Penitensiar Xidmətin rəis müavini general Hüseyn Əlixanov hüquq müdafiəçisi Leyla Yunusun saxlanma şəraitindən bəhs edərkən maraqlı fikirlər səsləndirib. General bildirib ki, bu gün Azərbaycan həbsxanalarında dustaqlara o qədər yaxşı baxırlar ki, bu, həmin dustaqları yenidən cinayətə sövq edə, həbsxanaya qayıtmasına sitimul verə bilər.
Bəli, nə qədər qəribə olsa da, H.Əlixanov necəliyi şərhsiz də hər kəsə bəlli olan həbsxanaları əsl cənnət kimi vəsf etməkdədir. H.Əlixanovun dediklərinə inansaq, bu gün ən yaxşı istirahət mərkəzləri belə bütün parametrlər üzrə ölkə həbsxanalarına böyük fərqlə uduzmaqda, ciddi şəkildə geri qalmaqdadır. İş o yerə çatıb ki, Penitensiar Xidmətin generalı bu cür baxımın dustaqları həmişəlik həbsxanaya bağlaya biləcəyindən duyduğu narahatlığı ictimaiyyətlə bölüşməyi lazım bilir.
Bəli, H.Əlixanovun açıqlaması ilə tanış olan hər kəsin içində bir anlıq da olsa dustaq olmaq, həbsxanadakı cənnətlə tanış olmaq istəyi oyanır. İnsana elə gəlir ki, bu gün yaşadığımız dünyada həsəd aparılması gərəkən yeganə kateqoriya ölkə həbsxanalarındakı dustaqlardır. O dustaqlar ki, onların arasında siyasi məhbuslar, müxalifət düşərgəsinin nümayəndələri də yetərincədir.
Əslində H.Əlixanovun məlum açıqlaması çoxlarına qəribə görünsə də, bu açıqlama bir çox problemlərin həllinə yardımçı olmaqla yanaşı, bəzi müammaların cavabı kimi qiymətləndirilə bilər.
Məsələn, H.Əlixanovun açıqlamasından sonra bir çoxları kimi məndə də belə bir yəqinlik yarandı ki, sən demə müxalifət təmsilçilərinin uzun illərdir ki, həbsxana yolunu su yoluna döndərməsinə səbəb həbsxanalardakı cənnət, bu cənnətin insanı vəcdə gətirən gözəlliyi olub. Tikanlı məftillər arasında gizlənən bu cənnəti görmək üçün silah qaçaqmalçılığından tutmuş narkotik alverinə qədər hər cür pisliyə bulaşan, hətta xarici ölkə agenturasına belə həvəslə işləyən müxalifət nümayəndələri vaxtaşırı sakini olduqları cənnətdən daha çox yararlanmaq üçün əfv ərizəsi belə yazmır, bununla da həbsxanada qalmağın onların marağına cavab verdiyini təsdiqləyrilər. Bu azmış kimi onları cənnətə qonaq etdikləri üçün təşəkkür etməli olduqları hakimiyyətin ünvanına sərt tənqidlər və qorxunc ittihamlar səsləndirən müxalifət nümayəndələri, xeyirxahlıq qarşılığında minnətdarlıq etmək kimi elelementar mədəniyyətə belə sahib olmadıqlarını isbatlamaqdadır.
H.Əlixanovun açıqlaması aşkar şəkildə göstərdi ki, həbsxanaya düşmək müxalifətin öz arzu və istəyindən qaynaqlanır və bunun hakimiyyətin repressiya siyasəti kimi dəyərləndirilməsi nəinki əsassız, həm də nankorluqdur.
H.Əlixanovun həbsxanalarımızdakı xoşbəxt yaşamla bağlı fikirləri Əmək və Əhalinin Sosial Müdafiəsi Nazirliyi qarşısındakı bir sıra problemlərin həlli baxımındna da açar rolu oynaya bilər. Məsələn, adıçəkilən nazirlik sosial durumu ağır olan ailələri sosial müavinətlə təmin etmək əvəzinə həbsxanalarda yerləşdirə bilər ki, bu da problemin birdəfəlik və daha köklü həlli sayıla bilər. Təbii fəlakətlər və ya bundan heç də az zərərli olmayan məmur tamahkarlığı nəticəsində evsiz qalan şəxslərin mənzil problemini də onları həbsxanalara yerləşdirməklə həll etmək mümkündür.
Bundan başqa, vətən qarşısında əlahiddə xidmətlərə malik şəxsləri, milli qəhrəmanları, dünya və olimpiya çempionlarını, fəxri adlar və medallarla təltif edilən ziyalı və məmurları, incəsənət və mədəniyyət xadimlərini də hörmət və ehtiram əlaməti olaraq bu həbsxanalara qısa və ya uzun müddətə qonaq etmək olar. Bu, onların gələcək fəaliyyəti üçün sitimul verməklə yanaşı, dövlətin onlara qayğısının da ən bariz nümunəsi olar. Milli valyutamızın xaricə daşınmasının qarşısını almaq üçün məmur kontingenti və onların harınlamış nəvə-nəticələrinin də Baham adaları, Qərb və uzaq Amerika ölkələrinə səfərlərinə qadağa qoymaq, onları öz istirahətlərini Azərbaycan həbsxanalarında keçirməyə həvəsləndirmək də iqtisadi baxımdan olduqca səmərəli ola bilər.

Bu baxımdan H.Əlixanovun həbsxanalarımızdakı cənnətlə bağlı açıqlaması mövcud problemlərin həlli baxımından müstəsna əhəmiyyət kəsb edir. Yəqin ki, hakimiyyət ən azından ümummilli maraqlar naminə bu açıqlamadakı fikirləri hərtərəfli təhlil edəcək, bu mülahzələrdən mümkün qədər yararlanacaqdır.
Madam ki, ABŞ, Fransa, Almaniya kimi sivil ölkələrin belə terror hücumları və təbii fəlakətlər fonunda getdikcə cəhənnəmə çevrildiyi dünyada qeybə çəkilən cənnət məhz bizim ölkəmizdə - həbsxanalarımızda peyda olub, bundan hökmən yararlanmaq lazımdır. Bunun əksi demək olar ki, hər gün ABŞ-a belə səxavətlə məsləhət və tövsiyyələr verən hökumətimiz üçün bağışlanılmaz bir səhv olardı.

Seymur Əliyev
e-mail: [email protected]