Eks-spiker Rəsul Quliyev Rusiyanın Ukraynaya təcavüzündən sonra vaxtaşırı Moderator.az-da maraqlı və tarixi faktlara söykənən analitik yazılarla, siyasi təhlillərlə çıxış edir. Bu günki yazısı isə dünyadan gözü doymayan imperiya xəstəsi Putinin Ukraynadakı pərtliyinin əvəzini çıxmaq niyyətlərinə həsr olunub:

"Ukraynanın cənub-şərqində, daha doğrusu, əsasən Donetsk vilayətində (bu vilayətdə 2 milyon, yəni təqribən Krımdakı qədər əhali yaşayır. 48 faizi rus,46 faizi isə ukraynalıdır) Rusiyanın eyni ilə Krımda tətbiq etdiyi işğal ssenarisi özünü doğrultmadı. Krım nokdaunundan ayılan Ukrayna liderləri nəhayət qətiyyətlə anti-terror əməliyatlarına start verdilər. Təşvişə düşən Rusiya tələm-tələsik BMT-nın Təhlükəsizlik Şurasının çağrılmasını, Ukraynanın şərqində aqressiyasının qarşısının alınması məsələsini, heç olmazsa təxirə salınmasını müzakirəyə çıxartdırdı. Lakin Təhlükəsizlik Şurasının heç bir üzvü Rusiyanın siyasətini dəstəkləmədi. Əksinə, yaranmış vəziyyətin yaradıcısının RF olduğunu qeyd etdilər. Ukraynanın terror əleyhinə əməliyatlarına birmənalı dəstək verdilər. Son 50 ildə heç bir ölkə BMT-nin divarları arasında bu səviyyədə izolyasiyaya düşməmişdi. Cəmi bir neçə saat, ancaq bir yerdə aparılmış kiçik miqyaslı antiterror əməliyyatı separatçıları Donetsk, o cümlədən, Luqansk vilayətlərinin hər yerində çaşıb qalıblar, artıq oyundan necə çıxmaq barədə düşünürlər. Günlük muzdu 500 dollar olan rus terroristləri və gündə 100 dollar alan onlara qoşulmuş Ukrayna cinayətkarları sözsüz ki, canlarını təhlükə altına qoymaq istəmir. Paralel olaraq Donbasda şaxtaçılar və başqa zavod-fabriklərin fəhlələri özləri ayağa qalxıb separatçıları qovmaq istəyirlər. Faktiki bu gün, sabah bu regionlarda separatçıların əleyhinə güclü xalq müqaviməti gözlənilir.

 Nəyə görə son 10 ildə bir neçə dəfə ilin adamı elan olunmuş, hətta bu il həyasızlaşıb Nobel mükafatına təqdim olunmuş şöhrətpərəst Putin öz imicinə belə ağır zərbə vuran bu hərəkətləri törədib? Bütün dünya Putinin 14 illik fəaliyyəti nəticəsində Dövlət Duması və Federasiya Şurasında, o cümlədən hökumət və prezident aparatında 1000-dən artıq manqurtlaşmış deputatlar, nazirlər, nazir müavinləri, prezident köməkçi və müşavirlərinin toplandığının şahidi oldu. Bütün dünyanın həqarətlə qarşıladığı işğal siyasətinin əleyhinə gedəcək və ya bitərəf qalacaq bir insan belə tapılmadı Rusiyanın yuxarı iyerarxiyasında. Bu RF-nın süqutu deyilmi? Bu rus xalqının deqradasiyası deyilmi?

 Ancaq Putin dəli deyil, əksinə ağıllıdır və ağlasığmaz şöhrətpərəstdir, yuxusunda da ən azı Peterburqda- Pyotrun heykəlinin yanında özünün əzəmətli monumentini görür. Putin bütün diktatorlar kimi azı 20 il də bu postu tutacağına inanır. Bu günkü fiziki vəziyyətinə görə o, ümumiyyətlə, heç vaxt ölməyəcəyinə inanır.

 Belə bir arzusunun baş tuta bilməyəcəyinin yeganə səbəbini Ukraynanın Avropa Birliyi və NATO-ya daxil olmasında görür və tamamilə düzgün başa düşür. Ukraynalılara ən yaxın xalq polyaklardır.Onların genetik kodları da bir-birilərinə çox yaxındır. Bu iki ölkəni müqayisə edək: Polşa sahəsi 313 min kvadrat kilometr,əhalisi 40 milyon, Ukrayna sahəsi 600 min kvadrat kilometr, əhalisi 45 milyon.

 1991-cı ildə bu ölkələrin adambaşına ildə məhsul istehsalları təqribən Polşa 4000, Ukrayna isə 5000 dollar səviyyəsində olublar. Yəni, sovetdən yaxalarını qurtarana qədər hər iki ölkə eyni səviyyədə- dilənçi vəziyyətində olublar. İndi 20 ildən sonra nələrin baş verdiyinə diqqət yetirin: Bu illər ərzində Polşa Avropaya inteqrasiyası siyasətini seçib, Avropa standartlarına uyğun korrupsiya və rüşvətə qarşı qanunlar qəbul edib. İqtisadiyat və siyasətdə reformalar edib, ədalətli rəqabət prinsipini həyata keçirib.

 Ukraynada bu proseslərin heç biri getməyib. RF bu reformaları etməmək üçün Ukraynanın prezident və hökumətdə işləyənlərini, sözün əsl mənasında, qazla, neftlə şirnikləşdirib, qara bizneslə məşğul olmağa təhrik edib. Yeganə Yuşenko nə isə etmək istəyirdi, o dövrdə də Putin ambisioz Timoşenkodan ona qarşı istifadə etdi. İndi Rusiyanın hətta Krımı işğal etməsinə baxmayaraq, Ukrayna Avropaya inteqrasiya yolunu seçib. 

