BAXCP sədri, milət vəkili Qüdrət Həsənquliyevin Moderator.az-a müsahibəsinin ikinci hissəsini təqdim edirik:
Əvvəli-moderator.az/?xeber=47323
Deməyim odur ki, avropalılarda qanunun aliliyi, insan hüquqları yalnız özləri üçündür. Mən də deyirəm ki, bəli, o dəyərlər ki, müstəsna əhəmiyyətə malikdir, onları öz vətəndaşımız və dövlətçiliyimizin inkişafı üçün tətbiq etməliyik. Yəni bizdə də insan haqları yüksək səviyyədə olsa, qanunun aliliyi hər şeydən üstün olsa insanlarımız daha xoşbəxt yaşayar. Amma dövlətin maraqları tələb etsə ki, bu qərarları vermək lazımdır, biz bunu etməliyik. Özü də kimlərəsə xoş gəlmək üçün deyil, milli mənafemiz naminə.
-Son günlər mediada yeri gəldi-gəlmədi çək-çevir
predmetinə çevrilən bir mövzu da Azərbaycanda 5-ci kolonun mövcudluğudur.
Doğrudanmı bu kolon nəzərəçarpacaq və təhlükəsizliyimizi təhdid edəcək gücə
malikdir?
-Düşünmürəm ki, onlar həlledici gücdürlər.
Amma təbii ki, ayrı-ayrı dövlətlərə bağlı adamlar var. Misal üçün, Rusiyaya bağlı
adamlar da var, İrana da, Türkiyəyə də. Baxın, bəzən sanki Türkiyənin Azərbaycandakı
maraqlarını Azərbaycanın öz maraqlarından daha çox müdafiə etmək istəyənlər
var. Niyə? Türkiyədən siyasi dəstək almaq üçün. İranla bağlı də bu cür dəstək
nümayiş etdirənlər də var, Rusiya ilə də. Amma Azərbaycanda 5-ci kolon hesab
edilən qüvvələr elə əhəmiyyətli gücə sahib deyillər ki, Azərbaycanın siyasətini
dəyişə bilsinlər. Nə İranpərəstlər, nə Türkiyəpərəstlər, nə də Rusiyapərəstlər.
Məncə Qərbə xoş gəlmək üçün bu, bəzilərinin daha çox şişirdilmiş şəkildə təqdim
etdikləri qiymətləndirmədir.
-Əvvəllər deyirdik ki, Azərbaycandakı kadr məsələlərində
rəsmi Bakı bu və ya digər formada Moskva ilə razılaşdırılmış davranış sərgiləyir.
Amma artıq indi yavaş-yavaş Ərdoğan Türkiyəsinin də Azərbaycandakı kadr məsələsində
söz sahibinə çevrilməyə başlandığı görsənir. Bunu necə izah etmək olar, Moskva
və Ankara arasındakı balanslaşmamı?
-Mən düşünmürəm ki, Azərbaycanda nə Rusiya, nə
də Türkiyə kadr siyasətinə ciddi təsir etmək gücündədirlər. Desəm ki, bu ölkələrin
heç bir təsiri yoxdur, o da düz olmazdı. Amma bu təsir həlledici deyil. Mən
sizin sualın mahiyyətindən nəyə işarə etdiyinizi anladım. Əgər sonuncu kadr dəyişikliyindən
söhbət gedirsə, mənə elə gəlir ki, Azərbaycan iqtidarı Türkiyənin təzyiqi ilə
hansısa qərarlar qəbul etmədi, sadəcə olaraq Türkiyədə baş verənlərdən ibrət dərsi
götürdü. Amma heç bunu gözləmək də lazım deyildi. Hələ bir neçə il bundan qabaq
parlamentin iclasında şəxsən mən çıxış edərək demişəm ki, baxın, Azərbaycanda vəziyyət
o həddə gəlib çatıb ki, gəncləri, ziyalıları, vətəndaş cəmiyyətində təmsil
olunan xeyli sayda insanı Gülüstan sarayına dəvət edərək 800 nəfərlik bir tədbir
keçirirlər, özü də bu tədbir guya ki, mərhum prezident Heydər Əliyevin doğum
gününə həsr olunub, amma orada üz qabığında Fətullah Gülənin şəkli olan jurnal
paylayırlar, jurnal da Heydər Əliyevə deyil, bütünlüklə Fətullah Gülənə həsr
olunub. Yəni görün bu qüvvələr necə qabağa gediblər ki, onlar risk edərək Heydər
Əliyevin doğum günündə ona qarşı bu cür addım atmağa özlərində cəsarət
tapırlar. Yəni mən hələ o zaman parlament tribunasından həmin həyəcan təbilini
çalmışdım ki, bunlarla bağlı müvafiq ölçü götürülməsə, sonrası heç də yaxşı
olmayacaq. Yəni bu qüvvələr müstəqil deyillər və təlimatla xaricdən idarə
olunurlar. Həmin o Fətullah Gülən Amerikaya bağlı bir adamdır. Vaxtilə
Ərdoğanın hakimiyyətə gəlməyində də Fətullah Gülənin müstəsna xidmətləri olub.
