YAP-ın qurulmasında müstəsna xidmətləri olmuş azsaylı funksionerlərdən biri, hal-hazırda da hakim partiyanın Yasamal rayon təşkilatına başçılıq edən professor Fikrət İsmayılov Moderator.azın bir sıra suallarını cavablandırıb:
-Heydər Əliyev 93-cü ilin 15 iyununda hakimiyyətə gəlməsəydi bu gün biz hansı Azərbaycanda yaşayırdıq?
-Heydər Əliyev yetişməsəydi, bu günki Azərbaycan
yox idi. Azərbaycanı bölüb parçalayacaqdılar, bir hissəsini Rusiya, bir hissəsini
Ermənistan, bir hissəsini İran işğal edərək öz ərazisinə qatacaqdılar. Deyim
ki, həmin dövrdə Azərbaycanın ən gərgin məntəqələrindən biri də heç də
Qarabağdan az təhlükə qarşısında olmayan Naxçıvan idi. Heydər Əliyev vaxtında Naxçıvana
getməsəydi, Naxçıvanı Qarabağdan betər bir aqibət gözləyirdi. Qarabağa əlimiz
çatırdı və ən azından 3 tərəfdən Azərbaycan rayonlarının əhatəsində idi, amma Naxçıvan
blokadada olduğundan oranın işğalı ermənilər üçün daha asan başa gələ bilərdi.
Heydər Əliyev birinci Naxçıvanı xilas elədi, sonra bütünlüklə Azərbaycanı
iflasın pəncəsindən alaraq onu qorumağı bacardı. Ardından o indiki Azərbaycanı
qurub yaratdı və bizlərə miras qoyub getdi. Heydər Əliyev qısa zamanda Azərbaycanın
nəinki bir neçə illik, onilkliklərə hesablanmış inkişaf strategiyasını müəyyənləşdirdi.
Bilirsiniz, mən sizə bir məqamı deyəcəm və siz özünüz onun necə bir uzaqgörən
tarixi şəxsiyyət olduğunu biləcəksiniz. Heydər Əliyev o dövrün ən nüfuzlu
hüquq-mühafizə orqanlarından birində işləyə-işləyə Bakı Dövlət Universitetinin
hüquq fakultəsini deyil, məhz tarix fakultəsini seçməsinin səbəbini
düşünmüsünüzmü? Əslində hamı məhz hüquq fakultəsini seçməliydi və seçərdi. Amma
o məqsədli şəkildə tarix fakultəsini seçdi. Bu, onun uzaqgörənliyi idi. Azərbaycanın
keçmişini, qədim və son dövrlərdəki tarixini təhlil etmək, hakimiyyətlərin
mövcudluğunu və süqutunun səbəblərini analiz etmək, əsrlər boyu millətimizin
başına gələn fəlakətlərin səbəblərini dəqiq öyrənmək üçün Heydər Əliyev tarix
fakultəsini seçdi. Məhz bu gün biz görürük ki, necə uzaqgörən bir siyasi
xadimin bizə miras qoyduğu bir dövləti, dövlətçiliyi təmsil edirik. Məsələn,
1918-ci ildə yaradılmış müstəqil Azərbaycan cəmisi 23 ay ayaqda dura bildi.
