"2014-cü ilin payız sessiyasının qanunvericilik işləri planına çox mühüm qanun layıhələri salınıb.Onların arasında “Silahlı qüvvələr haqqında”, “Hərbi qulluqçuların statusu haqqında”, “Elm haqqında” ,”Kənd təsərrüfatı kooperasiyaası haqqında” qanunları daha vacib hesab edirik.

Bununla yanaşı deputat həmkarım Vahid Əhmədovla payız sessiyasında daha 3 qanun layıhəsinin də müzakirəyə çıxarılmasını zəruru hesab edirik.

Bunlardan birincisi “Rəqabət Məsəlləsi”dir. Əgər bu Məcəllə hələ 2006-cı ildə Milli Məslisdə iki oxunuşdan keçibsə və ondan sonrakı illərdə hər il yaz və payız sessiyalarının iş planına salınıbsa, deməli normal kondisiyada işlənilib və bunun qəbulunun sürətləndirilməsini zəruri hesab edirik. Rəqabət Məsəlləsi ona görə vacibdir ki, məhz bu Məcəllə bazardakı rəqabət münasibətlərini müəyyənləşdirəcək, inhisarçılıq meyllərinin sındırılmasında hüquqi baza rolunu oynayacaq. Birbaşa təsir edə bilmsə belə, bazarda süni qiymət artımının qarşının alınmasından ötrü yeni işlək mexanizmin tətbiq edilməsinə imkan yaradacaq. Pərakəndə əmtəə dövriyyəsi bazarında malların qiymətinin süni surətdə cəmi bircə faiz artırılması Azərbaycan ailələrinin büdcəsinə ildə 180 milyon manata qədər ziyan vurur. Heç də uzaq olmayan keçmişdə- cəmi bir neçə il bundan əvvvəl ölkəmizin ÜDM-nin 60-70 faizi neft sektorunun, 30-40 faizi qeyri-neft sektorunun payına düşürdü. İndi bu nisbət dəyişib: qeyri neft sektoru ölkə ÜDM-nin 60 faizə qədərini verir, 3 ildən sonra 72 faizi verəcək. Amma bu kəmiyyət ifadələrinin keyfiyyət tərəfinə də diqqəti artırmaq lazımdır. Çünki qeyri- neft sektorunun payı 60 faizə çatsa da, xarici ticarətdə, ixracatımızda hələ heç 10 faizə belə çatmayıb. Neftdən kənar sahələrin məhsullarının eksport imkanlarını artırıb daha çox valyuta qazanmaqdan ötrü, digər şərtlərlə yanaşı. həm də onların rəqabət qabiliyyətini də artırmaq lazımdı. Ona görə də rəqabət qabiliyyətli məhsul istehsalının stimullaşdırılmasının hüquqi bazası yaradılmalıdır.
İkinci qanun layihəsi reklam haqqındadır. Reklam bazar iqtisadiyyatının mühüm atributudur. Şirkətlər öz mal və xidmətlərini davamlı şəkildə reallaşdırılmasını təmin etməkdən ötrü öz gəlirlərinin 3-5 faizi, bəzi hallarda hətta 20 faizini belə reklama yönəldirlər. Bizdə reklam işinin nə dərəcədə bərbad vəziyyətdə olduğunu görməkdən ötrü Bakı küçələrini 15 dəqiqə gəzmək kifatətdir. Bütün dillərə hörmət və ehtiramla yanaşı, həm də Azərbaycan qanunvericiliyinə görə, reklam əvvəlcə Azərbaycan dilində olmalıdır. Amma bir çox hallarda reklamlar birbaşa xarici dillərdədir və ana dilimizə hörmət olunmur. Reklam sahəsində dil, estetik, dizayn, yerləşdirmə və sair bu kimi problemləri həll etməkdən ötrü reklam haqqında yeni qanun qəbul edilməsini zəriri hesab edirik.
Üçüncü qanun Təhsil kreditləri haqqındadır. Azərbaycanda ali təhsil alan hər 10 gəncdən 7-ci ödənişli qaydada təhsil alır. Təhsil haqqları 900-450 manat arasındadır. Ayda 440 manat maaş alan orta statistik azərbaycanlı, 170- 300 manat arasında maaşı olan büdcə təşkilatlarında çalışan insanlar öz övladlarının ortalama 2500-3000 manatlıq təhsil haqqını necə ödəsin? Nəticədə ali məktəbə daxil olanların bir hissəsi təhsili yarımçıq qoymalı olur. Bu sahədə müxtəlif statistikalar var. Onların birinə görə, ötən il 8945 nəfər təhsil haqqını ödəyə bilmədiyinə görə ali məktəblə vidalaşmalı olub, 10630 nəfər isə elə həmin səbəbdən akademik məzuniyyət götürməli olub. Azərbaycan hökuməti bu xoşagəlməz halların qarşısını almaqdan ötrü ya təhsil krediti haqqında qanun qəbul etməlidir, ya da təhsili pulsuz etməlidir, hansı ki, bu gün bəzi Avropa ölkələri bu istiqamətdə addımlar atmaqdadır. Niyə 20 minə yaxın gəncin həyatını məhv etməliyik? Bu məsələ ətrafında düşünüb ciddi addımlar atmalıyıq."