Hətta o vaxt Türkiyə mətbuatı yazırdı ki, Fətullahçıların 4 milyondan 6 milyona
qədər seçici səsləri var və həmin səslər hesabına Ərdoğan ilkin seçkiləri uddu.
Yəni o zaman Gülən-Ərdoğan müttəfiqliyi olmasaydı, AKP təkbaşına hökuməti götürə
bilməzdi. Amma məlum Davos Forumundakı “van minut” qalmaqalından sonra Ankara-Təl-Əviv
münasibətlərində soyuqluq yarananda Fətullah Gülən əslində bir dinçi qüvvə rəhbəri
kimi Ərdoğanı dəstəkləməli olduğu halda tamam əks mövqedə dayandı. Bəlli oldu
ki, o sifarişlə davranır və başqa dövlətlərdən hansı mesaj gəlsə ona uyğun da hərəkət
edəcək. Ona görə də bilmək lazımdır ki, Nurçularla bağlı da lazımı ölçü
götürülməliydi və nəzarət gücləndirilməliydi. Bu gün həmin nurçular etiraf
edilməlidir ki, İlham Əliyevi dəstəkləyirlər. Amma kim zəmanət verər ki, misal
üçün Amerika ilə münasibətlərimizdə gərginlik yaranacağı, yaxud tutaq ki,
Qarabağ məsələsində Azərbaycanın maraqları Amerikanın maraqlarıyla toqquşacağı
halda okeanın o tayından buradakı gülənçilərə komanda gəlsə onlar hansı mövqedən
çıxış edəcəklər? Mən hələ bu məsələni o vaxt ictimailəşdirdim ki, Ərdoğanla Gülən
bir-birinə can deyib, can eşidirdilər. Ona görə də mən deyərdim Azərbaycan
hakimiyyəti Türkiyənin təzyiqindən yox, obrazlı desək, gözü çıxmış qardaşının
aqibətindən nəticə çıxardı. Mən hesab edirəm ki, ümumiyyətlə istənilən xarici
dövlətə bağlı siyasi qüvvələr ifşa olunmalıdır. Yəni ölkədəki bütün siyasi qüvvələr Azərbaycan
xalqına bağlı olmağa borcludurlar.
-Hər zaman Siz parlamentdə məmur özbaşınalığı
barədə də fikirlər səsləndirib ölçü götürülməsinin zərurliyini bildirmisiniz.
Amma görünən odur ki, bir çoxları hətta prezidentin xəbərdarlığına məhəl
qoymurılar.