Çünki bu dövlətin tərkibində müsavatçılar da vardı, daşnaklar da, bolşeviklər də
vardı, menşeviklər də. Bütün bunların hamısı bu dövlətin süqutuna gətirib
çıxardı. Heydər Əliyev bunlardan nəticə çıxardı. Bundan əlavə onun birinci dəfə
Azərbaycanda rəhbərlikdə olduğu dövrdəki gördüyü işlər də onun uzaqgörənliyini
tamamilə ortaya qoymağa kifayət edir. Sovetin o dövründə Naxçıvanski adına hərbi
məktəbi yaratmaq hər adamın işi deyildi. Sovet hökumətinin dünyaya meydan
oxuduğu bir vaxtda respublikada hərbi məktəb yaratmaq ağılasığmaz bir gediş
idi. O bu günki gün üçün yaradırdı o məktəbi. O Azərbaycan Konstitusiyasına Azərbaycan
dilini dövlət dili kimi saldırmaq üçün nələrdən keçmədi? Balaca bir
respublikada irili-xırdalı 250 sənaye müəssisələri yaratmaq zarafat məsələ
deyildi. Təkcə Dərin Özüllər zavodunu götürün. Bu nəhəng zavodsuz müasir Azərbaycan
neft sənayesini təsəvvür etmək olardımı? Dərin Özüllər Zavodu
iqtisadiyyatımızın təməl daşlarından biridir. Bütün bunlar Heydər Əliyevin Azərbaycana
yenidən qayıtmasını və ona ikinci dəfə nəfəs verməsini labüd edirdi. O isə bu
missiyanı yalnız onun bacara biləcəyinə əmin olaraq özünü və ailəsinin taleyni
riskə ataraq Bakıya qayıtdı. Amma ona Bakıda qalmağa imkan vermədiklərinə görə
Naxçıvana-ata-baba yurduna getdi və onun gəlişi Muxtar Respublika əhalisinin öləziməkdə
olan ümidlərini bərpa elədi və hamı onu bir xilaskar kimi qəbul elədi. O
vaxtında Naxçıvana rəhbərliyi öz üzərinə götürməsəydi,Naxçıvan Qarabağdan qabaq
əldən getmişdi. O, Qars müqaviləsini bərpa elədi, Türkiyə və İranla danışıqlar
apararaq Muxar Respublikanı blokada şəraitindəki sıxıntılardan xilas etmək üçün
yorulmadan çalışdı.
-YAP-ın yaradılması dönəmində siz hansı vəzifədə
işləyirdiniz?
-Mən Milli Elmlər Akademiyasının Fizika
İnstitutunda laboratoriya müdiri idim.
-Partiyanı yaratmaq üçün deyəsən xeyli çətinliklərə
sinə gərməli olmusunuz. Hətta fiziki və mənəvi terrora da məruz qalmısınız...
-Mənim laboratoriyam olmuşdu cəbbəxana.
Silah-sursatla, top-tüfənglə dolu idi. Daha doğrusu, pullar seyfimdə olurdu,
otaqlarsa silahla dolu idi. Misal üçün Siyavuş və Rizvan Vahabov gəlirdilər ki,
Ukraynadan yük təyyarəsi gəlib, içi də silah-sursatla, tankla-topla doludur.
Onu Naxçıvana aparmaq üçün filan qədər vəsait lazımdır. Mən də dəftərə yazırdım
və vəsaiti verirdim aparırdılar.
-Həmin dövrdə hansı basqılara məruz
qaldığınızı xatırlayırsınızmı?
-Birbaşa mənə qarşı hədə-qorxu olmadı. Amma
yoldaşlarıma xəbərdarlıq etmişdilər ki, ona deyin bir az ehtiyatlı olsun. Hətta
sonradan bildim ki, məndən xəbərsiz bizimkilər arxamca mühafizə təşkil ediblərmiş,
heç xəbərim olmayıb. Hadisələr sakitləşəndən sonra günlərin bir günü iki-üç nəfər
cavan oğlanı gətirdilər otağıma və soruşdular ki, bunları tanıyırsınızmı? Mən də
soruşuram ki, hansı təşkilatdansınız? Gülümsünərək deyirlər ki, təşkilatda
deyillər, neçə vaxtdır ki, sizi özünüzdən zəbərsiz mühafizə etmək üçün onları
ayırmışdıq. Yalnız o zaman yadıma düşdü ki, hər dəfə institutdan çıxanda bir nəfər
qabaqda, iki nəfər arxada məni izləyirdilər. Avtobusa minirdim, mən qabaqdan
minəndə onlar arxadan minirdilər, yaxud piyada gələrək Elmlər Akademiyasının həyətinə
girirdim, görürdüm ki, bunlar yenə burdadır. Yalnız bunlar mənə deyəndə ötənlərdə
yaşadıqlarımı xatırlayıb anladım ki, bu uşaqlar əslində məni qoruyurmuşlar. Səbəb
də bu imiş ki, bizimkilərə məlumat çatıbmış ki, Murtuz Ələsgərovun başına gələnlər
mənim də başıma gətirilməlidir. Ona görə də mənə demədən mühafizəmi təşkil
ediblər.
