Körpə uşaq anası təzyiqlər altında olduğunu iddia edir...
Ağsu rayonu Dəllər kəndində yaşayan 11 may 1986-cı ildə anadan olmuş Məmmədova Afaq Abid qızı tərəfindən redaksiyamiza ərizə daxil olub. Eyni zamanda Afaq Məmmədova redaksiyamıza gələrək başına gələn olayları da nəql elədi. Biz də Afaq Məmmədovanın ərizəsində qeyd etdiklərini olduğu kimi təqdim etməyi qərara aldıq.
İk olaraq onu da qeyd edək ki, Afaq Məmmədova redaksiyamıza yazılı müraciət etməklə bərabər, eyni zamanda ölkə prezidenti İlham Əliyevə, ölkəmizin birinci xanımı, YUNESKO və İSESKO-nun xoşməramlı səfiri, millət vəkili, Heydər Əliyev Fondunun prezidenti Mehriban xanım Əliyevaya, baş prokuror Zakir Qaralova da müraciət edib:
"Nəzərinizə çatdırım ki, mən Məmmədova Afaq Abid qızı 2012-ci ilin iyulunda Suraxanı rayonu, Yeni Günəşli qəsəbəsi “AB” yaşayış massivi bina 8, mənzil 87-də yaşayan Hüseynov Eldar Əli oğlu ilə ailə qurdum. Birgə nigahımızdan 2013-cü ilin mayında bir oğlan övladımız dünyaya gəldi. 2013-cü iyunun 14-də həyətdə uşaq gəzdirərkən yoldaşım məni evə çağırdı və anasının pulunun yoxa çıxdığını bildirdi. 15 iyun 2013-cü ildə yoldaşımla işə gedərkən qayınanam Hüseynova Vadimə, qaynım Hüseynov Elçin və İctimai Televiziyada polis serjantı işləyən və poqonundan istifadə edən digər qaynım Hüseynov Elmir məni aldadaraq 33-cü polis bölməsinə apardılar. Orada Əli və Tamerlan adlı şəxslərlə məni bir otağa salıb izahat yazmağı tələb etdilər. Heç bir izahat vermədim və mənə bildirdilər ki, qayınanam Hüseynova Validə mənim haqqımda şikayət ərizəsi verib və məni oğurluqda günahlandırır.
Bu pulu mənim götürdüyümü iddia edir. Polislər də mənə zorla deyir ki, boynuna al ki, 9450 manat pulu sən götürmüsəm. Mən izahat yazmadım və hamımız bölmədən çıxıb gəldik. Qayınanam evə gəldikdə bildirdi ki, Əli və Tamerlan adlı şəxslərə 1000 manat verib ərizəni 33-cü bölmədə bağladıb. O pul da yoldaşımla uşağımızın doğulmasına yığdığımız pul idi. Mən həmin gündən oğlumu götürüb ata-anamın yanına gəldim. Cavan gəlin, ay yarımlıq körpə ilə qaldım bölmə və idarələrdə. 2013-cü ilin 15 oktyabrında Suraxanı rayon Polis İdarəsindən mənə zəng gəldi ki, qayınanam baş idarəyə mənim haqqımda yenə şikayət verib. İşin istintaqda olması barədə məlumat verdilər. İşin istintaqını Əflatun Səlimov araşdırırdı və nəticədə mən izahat verdim və bu dəfə pul artaraq 14500 manat oldu. Ay yarım Suraxanı rayon Polis İdarəsinə gedib-gəldim körpə uşaqla, burda da söhbət yekunlaşdı.
Dekabr ayında DİN-dən Fərid adlı şəxs mənə zəng vuraraq nazirliyə gəlməyimi xahiş etdi. Səhərisi gün getdim söhbət etdik, evə qayıtdım. 2014-cü il mart ayının 1-də Bakı şəhəri Baş Mütəşəkkil Cinəyatkarlıq İdarəsindən müstəntiq Ramil Əliyev mənə zəng vuraraq idarəyə gəlməyimi tələb etdi. Mən ona deyəndə ki, körpə uşaqlıyam, gələ bilmirəm, mənə “gələ bilmirsən gətirməyin yolunu bilirik” dedi. İdarəyə 9 aylıq oğlum qucağımda getdim və məni yağışlı havada çöldə saxladı, uşaqla izahat vermək olmaz dedi, qayıt get uşağa adam taparsan, sonra gəlib izahat verərsən söylədi. Səhərisi gün uşağı qohuma verib getdim. Saat 10-da izahat verməyə girdim, axşam saat 19-da ordan çıxdım.
Mənə yalandan izahat verdiyimə görə həbs olunacağım bildirildi. Qol çəkdirdilər. Qayınanam, qaynım, yoldaşım hər dəfə ayrı-ayrı izahat verdilər. Bu idarədə isə pulun miqdarı 18 min oldu. Müstəntiqə sual verdim ki, “bəs bu qanundursa, bir ana və 3 oğlu necə qanuna zidd gedib 3 dəfə ayrı-ayrı izahat yazırlar?”. “Öz işinə qarış” deyib sualdan yayındılar. Artıq atılan şərlərə dözmədim Ağsu rayon Məhkəməsinə nikahın ləğv olunması barədə ərizə verdim. 2014-cü il mayın 2-si məhkəmə oldu, qarşı tərəf iştirak etmədi. Iyunun 10-u ikinci məhkəmə oldu, gəlmədilər. Növbəti məhkəmə sentyabra təyin olundu. 23 iyul axşam saat 20:18-də Suraxanı İstintaq İdarəsindən bir şəxs mənə zəng edib yenə şikayət ərizəsi olduğunu dedi. Mən qəti şəkildə getməyəcəyimi bildirdim. Məni artıq qayınanam Hüseynova Validə və qayınlarım şantaj edir və uşağı alacaqları ilə hədələyirlər. Bunlar şəhid ailəsi olmaqlarından istifadə edirlər. Mənim şikayətimə biganə qalmamağınızı xahiş edirəm. Azyaşlı uşaqla qalmışam idarələrdə, uşağım xəstədir, baxan yoxdur. Əminəm ki, məni bu çıxılmaz vəziyyətdən qurtaracaqsınız.
Redaksiyadan: Maraqlı olan budur ki, Mütəşəkkil Cinayətkarlığa qarşı Mübarizə İdarəsində Afaq Məmmədovanı neçə saatlarla dindirən əməkdaşlar Afaqın qayınanasının və qayınlarının Suraxanı rayon 33-cü polis bölməsinə verdikləri izahatları, pulun miqdarını araşdırmadan, köməksiz, hüquqlarını bilməyən bir azyaşlı uşaq sahibi ananı bu şəkildə dindirmə altına alırlar. Bu azmış kimi onlara edilən müraciətdə 18 minin hardan yarandığını belə öyrənmək istəmirlər. Yəqin ki, daxili işlər naziri cənab Ramil Usubov Afaq Məmmədovaya qarşı Suraxanı rayon 33-cü polis bölməsində edilmiş haqsızlığı, eyni zamanda MCQMİ-də olunmuş ədalətsizliyi araşdıracaq. Bir vətəndaşa qarşı bu şəkildə davranmaq kimsənin haqqı deyil. O ki, qala hüquq-mühafizə orqanı əməkdaşları ola."
Veteninfo.az