-Hər halda bir neçə məmurun bəlli səbəblərdən
vəzifədən kənarlaşdırılması sözsüz ki, bir çox məmuru bu istiqamətdə düşünməyə
vadar edib. Amma etiraf edək ki, hətta prezidentin bu kimi açıq mesajlarından
sonra da bu kimi hallar davam edir. Burada bir neçə variant ola bilər. Ya həmin
o məmurların uşaqları çox böyük ehtimalla mətbuatı və televiziyanı izləmirlər,
siyasi həyatla maraqlanmağa vaxt tapmırlar. İkincisi, ola bilər ki, ailədə gedən
söhbətlərdən belə qənaətə gəliblər ki, prezident onların valideynlərini, yaxud
güvəndikləri adamları vəzifədən kənarlaşdıra bilməz, üçüncüsü də ola bilsin məmur
övladları o vaxt evə gəlirlər ki, bu zaman valideynləri yatmış olur. Yəni nə
özləri dünyadan xəbər tutmağa həvəs göstərmirlər, nə də valideynləri bu barədə
onları məlumatlandıra bilmirlər ki, nəyi etmək olar, nəyi olmaz. Yəni eyş-işrət
bolluğu bunları vadar edir ki, hətta dostlarla oturanda da tamam başqa şeylərdən
söhbət edirlər. Amma yenə də hesab edirəm ki, son vaxtlar bir neçə məmurun cəzalandırılması
təsirsiz ötüşməyəcək. Amma məncə bu məsələdə də köklü irəliləyişə nail olmaq
üçün ölkədə qanunun aliliyinə nail olmaq lazımdır. Yoxsa prezident hansısa göstərişi
verir və bir müddətdən sonra o xəbərdarlıq yaddan çıxır. Çox təəssüf ki, bu məmləkətdə
qanunun aliliyi ilə bağlı problem var. Bunun üçün prezident, ayrı-ayrı məmurlar
nə qədər xoşniyyətli olsa belə, müdaxilələri vəziyyəti kökündən dəyişməyə yetməyəcək.
Çox təəssüf ki, son zamanlar bu istiqamətdə atılan addımlar, yəni mayın 30-da vətəndaşlıqla
bağlı qəbul olunan qanun layihəsi qanunun aliliyinin əleyhinə olan cəhdddir.
Çox təəssüf edirəm ki, parlamentin həmin iclasında iştirak edə bilmədim. Həmin
vaxt bir qrup millət vəkili ilə NATO Parlament Assambleyasının tədbirində idik.
Amma parlamentin komitə iclasında mən bu layihənin əleyhinə çıxmışdım və fikirlərimi
də demişdim. Konstitusyaya zidd olaraq vətəndaşın vətəndaş hüquqlarından məhrum
edilməsinə ad tapmaq mümkün deyil. Yeri gəlmişkən, mən indi bir detalı
xatırladacam və bəri başdan deyirəm ki, Azərbaycan hökuməti öz imici üzərində
belə demək mümkünsə əsməlidir. Biz bu yaxınlarda Oqtay Əsədovun rəhbərliyi ilə
Xorvatiyada səfərdə olduq. Orada bizi o qədər yüksək səviyyədə qəbul etdilər
ki, təəccübləndik. Oteldə bizdən soruşurdular ki, sizinlə gələn hansı ölkənin
prezidentidir? Deyirdim ki, prezident deyil, bizim parlamentin spikeridir.
Onlar inana bilmirdilər ki, heç bəzi ölkələrin prezidentləri bu səviyyədə qəbul
olunmur. Yəni adətən motoskletçi kortejindən tutmuş, yolların bağlanaraq böyük
bir təhlükəsizlik tədbirləri və hətta prezident sarayı qarşısında fəxri qarovulun
düzülməsinə qədər addımlar yalnız prezident səfərlərində tətbiq edilir. Bu nəyin
göstərici idi? Bu doğrudan da Azərbaycanın Xorvatiya üçün önəmi və nüfuzunun əlaməti
idi. Yəni deməyim odur ki, ölkənin beynəlxalq aləmdəki nüfuzunu bu cür
konstitusiyaya zidd qanunlarla zədələmək olmaz, əksinə, onun üzərində əsmək
lazımdır. Yaxud biz komitədə Andlı İclaslar institutunun prokurorluğun təqdimatı
ilə ləğv olunmasına baxdıq. Bilirsiniz, 2000-ci ildən qanunvericiliyə daxil
edilmiş bu sənədi 14 ildən sonra tətbiq etmədən yararsız hesab edərək
çıxarılmasına təşəbbüs edilir. Axı bunun yararsız olduğunu hardan bildiniz? Bu
qanun işlədi ki, yararlı-yararszı olduğunu da görək? Axı heç olmasa bunu bir
pilot layihə kimi ən azından bir regionda tətbiq etmək olardı, xeyiri-zərəri
bilinərdi. Amma heç tətbiq olunmamış onu çıxarıb tulladılar kənara. Halbuki
andlı iclaslar Konstitusiyanın 55-ci maddəsinə görə də xalqın iradəsinin ifadəçisidir.
