Millət vəkili, Bütöv Azərbaycan Xalq Cəbhəsi Partiyasının sədri Qüdrət Həsənquliyev Moderator.az-a sensasiya hesab olunacaq bəzi açıqlamalarla zəngin geniş müsahibə verib. Onunla söhbətin birinci hissəsini oxuculara təqdim edirik:
“Şadlıq saraylarında rüsvayçı vəziyyət yaranıb. Xaricilər də toy edir, masaya uzağı 3 növ yemək gətirilir və bununla da məsələ bitir. Amma bizdəki şadlıq saraylarının lobbiçiləri buna imkan vermir. Mən qardaşımın oğluna toy etmək istəyərkən özüm bir neçə şadlıq sarayına adam göndərdim. Açıq dedilər ki, bizdə adambaşına 50 manatdan aşağı hesab yoxdur. Özü də musiqi və güllər, bəzi dekorasiyalar və bir çox mənasız əlavələr qiymətə daxil deyil. Yəni elə edilir ki, az qala adambaşına 100 manata çıxır. Heç nədən çəkinmədən deyirlər ki, ya bu qiymətlə razılaşmalısan, ya get başqa şadlıq sarayı tap. Ona görə də müvafiq qurumlar tərəfindən reydlər, monitorinqlər keçirilməlidir. Biri toy edir və yaxın tanış-biliş, qohum-əqrəba gedib toya nəmər salır ki, bu gənc ailəyə nədəsə kömək edəsən. Amma camaatın yeni ailəyə etdiyi köməyi restoran sahibi mənimsəyir. Elə olur ki, yığılan pul restoranın xərcini ödəmir və hətta bəzən bəylə-gəlini də saxlayıblar ki, pulu ödəyin sonra gedin. Masanın üstünə 7-8 cür içki gətirilir, sonra da onu toy sahibinin evinə aparmağa qoymurlar. Yaxşı, əgər bu menyunu mən sifariş vermişəmsə və hamısının pulun artıqlamasıyla almısansa niyə vermirsən? Bir sözlə, bu gün şadlıq saraylarında soyğunçuluqdan söhbət gedir və bunun başqa adı yoxdur. Uzun illərdi bu problemlər mətbuatda da müzakirə olunur. Toylarda musiqinin səsiylə bağlı millət cana doyub. Ora dəvət olunan müğənnilərin də əksəriyyəti gətirib disklərini qoyurlar, heç canlarına cəfa basıb oxumurlar. Ona görə də səsi həddindən artıq güclü edirlər ki, heç kim heç nə başa düşməsin. Digər tərəfdən, həmin restoranların sahibləri həmin səsi qəsdən, məqsədyönlü şəkildə ucadan verirlər ki, insanlar durub qaçsınlar. Siz diqqət yetirin, toy başlayandan uzağı bir saat sonra gələnlərin 75 faizi durub gedirlər. Yəni bəyin yaxın qohum-əqrəbasından başqa demək olar ki, heç kim o səs-küyə tab gətirə bilməyərək oradan qaçıb canını qurtarmağı qənimət bilir. Restoran sahibi bunu qəsdən edir ki, camaat axıradək oturub yeməsin və əlavə sifariş verməsin. Yəni bir var 500 nəfərə kabab gətirə, bir də var 350 nəfər artıq çıxıb gedib, o zaman 150 nəfərə gətirir. Hətta bir dəfə bacım uşaqlarının toyunda qardaşım gedib az qalıb davaya çıxısın ki, toy mənimdir, sənə deyirəm musiqinin səsin azalt, ancaq deyiblər ki, bizim işimizə qarışmayın. Bir dəfə də qəsdən musiqini elə aşağıdan verdilər ki, rəqs etmək mümkün olmadı. Bu dəfə də gedib niyə belə etdiklərini soruşanda deyirlər ki, demədiniz səsin az elə? Yəni insanların əsəbləriylə oynayırlar və kimsədən də qorxu-ürküləri yoxdur. Baxırsan bir zala 4 böyük "kalonka"lar qoyublar. Biləsiniz ki, o cür yüksək səs də xərçəng xəstəliyinin törədicilərindən biridir. O cür aşırı səs orqanizmi, əsəb sistemin məhv eləyir və hüceyrlərin parçalanmasını tezləşdirir. Azərbaycanda vüsət alan xərçəngin bir səbəbi də həmin toylardı. Çox təəssüf ki, dəfələrlə cəhd olunsa da bunun tənzimlənməsinə icazə verilmir. Ona görə ki, o restoranların çoxu elə insanlara bağlıdırlar ki, onlar bu cür eybəcərliklərə qarşı tədbir görülməsinə mane olmaq imkanına malikdirlər."