-“91-lər” siyahısının tərtib olunmasında hansı
xidmətləriniz olub? Şəxsən kimin adını ora siz salmısınız, yaxud sizin tövsiyənizdən
sonra salınıb?
-O siyahının tərtib olunmasında Murtuz müəllimin
daha çox xidmətləri olub. Murtuz müəllim Elmlər Akademiyasının prezidentinin
kabinetində əlində kağız-qələm bir-bir camaata müraciət edirdi ki, siz Heydər
Əliyevin gəlməsinə imza atırsınızmı?
-O siyahının ərsəyə gəlməsində ən çox xidmətləri
olan adam kim idi?
-Murtuz Ələsgərov.
-Bəs Sirus Təbrizli və ya Əli Nağıyev?
-Əli Nağıyev Heydər Əliyevlə əlaqə saxlayan əsas
şəxs olduğundan o ümumi təhbərlik edirdi.
-Heydər Əliyev Naxçıvanda olanda onunla
görüşünüz oldumu?
-Bəli. Mən, Səyyad Aran, akademik Nadir
Seyidov getmişdik Naxçıvana Heydər Əliyevin görüşünə. Hələ 90-cı il idi. Heydər
Əliyev bacısı qızıgildə qalırdı, mən də Naxçıvana bacım qızının toyuna getmişdim,
eşitdim ki, Heydər Əliyev ordadır, getdim onun ziyarətinə. Görüşdük və oturub
xeyli söhbət elədik. Bizi çay süfərisnə dəvət elədi və keçmişləri xatırlatdı.
Elə ovqat yaratdı ki, biz onunla asanlıqla həmsöhbət ola bildik və açıq
danışdıq. Heydər Əliyev orda mənə bir daha tövsiyyə elədi ki, sən bir az
ehtiyatlı ol. Bir dəfə orda dedi bu sözü mənə, bir dəfə də Fəxri Xiyabanda
dedi. Elektrotexnika İnstitutunda tədbir vardı, Heydər Əliyevlə partiya üzvlərinin
görüşü idi.
-Hələ hakimiyyətdə AXC idi.
-Bəli. Tədbirdən sonra Heydər Əliyev gəldi Fəxri
Xiyabana, öz keçmiş silahdaşlarının hamısını yad elədi. Rəfael Allahverdiyev də
bir qucaq gül gətirmişdi, hamısının qəbrinin üstünə bir bir gəzib gül qoydu.
Orada da bir qədər söhbət elədik. Heydər Əliyevə dedim ki, bu gün əgər 500
üzvümüz varsa, bir ilə biz bunu 5 minə çatdıracağıq. Qayıtdı ki, saya yox, əsas
keyfiyyətə fikir vermək lazımdır. Onun bu sözlərini də biz özümüzə rəhbər
tutmuşuq.
-Yasamal rayon təşkilatının nə qədər üzvü var?
-Yasamal rayon təşkilatı 93-cü ilin 20
fevralında yaranıb. Onda 550 nəfərlə təsis konfransı keçirildi. Bu günsə Yasamal
təşkilatındakı partiya üzvlərinin sayı 26 mindən yuxarıdır. Təşkilatın üzvləri
içərisində 20 akademik, 45-dən yuxarı müxbir üzv, elmlər doktorları və elmlər
namizədləri var.
-Müavinləriniz kimlərdi? YAP Yasamal Rayon təşkilatı
sədrinin neçə müavini var?
-Tağı Əhmədovdu, Yasamalın icra başçısıdır,
Rasim Nəbiyevdir, akademik Qərib Məmmədovdur.
-Müavinləriniz tez-tezmi gəlirlər qərargaha, yoxsa
ayda-ildə bir dəfə görünürlər?
-İdarə Heyətinin iclaslarında iştirak edirlər.
-Gülər Əhmədova əvvəllər Yasmal rayon təşkilatının
üzvü idi...
-O başqa yerdə partiyaya daxil olub. Sonradan
o universitetə keçdiyinə görə universitetdə partiya uçotunda oldu.
-Hal-hazırda Yasmal Təşkilatında üzv kimi
qalırmı?
-Xeyr. Universitet onunla bağlı qərar çıxardı,
partiyadan çıxarıldı və biz də onların qərarını təsdiq etdik.
