Son vaxtlar Minsk qrupuna yönəlik basqıların miqyası əhəmiyyətli dərəcədə atmaqdadır. Artıq iş o həddə çatıb ki, bu gün Minsk qrupuna qarşı səslənən tənqid və ittihamların sayı Ermənistana qarşı irəli sürülən ittihamlardan dəfələrlə çoxdur. Ictimai-siyasi sferada elə bir ab-hava yaranıb ki, sanki Azərbaycan torpaqlarını zəbt edən və bu gün də işğal altında saxlayan Ermənistan deyil, məhz Minsk qrupudur.
Minsk qrupunu fəaliyyətsizlikdə, xristian təəssübkeşliyi mövqeyindən çıxış etməkdə ittiham edən rəsmi Bakı, bu qurumu erməni işğalının az qala baş müəllifi elan etməkdədir. Halbuki, Azərbaycanın Minsk qrupuna qarşı irəli sürdüyü ittihamların demək olar ki, hər biri onun özünə qarşı istifadə oluna bilər. Məsələn, rəsmi Bakı Minsk qrupunu uzun illərdir ki, problemi ölü nöqtədən bir addım da olsun irəli apara bilməməkdə ittiham edir. Şübhəsiz, bu ittihamın aydın həqiqət olduğu bəllidir. Lakin bunu da unutmaq olmaz ki, Qarabağ probleminin həlli bütüövlükdə Azərbaycan dövləti və xalqının işi olmaqla yanaşı, bu məsələ konkret olaraq iki qurumun ”“ Azərbaycan Ordusu və Azərbaycan diplomatiyasının üzərinə düşür. Deməli, bunca müddət ərzində Minsk qrupu kimi Azərbaycan tərəfi də problemin həllində hansısa uğura nail olmayıb. Halbuki, Azərbaycandan iştirakçı və iddialı dövlət kimi uğur gözləmək daha məntiqlidir.
Rəsmi Bakının Minsk qrupunu xristian təəssübkeşliyində ittiham etməsi də əsassız və gülüncdür. Ən azından ona görə ki, bu gün Yaxın və Orta Şərqə səlib yürüşlərinin təşkil edildiyi orta əsrlər dönəmi deyil. Bu gün hər bir ölkə istənilən məsələdə ilk növbədə öz fərdi marağından çıxış edir ki, Rusiya-Ukrayna qarşıdurması bu həqiqətin isbatıdır. Hansı ki, adıçəkilən dövlətlərin nəinki eyni dinə, hətta oxşar dil və mədəniyyətə malik olduğu hər kəsə bəllidir. Bundan başqa, əgər rəsmi Bakı həqiqətən də hesab edirsə ki, Qarabağ probleminin ədalətli həllinə mane olan əsas faktor məhz xristian təəssübkeşliyidir, o zaman islam dövlətlərinin köməyi ilə bu arqumentə qarşı əks arqument və cəbhə formalaşdıra bilərdi. Çünki bunun üçün Azərbaycanın yetəri qədər vaxtı, manevr imkanı və diplomatik imkanları olub. Xristian təəssübkeşliyi ilə bağlı deyilənlərin real olduğunu hesab etsək, Azərbaycan tərəfinin bu amili neytrallaşdırmaq üçün heç bir addım atmadığı həqiqətini də qəbul etməliyik ki, təkcə bu fəaliyyətsizliyin özü bu gün siyasi hakimiyyətin yuxarı eşalonunda təmsil olunan bütün şəxsləri vətən xaini elan etmək üçün yetərlidir.
Minsk qrupu ilə bağlı səsləndirilən ən gülünc ittihamlardan biri də bu qurumun iri dünya gücləri tərəfindən Azərbaycanı Qarabağın işğalı ilə barışmağa razı salmaq məqsədi ilə yaradılması ilə bağlı deyilənlərdir. Bu, o deməkdir ki, Minsk qrupuna üzv olan dövlətlər ”“ Rusiya, ABŞ və Fransa Azərbaycana birbaşa təsir göstərmək imkanına malik deyil və bunun üçün hansısa dolayı vasitələrdən, uzunmüddətli və ağrılı etablardan keçir. Halbuki, dünya düzənini müəyyənləşdirən bu ölkələr üçün Azərbaycanı nəyəsə razı salmaq və ya vadar etmək üçün heç bir ciddi zəhmət çəkmədən müəyyən gedişlər etmək kifayətdir.
Və ən əsası, unutmaq lazım deyil ki, Minsk qrupu Qarabağ probleminin həllində sadəcə vasitəçidir. Odur ki, ondan yalnız bir vasitəçidən tələb ediləcək qədər nə isə tələb etmək olar.
Azərbaycanın Minsk qrupuna yönəlik tənqidləri ilə bağlı millət vəkili Fazil Mustafanın verdiyi izah mövcud vəziyyəti kifayət qədər aydın izah edir. Millət vəkili öz izahda aşkar şəkildə qeyd edir ki, Azərbaycanın indiki məqamda “gücü çatan” yeganə şey yalnız budur.
Doğrudan da, bu dünyada gücdən məhrum olan hər bir fərd kimi hər bir dövlətin də öz haqqını söz olaraq tələb etməkdən, öz günahını başqasının boynuna biçməkdən və bununla təsəlli almaqdan başqa edə biləcəyi heç nə yoxdur. Bu baxımdan Azərbaycanın Minsk qrupunu tənqid etməklə yanaşı, həm də ona gec də olsa təşəkkür etməli olduğu şübhəsizdir. Yaxşı ki, Minsk qrupu var və yaxşı ki, bizim mənasız, məzmunsuz tənqidlərimizi səssiz-səmirsiz həzm edir. Yoxsa “layiqli” bir günah keçisi tapmaq üçün daha bir neçə il vaxt və enerji sərf etmək məcburiyyəti qarşısında qalacaqdıq.
Seymur Əliyev
e-mail: seymur_dq04@mail.ru
