Elşad Xose yenə danışdı və tərbiyəli tərzdə fikirlərini ifadə etmək qabiliyyətindən məhrum olduğunu bir daha ortaya qoydu. Bununla da aydın şəkildə öz yekun mesajını vermiş oldu: “Məndən tərbiyə gözləməyin”. Zatən əvvəldən gözləmirdik. Başqa sözlə, biz heç vaxt bu adda adamı tərbiyə nümunəsi hesab etməmişik. Amma bu dəfə bu adam ictimai platformadan bütün Azərbaycanı təhqir etmişdi və bu üzdən ötəri olsa da, diqqətimizin mərkəzinə düşməyə nail olmuşdu. Adam Azərbaycanın hüznlü günündə İnstagram-da öz hovuz şəkillərini yayıb və altından da “çim-çim” yazmışdı. Buna etiraz edənlərə isə küçə söyüşləri ilə cavab vermiş, şəhidləri və məcburi köçkünləri təhqir etmişdi.

Amma ürəyi soyumayıb, hələ də özünü yolmaqda davam edir - yenidən videomüraciət yayıb, özü də “rəsmi açıqlama” adı ilə! Deyir ki, “öz şəxsi səhifəmdə nə istəsəm, yaza bilərəm”. Görünür, Elşad Xose sosial şəbəkə ilə öz evini səhv salıb. Evdə hansı söyüşləri söyürsə, sosial şəbəkədə də onu yazır. Aydın görünür ki, Xose “sosial” sözünün mənasını bilmir. Bilsəydi, anlayardı ki, sosial şəbəkə ictimai yerdir.

Düzü, onun “gücənə-gücənə” səsləndirdiyi mənasız fikirlər bizi qətiyyən maraqlandırmır. Amma adam bizə daş atacaq qədər yaxınımıza gəlibsə, o zaman burnundan vurub geri qaytarmağa məcburuq.

Belə deyir: “Bakıda olan müxtəlif iki günlük səviyyəsiz saytlar... Məndə burda var ”“ “Bizim Yol”, “sizin yol”, nə bilim, bizim nə.., “gecə.az”, nə bilim “gündüz.az”... Yəni gic-gic saytlar var, müxtəlif, iki günlük, üç günlük, işləri-gücləri reklamda pul tutmaq... Onlar bir qarajda yığılırlar 3-4 nəfər, onların heç ofisləri də yoxdur”.

Xose, “reklamdan pul tutmaq” əskik hərəkətdirmi? Dünyanın və o cümlədən, Azərbaycanın bütün populyar saytları, televiziya və radio kanalları reklam gəlirlərinə söykənir. Reklam fəaliyyəti “restoran meymunluğundan” pisdirmi?.. Getdiyin toyların birində biz də iştirak etsək və sənə nə sifariş versək, can-başla yerinə yetirərsən. Reklam isə sadəcə, müxtəlif  biznes qurumlarının xidmətlərini alıcı auditoriyasına çatdırmaqdan ibarətdir.

“Bizim yol, sizin yol” kimi nitq manevrləri arqument qıtlığının göstəricisidir və el arasında bu cür danışıq tərzinə düşüklük deyilir. Amma biz sənə “elşad xose, gülşad xoşu” demirik? Çünki təbiətimizdə düşüklük yoxdur. Cavablarımızı arqumentlərlə veririk. Aşağıdakı kimi...

Birincisi, insanlar bizə etibar edirlər, inanırlar. Bunun nəticəsidir ki, cəbhədə gərginliyin yaşandığı gündə bizimyol.info saytına 300 mindən artıq İP ünvandan giriş olmuşdu. Genişqolaqlı internet təchizatı zamanı bir İP-dən orta hesabla 3-4 insanın istifadə etdiyini nəzərə alsaq, həmin gün bu saytı bir milyondan artıq insan ziyarət etmişdi. Məlumat üçün deyək ki, Azərbaycanda ən populyar telekanalın gündəlik tamaşaçı auditoriyası bir milyona çatmır. Bizimyol.info hazırda nəinki Azərbaycanda, eyni zamanda Cənubi Qafqazda ən böyük xəbər portalıdır. Bu sayt 15 ildir fəaliyyət göstərən “Bizim Yol” qəzetinin internet ünvanıdır. Burada 20-dək peşəkar jurnalist heyəti çalışır. İşçi heyətimizdə 20-30 illik jurnalistika təcrübəsi olan adamlar var.

İkincisi, sən “çim-çim” edib sərinləndiyin vaxtlarda “Bizim Yol”un əməkdaşı ön cəbhədə idi və baş verənlərlə bağlı birinci mənbə olaraq məlumatlar çatdırırdı. Amma biz heç vaxt özümüzü vətənpərvərlik nümunəsi olaraq təqdim etməmişik. Çünki bununla şəhidlərimizin ruhuna hörmətsizlik edəcəyimizi düşünmüşük ”“ vətənpərvərlik nümunəsi məhz onlardır. Bu gün “Bizim Yol” öz mövcudluğuna görə şəhidlərimizə və Azərbaycan Ordusuna borcludur. Eynilə sən də... Amma sən özün bunu anlamırsan.

Nəhayət, Xose, deyirsən ki, biz 3-4 nəfər olmaqla qarajda fəaliyyət göstəririk, ofisimiz yoxdur... Biz isə deyirik ki, “Bizim Yol” peşəkar fəaliyyətə imkan verən səviyyədə təchiz edilmiş ofisdə fəaliyyət göstərir və əməkdaşları da lazımi təhsilə və təcrübəyə sahib olan adamlardır. Bu məsələdə ya sən yalan danışırsan, ya da biz. O zaman münasibətləri sənin öz texnologiyanla aydınlaşdıraq: Yalan danışanın... Bu sözlərin ardınca, son 4-5 gün ərzində dilinə gətirdiyin bütün söyüşləri sıralayırıq. Özün yaxşı bilirsən, hansı söyüşləri dilinə gətirmisən. Əgər biz yalan danışırıqsa, o söyüşlər bizim olsun, sən yalan danışırsansa, sənin...

İndi isə buyur, gəl redaksiyamıza (ünvan: Mirəli Seyidov küçəsi, 20C, “Royalbank”ın baş ofisi ilə üzbəüz), işçi heyətimizə bax, onlardan biri ilə heç olmasa, 10 dəqiqəlik diskussiyaya tab gətirməyə çalış, bunu bacarmadığını görüncə, get evə, əzizlərinə bax və de: “Mən bu gün başımdan böyük yalanlar danışmaqla özümün söydüyüm çox ağır söyüşləri sizə yedirtdim, mənim əzizlərim. Məni bağışlayın”.