-Heydər Əliyevi müasir Azərbaycanın memarı
adlandırırlar, bəs İlham Əliyevi bir cümlə ilə necə xarakterizə edərdiniz?
-Heydər Əliyevin son müraciətində bir fikri
vardı ki, mənim görə bilmədiyim işi İlham görəcək. O da Heydər Əliyevin uzaqgörənliyi
idi. Əgər İlham Əliyev olmasaydı, Azərbaycan bu günki inkişafa gəlib
çatmayacaqdı. İlham Əliyevin yerinə bir başqa adam olsaydı, indi Azərbaycan bəlkə
də yenidən məhvə gedərdi. İlham Əliyev atasının siyasətini zərgər dəqiqliklə həyata
keçirdiyinə görə Azərbaycan bu günki inkişaf səviyyəsinə çatıb.
-Bir ağsaqqal YAP funksioneri kimi bəlkə təkliflə
çıxış edəsiniz ki, dünyanın indiki həssas dönəmində umu-küsünü bir kənara qoyub
milli maraqlar naminə iqtidarlı müxalifətli hamının bir yerdə olmasına ehtiyac
yarandığına görə hamı bir masa ətrafına toplaşsın?
-Bu suala özünüz cavab verdiniz. Bizim
birliyimizə ehtiyac var. Təbii ki, Azərbaycanda da qarışıqlıq yaratmaq istəyən
qüvvələr var. Amma Heydər Əliyevin qoyub getdiyi və İlham Əliyevin davam etdirdiyi
siyasət bu qüvvələrin əl-qol açmasına imkan vermir. Biz bu müstəqilliyimizi göz
bəbəyimiz kimi qorumalıyıq.
-Bəlkə bir təkliflə çıxış edəsiniz və indiki
prezidentlə YAP-ın özəyini təşkil edənlərin, Heydər Əliyevin silahdaşlarının
daha bir görüşünü təşkil edəsiniz?
-Onu gərək yuxarıdan, mərkəzi qərargahdan məsləhət
etsinlər. Amma sizinlə razıyam, belə bir görüş yaxşı olardı. Partiyanın nüfuzu
bir az da artardı. Partiyanın nüfuzu etiraf edək ki, prezident seçkilərindən
sonra xeyli artdı. YAP İcra katibi Əli Əhmədovun baş nazirin müavini təyin
edilməsi, AMEA-nın prezidenti Akif Əlizadənin, “Qaçqınkom” sədri Əli Həsənovun YAP sədrinin müavinləri seçilmələri
partiyanın nüfuzunun göstəricisi hesab olunmalıdır. Amma mən də razıyam ki, belə
bir görüşə ehtiyac var və bu cür səmimi söhbət partiyanın nüfuzunu daha da
artırar.
-Vaxtilə bu partiyanı kərpic-kərpic quran bir
sıra funksionerlər indi partiya həyatından kənarda qalıb. Heç keçmiş
funksionerlərlə əlaqə saxlayırsınızmı? Daha doğrusu, onlar sizi arayaraq əhvalınızı
soruşurlarmı heç?
-Niyə ki. Əli Nağıyevlə tez-tez zəngləşirik,
görüşürük. Səyyad Aran da tez-tez halımı soruşanlardandır. 91-lərin bir çoxu həmişə
zəng edirlər, bura da gəlirlər, oturub söhbətləşirik də.
-Ümummilli bəlamız olan Qarabağ münaqişəsinin
həlli yollarıyla bağlı sizin fikriniz nədir?
-Bir dəfə mən Milli Məclisdə olanda dedim.
Siyasət son aqibəti məhdud şəxslərə bəlli olan ictimai-siyasi prosesdir. Yəni
bu münaqişənin həlli yolları məhdud şəxslərə məlumdur. Əgər bu müzakirələr həmin
o məhdudiyyətdən kənara çıxsa, artıq o siyasət rolunu itirər. İndi bu siyasətin
məğzini prezident başda olmaqla məhdud sayda adamlar bilir, onlar da çalışırlar
ki, qan tökülmədən həllini tapsın. Müharibə varinatı onsuz da hər zaman
ehtiyatda gözləyir.