və sənaye sahəsində respublikamızda görülən böyük işlərdən danışdı. Bu gün ölkəmizdə elm siyasətinin əsasını qoyan Ümummilli lider Heydər Əliyevin kursunu uğurla və ləyaqətlə davam etdirən Möhtərəm Prezidentimiz cənab İlham Əliyev son illər ölkəmizdə elmin inkişafı, elmi-texniki potensialın qorunub saxlanılması və modernləşdirilməsi, elm və təhsil sahəsində yüksək ixtisaslı kadrların hazırlanması, onlara daim qayğı göstərilməsi, cəmiyyətdə alimlərin, elm və təhsil işçilərinin nüfuzunun artırılması və Azərbaycanda alınmış elmi nəticələrin xaricdə tanıdılması sahəsində bir sıra mühüm qərarlar qəbul etmişdir. Elm və təhsilin inkişafına dövlət səviyyəsində göstərilən bu qayğı, əslində dövlətçiliyin möhkəmləndirilməsi və xalqın milli-mədəni tərəqqisinə və rifah halının yüksəldilməsinə xidmət edən siyasətin tərkib hissəsi kimi qiymətləndirilməlidir. Təsadüfi deyil ki, XXI əsr YUNESKO tərəfindən elm və təhsil əsri adlandırılmışdır. Bu baxımdan hazırda elm və təhsilin əlaqələndirilməsi, bir-biri ilə inteqrasiya olunmuş şəkildə, müasir texnologiyaların və innovasiyaların tətbiq edilməsi yolu ilə inkişaf etdirilməsi ən aktual və prioritet məsələdir. Bu gün Azərbaycanda məhz bu istiqamətləri əhatə edən dövlət siyasəti aparılır, iqtisadi potensialı intellekt kapitalına çevirmək sahəsində mühüm işlər görülür.

Azərbaycan Respublikası Prezidentinin 2013-cü il 24 oktyabr tarixli Sərəncamı ilə təsdiq edilmiş “Azərbaycan Respublikasında təhsilin inkişafı üzrə Dövlət Strategiyası”nda qeyd edildiyi kimi, “son illər aparılan sosial-iqtisadi siyasət nəticəsində ölkədə yüksək inkişafa nail olunmuş, əhalinin maddi rifahı xeyli yaxşılaşmış, yoxsulluğun səviyyəsi minimuma endirilmiş və Azərbaycan Respublikası orta gəlirli ölkələr sırasında yer tutmuşdur. Gerçəkləşdirilən islahatlar və genişmiqyaslı infrastruktur layihələri sosial-iqtisadi həyatın yenidən qurulması və davamlı inkişafı üçün şərait yaratmışdır.

 Azərbaycan Respublikasının Prezidenti cənab Ilham Əliyevin 10 yanvar 2014-cü il Sərəncamı ilə 2014-cü ilin Azərbaycan Respublikasında “Sənaye ili” élan edilməsi də xüsusi əhəmiyyət kəsb edir. Sərəncamda qeyd edilir ki, “Ötən əsrin 70-80-ci illərindən başlayaraq Azərbaycanda sənayeləşmə siyasəti geniş miqyasda həyata keçirilmiş, yüzlərlə sənaye müəssisəsi inşa edilmiş, bu sahədə güclü potensial yaradılmışdır. Son on ildə Azərbaycan iqtisadiyyatının bütün sahələrində olduğu kimi, sənayenin inkişafında da böyük uğurlar qazanılmış, sənaye məhsulları istehsalının həcmi 2,7 dəfə artmışdır. Bu müddət ərzində rəqabətqabiliyyətli müasir sənaye sahələrinin yaradılması, sənayenin infrastruktur təminatının yaxşılaşdırılması sahəsində çoxsaylı layihələr icra edilmiş, yeni iş yerləri açılmış, ölkə sənayesi yeni inkişaf mərhələsinə qədəm qoymuşdur. Hazırkı mərhələdə müasir çağırışlar və yeni təşəbbüslər nəzərə alınmaqla sənayenin modernləşdirilməsi və qeyri-neft sənayesinin şaxələndirilməsi məqsədi ilə bir sıra tədbirlərin həyata keçirilməsi, o cümlədən mövcud təbii və iqtisadi resursların təsərrüfat dövriyyəsinə cəlb edilməsi, ənənəvi sənaye sahələri ilə yanaşı, yeni prioritet istehsal sahələrinin, sənaye parklarının yaradılması, regionlarda sənaye potensialının gücləndirilməsi, sənayenin innovasiyalar əsasında inkişafını təmin edəcək imkanların formalaşdırılması zəruridir”. Sərəncamın icrasının təmin edilməsi məqsədi ilə xüsusi tədbirlər Planı hazırlanmışdır. 