 Bu gün 1991-ci ildə eyni iqtisadi və siyasi potensialla yeni həyata başlayan Polşa ilə Ukrayna arasında fərqə diqqət yetirin. Polşada adambaşına illik məhsul istehsalı 23 min dollar səviyyəsindədir,yəni 20 ildə 5 dəfədən artıq yüksəlib. Müqayisə üçün Avropanın ən qüdrətli ölkəsi Almaniyada bu rəqəm 32 min dollar səviyyəsindədir. Ukraynada isə bu rəqəm 7 min dollardır.  Yəni 20 ilə cəmi 2 min dollar artıb.

Avropaya inteqrasiya siyasəti nəticəsində Ukraynada bu rəqəm iki ilə azı iki dəfə artıb RF-na çatacaq.RF-nın bu göstəricisindən neft və qazı çıxartsaq Ukraynada adambaşına məhsul istehsalı Rusiyadan artıq olacaq. 10 il müddətində Ukrayna indiki Polşa kimi bir ölkə olacaq. Polşaya sovet dövründə də, indi də Rusiyadan gedib gələnlərin sayları məhdud idi.Ancaq Ukraynaya bu məhdudiyyət aid edilmir. Ukraynada belə inqilabı dəyişikləri görən ruslar indiki kimi Putini qəhrəman hesab edəcəklərmi, inanmıram. Rusiyada ağıllı, cəsarətli, intellektual potensialı yuxarı səviyyədə olan çoxsaylı adam var. Putinin 14 ildə 1000-dən artıq qul psixologiyalı adamları seçib ətrafında toplaya bilməsi aldadıcı görsənməsin, vəziyyət dəyişəndə onların azı 80 faizi Putini düşmən elan edəcək. Ona görə Ukraynanın Avropaya inteqrasiya siyasəti Putini  dəhşətə gətirir. Bu siyasətlə onun 20 illik diktatorluğu uzlaşmır. Medvedyevin təbiri ilə desək, Ukraynanı Avropa İttifaqinda görmək onu vahimələndirir. Ona görə o belə qətiyyətlə və utanmadan Ukrayna barədə yalanlar deyir, proseslərin qarşısını almaq istəyir.

 Ancaq gedən qatarı saxlamaq olmaz. Ukraynada bu gün sözün əsl mənasında pozitiv inqilab və böyük təmizlənmə prosesləri gedir. Xalq məhkəmələrin yenidən seçilmə məsələsini irəli sürüb və camaat birbaşa bu seçkilərdə iştirak edir. Məhkəmələrin seçilməsində hakimiyyət xalqı prosesin iştirakçısı edib. Bütün çinovliklərin lüstrasiyası həyata keçiriləcək. Bu sözün bizim dildə tərcüməsi yoxdur, ancaq izahı müqayisəli olmalıdır. Yəni ölünün artıq heç bir şeyi qalmır, varı- dövləti, evi -eşiyi, heç bir şeyi. Axırıncı dəfə onu yuyub tam təmiz edirlər. Lüstrasiya təqribən budur, insanın birdəfəlik təmizlənməsi. Yəni bütün çinovniklərin evi,eşiyi, pulu-parası- hər şeyi ortaya qoyulur və bu var dövlət onun aldığı və ya qazandığı məvaciblə müqayisə olunur. Azərbaycanda nə qədər insan bu lustrasiyanın əleyhinə çıxar sualına oxucular cavab versə çox yaxşı olar... 

  Düşünürəm ki, Ukraynada az itki ilə dövlətin bölünməzliyi təmin olunacaq. Ukrayna xalqı yeni yola , sivil yola qədəm qoymaq üçün 108 insan qurban verdi. Donetskdə bir qrup muzdlu bandit və terroristin məhvi üçün heç o qədər də qurban vermək lazım gəlməyəcək.

 Əlindən Ukrayna çıxmış revanşist xarakterli Putin məğlubiyyətini kompensasiya etmək barədə düşünəcək. Bundan əvvəlki yazımda Putin aqressiyasının qarşısında ən zəif reqionun Zaqafqaziya ölkələri olduğunu qeyd etmişdim. Bu 3 ölkənin arasında isə ən zəif müqaviməti olan ölkə sözsüz ki, Azərbaycandır. Bu müqavimətsizliyin səbəbləri təkzib olunması qeyri-mümkün olan respublikanın bu günkü vəziyyətidir.

 1.Azərbaycan qeyri -demokratik bir ölkə olduğu üçün heç bir Qərb ölkəsi onu müdafiə etməyəcək. Rusiyanın aqressiyasına qarşı çıxış edəcəklər, ancaq 2008-ci ildə Gürcüstanı müdafiə etdikləri kimi ayağa qalxmayacaqlar. ABŞ hərbi gəmilərini Qara dənizə göndərməyəcək.

2.Ukraynadan fərqli olaraq (həmçinin Gürcüstandan) ölkə vətənini satmağa hazır olan yuxarı və orta ranqlı azərbaycanlılarla doludur.

3.Ölkənin daxilində bu rejimdən zəhləsi gedən passiv vətəndaşların Rusiyanın aqressiyasına qarşı duracaqlarına inanmaq çətindir.

 Bu və başqa səbəblərin izahı olacaq, bu barədə növbəti yazıda..."