Vergilər Nazirliyinin fəaliyyəti  saytımızda əməlli-başlı polemika mövzusuna çevrilib. Polemika əsasən keçmiş Müdafiə Naziri Rəhim Qazıyevlə iqtisadçı ekspert Elçin Qurbanov arasında gedir. 

Xatırladaq ki, bir müddət əvvəl iqtisadçı ekspertin mülahizələrinə cavab verən eks-müdafiə naziri onu Vergilər Nazirliyinin yarıtmaz fəaliyyətini təmizə çıxarmaqda günahlandırmışdı. Rəhim Qaziyevin bu fikirlərinə Elçin Qurbanov isə açıq məktubla cavab vermişdi. Dünən Moderator.az-ın redaksiyasına yenidən zəng edən Rəhim Qazıyev Elçin Qurbanovun açıq məktubunda dilə gətirdiyi bir sıra məqamlarla razılaşmadığı bildirdi.

Onun sözlərinə görə, Elçin Qurbanov ədalətli mövqe tutmur, sadəcə total talançılığa ədalət donu geyindirməyə çalışır: “Onun digər nazirlikləri günahlandırıb yalnız Fazil Məmmədovu müdafiə etməsi də bununla bağlıdır. Mən ona fakt deyirəm. Deyirəm ki, maşını KİA mağazasından almışam. Orda maşını mənə 26,900 manata satıblar. Həmin maşını Dövlət Avtomobil Müfəttişliyində qeydiyyatdan keçirmişəm və təqdim olunan sənəddə alış qiymətı 9,600 manat göstərilib. Yəni, hardasa maşının qiymətinin 3/2-i vergidən yayındırılıb. Burda gömrüyün günahı nədir? Sözügedən fakt üzrə vergidən yayınma prosesində iki dövlət qurumu yer alır. Onlardan biri maşından vergi tutan Vergilər nazirliyidir, digəri isə maşını qeydiyyata alan DİN-in bir idarəsidir. Gömrük Komitəsini niyə bu işdə məsuliyyətli tutmalıyıq, mənə qətiyyən aydın deyil”.

Rəhim Qazıyev bu sözləri deyərkən məqsədinin heç də Dövlət Gömrük Komitəsini müdafiə etmək olmadığını bildirdi: “Gömrük də süddən çıxmış ağ qaşıq deyil. Ölkənin talan olunmasında onun da rolu digər dövlət qurumlarından heç nəyiylə fərqlənmir. Fəqət mənim dilə gətirdiyim məsələnin gömrüyə heç bir dəxli yoxdur”

Eks-nazirin ən çox acığına gedən isə qarşı-tərəfin korrupsiyanın kökünü toplumumuzun mental dəyərlərində axtarmasındadır. Rəhim bəyin fikrincə, problem mantalitetimizdə yox, reimin mahiyyətindədir ki, sadə vətəndaşa öz haqqı uğrunda mübarizə aparmaq şansı verilmir: 

“Siyasi iradə təmiz toplum olmağımıza zərrə qədər imkan versəydi, heç kim halal loxmasını haramxorlara yedirməzdi. Cəmiyyətimizdə kifayət qədər halallıqla dolanan insanlar var. Niyə onların hakimiyyətdə təmsil olunmasına imkan verilmir, ancaq əliəyrilər önə çəkilir? Niyə vətəndaşların haqlı gileylərinə barmaqarası baxılır? Niyə hüquq pozuntuları ortaya çıxanda kimsə cəzalandırılmır? Bu cür anlayışla çalışan bir rejim, təbii ki, belə cəmiyyət yarada bilər. Heç kim günahı millətdə axtarmasın. Xalqın sadəcə öz hüququnu axıra qədər müdafiə edib layiq olduğu haqqı almaq mexanizmi yoxdur”.

Buna misal olaraq öz yaşadıqlarından nümunələr sadalayan keçmiş Müdafiə naziri bildirdi: 

“Uzun illər ali məktəbdə dərs demişəm. Sovet dövründə ali məktəblər ən rüşvətxor yer kimi tanınırdı. Hakimiyyət orqanlarında təmsil olunan adamların qohumları da mənimlə bir yerdə işləyirdilər. Onar rüşvət aldığı halda mənim kimi ölkənin gələcəyini düşünən ziyalılar bu yola getmirdilər. Müdafiə Naziri olanda da kifayət qədər korrupsiyaya bulaşmaq imkanım olub. Amma nə özüm bu işlə məşğul olmuşam nə də başqalarının talançılığına imkan vermişəm. Bunu məhkəmədə də sübut etmişəm. İnkar edənlər məhkəmə sənədləri qaldırıb baxa bilərlər.

Sizə bununla bağlı iki misal göstərmək istəyirəm. Dünya bazarında qiyməti 112 milyon dollar olan hərbi əmlakı kənar respublikadan Müdafiə Nazirliyinə gətirmişəm və bunun üçün öz əlimlə yarim milyon dollar pul vermişəm və həmin vəsait Prezidentin xüsusi büdcəsindən ayrılıb. İstəsəydim, heç olmasa o qədər də özüm mənimsəyə bilməzdimmi?

Yaxud yenə dünya bazarında qiyməti 10-15 milyon arasında dəyişən Su-25 hərbi döyüş təyyarəsini Rəsul Quliyevin iştirakı ilə Gürcüstandan alıb Azərbaycana gətirmişik. İkisinin qiyməti ən azı 20 milyion dollar edirdi. Həmin təyyarələri isə 9 milyona almağa razılaşmışıq. Sonra razılaşdığımız qiymətdən sadəcə 1milyon 700 min dollar ödəmişik- bir hissəsini nəqd şəkildə, bir hissəsini neftlə dəyişmişik. 7,300,000 dollarını isə verməmişik. Dost-tanışımızın köməkliyiylə borcumuzu silmişik. Artıq pul büdcəmizə qalıb”.

Sonda Rəhim Qazıyev israrla bu cür mətləblərin üzərinə getməyinin səbəbini açıqladı: “Mənim məqsədim Vergilər nazirini ittiham etmək deyil. Nə şəxsən ondan bir pislik görmüşəm, nə də onun düşmənləriylə əlaqəm var. Məqsədim gizlədilməsi mümkün olmayan total talançılığın qarşısını almaq və ölkənin rifahının yüksəldilməsində birinci dərəcəli məsul şəxs olan dövlət başçının real mənzərəni görməsinə kömək etməkdir”.

P. S. Keçmiş nazir həmçinin onu da bildirdi ki, bu məsələni daha geniş platformada müzakirə edə, hətta lazım gələrsə Elçin Qurbanovla debata çıxa bilər. Redaksiyamız bu mesajı iqtisadçı ekspertə çatdırdı, Elçin bəy də təklifi qəbul etdi. Sadəcə səhhətində yaranmış narahatçılığa görə bir həftə vaxt istədi.