Tədbirlər Planının icrası ilə əlaqədar ali təhsil müəssisələri qarşısında da bir sıra vəzifələr qoyulur. Bu gün universitetlər istehsal və sənaye müəssisələrini səriştəli kadr potensialı ilə təmin etmək üçün, “Azərbaycan Respublikasında təhsilin inkişafı üzrə Dövlət Strategiyası”nda qeyd edildiyi kimi, iqtisadiyyatda tələb olunan bilik və bacarıqların aşılanması ilə bərabər, vətəndaşın gələcək həyata və cəmiyyətə inteqrasiyasına hərtərəfli hazırlığı kimi vəzifələri yerinə yetirməlidir ki, bu da elm-təhsil-istehsalat əlaqələrinin genişləndirilməsini və işəgötürən maraqlı tərəflərin bu və ya digər dərəcədə təhsil prosesində iştiraka cəlb edilməsini tələb edir. Son illər ərzində bu baxımdan Sumqayıt Dövlət Universitetində artıq bir sıra tədbirlər həyata keçirilmişdir və növbəti illərdə də bu sahədə fəaliyyətin davam etdirilməsi nəzərdə tutulur. Hazırda inkişaf etmiş dünya dövlətlərində universitetlər ilk növbədə elm mərkəzləri kimi formalaşır və təhsil prosesi elmi innovasiyalar əsasında qurulur. Beləliklə universitetlər cəmiyyətin tələbat və ehtiyaclarını ödəmək üçün elm ”“ təhsil mərkəzləri kimi formalaşır. Qloballaşan dünyaya inteqrasiya etmək üçün Azərbaycanda da bu gün universitetlər belə bir missiyanı yerinə yetirməlidir. Bu baxımdan bu gün universitetlər sənaye müəssisələri, texnoparklarla  sıx əlaqəli olmalıdı  universitetlərin bu müəssisələrdə  kadr potensialından, maddi-texniki bazadan və elmi mühitdən istifadə imkanları  daha da genişləndirilməlidir.

Xaliq Mustafayev  qeyd etdi ki, bizim istehsalat birliyində, müəssisələrimizdə çalışan mütəxəsisilərin çoxu keçmiş Azərbaycan Sənaye İnstitutunun, yəni SDU-nun məzunlarıdır. Hal-hazırda birliyimiz 5 univesitetlə əlaqələr qurub. Sizin Sumqayıt Dövlət Universiteti ilə də geniş elmi əlaqələrimiz var. Bugünkü tədbirdə məqsədimiz də dörd istiqamət üzrə, yəni enetgetika, mexanika, kimya texnologiyaları və mühəndislik üzrə sonuncu kurs tələbələri arasında işə qəbulla bağlı ilkin seçim etməkdir. Əməkdaşlarımız , Kimya, Mühəndislik , Fizika və Elekroenergetika fakültələrinin sonuncu kurs tələbələri arasında şifahi imtahan keçirəcək və imtahandan uğurla keçənlər  Azərbaycan Dövlət Neft şirkətinin İnsan Resursları Departamentində test üsulu ilə imtahan verərək istehsalat müəssisələrində işləmək hüququ qazanacaqlar. 

Beləliklə, üç fakültənin sonuncu kurs tələbələri arasında şifahi imtahan keçirildi. Tədbiri keçirən nümayəndələr tələbələrin cavablarından razı qaldılar və onlara qarşıdakı seçim imtahanlarında uğurlar azuladılar.