Konstitusiyaya görə Azərbaycanda hakimiyyəti xalq formalaşdırır. İcra hakimiyyətinin
başçısını-prezidenti xalq özü seçir, qanunverici hakimiyyəti də xalq seçir.
Hakimiyyətin üçüncü qolu olan məhkəmə hakimiyyətində də vətəndaşların
iştirakında məhz andlı iclaslarda bir şans idi, indi vətəndaş bu institutun ləğv
olunmasıyla həmin imkandan da məhrum edildi. Ona görə də təəsssüf edirəm ki,
son vaxtlar vətəndaşların hüquq və azdlıqlarının genişləndirilməsinə yönəlik
qanunlar qəbul etmək əvəzinə məhdudlaşdırıcı qərarların qəbulu həyata
keçirilir. Ona görə də Azərbaycanda məhkəmə hakimiyyətinin müstəqilliyinə nail
olmaq müşkülə dönüb. Məsələn, parlamentin komitə iclasında prokurorluğun nümayəndəsi
çıxış edib deyir ki, mən hakimlərin seçki komitəsinin üzvüyəm. Axı niyə
prokurorluq hakimlərin seçilməsində iştirak etməlidir? Prokurorların təyinatında
məgər Məhkəmə hakimiyyətinin rəyi nəzərə alınır? Axı məhkəmə müstəqil hakimiyyətin
qanadıdırsa burada prokurorluğun nəzarəti haradan çıxdı? Yaxud tutaq ki, niyə
hakimləri seçən, təyin edən və cəzalandıran Məhkəmə Hüquq Şurası adlı qurum əslində
hakimlərin özünüidarə orqanı olsa da onun başında hökumətin üzvü olan ədliyyə
naziri dayanır? O zaman hansı məhkəmə müstəqilliyindən söhbət gedə bilər? Andlı
iclaslarda da çəkişmə tərəfləri var. Hakim də neytral olaraq müşahidə edir və
baxır ki, tərəflər prosessual qanunvericiliyi pozmasın, verdikti də 12 nəfərdən
ibarət münsiflər heyəti çıxarır. Niyə onda bu cür institut tətbiq olunmadı? Bir
nəfər hakimi ələ almaq asandır, yoxsa 12 nəfəri? Yaxud hakimə təzyiq etmək
asandır, yoxsa 12 nəfərə? Özü də həmin 12 nəfərin çoxu dövlət qulluğunda
olmayan azad insanlar olur, hökumətin də onlara təsir imkanları məhdud olur.
İkincisi də onlar hakimlər kimi məsuliyyət daşımırlar və yuxarıya statistik məlumatlar
vermirlər, tabeçilikləri yoxdur və s. Axı bu institut daha müstəqildir. Burada
çəkişmə prinsipi, aşkarlıq daha çoxdur. Digər tərəfdən, bunu biz vətəndaşın,
müttəhimin öz ixtiyarına verə bilərdik ki, sənin işinə andlı iclaslar baxsın,
yoxsa yox? Kimsə hesab edirsə ki, hakimə hökumət təzyiq edə bilər, o dərhal
andlı iclasları seçəcək. Sözümün canı odur ki, çox təəssüf ki, son vaxtlar biz
hökumətin imici barədə düşünmürük. Mənsə hər zaman demişəm və bu gün də hesab
edirəm ki, hökmən ölkədə hüquqi islahatlar aparılmalıdır. Vaxtilə Heydər
Əliyevin dövründə bir komissiya yaradılmışdı, həmin komissiya öz işini bərpa
etməlidir, respublikanın tanınmış hüquqşünasları o komissiyaya daxil olmalıdır
və doğrudan da təxirəsalınmaz hüquqi islahatlar aparılmalıdır.