Moderator.az millət vəkili Əli Məsimlinin parlamentin dünənki iclasındakı çıxışını sinxron olaraq oxuculara təqdim edir:

“2013-cü ilin hesabatı əvvəlki bir neçə ilin hesabatı ilə müqayisə edəndə kifayət qədər geniş və sanballı olduğu, görülən işlərin də kəmiyyət və keyfiyyət baxımından dinamikası özünü göstərir. 2013-cü ili ilk növbədə prezident seçkiləri və onun nəticələrindən doğan yeni islahatların anons ili kimi, eyni zamanda “Şahdəniz-2” kimi 21-ci əsrin yeni layihəsinə start verilən il kimi, bundan əlavə “ASAN XİDMƏT”in timsalında sosial innovasiyalara start verilən bir il kimi dəyərləndirsək, kifayətdir ki, hökumətin fəaliyyətini məqbul hesab edək. Eyni zamanda özündən əvvəlki illərlə müqayisədə Ümumi Daxili Məhsulun (ÜDM) artımı xeyli dərəcədə yüksəkdir. Təkcə Azərbaycanın öz göstəriciləriylə yox, həm dünyanın, həm də MDB-nin 2 faizlik göstəricisi fonunda da ÜDM-in 5,8 faiz artması çox yaxşı göstəricidir. Amma bir məqamı qeyd etmək istəyirəm ki, Azərbaycanda iqtisadi artım sürətlənsə də əhali də sürətlə artır. İldə 1,3 faiz əhali artımı var ki, bu da 120 min nəfər deməkdir. ÜDM-dəki həmin 5,8 faizlik artımın da 3, 9 faizi də elə o 120 min yeni insanın tələbatının ödənilməsinə sərf olunur. Ona görə də cənab prezidentin qoyduğu tapşırığı-qarşıdakı 10 il ərzində ÜDM-i iki dəfə artırmaq vəzifəsini vaxtında yerinə yetirmək istəyiriksə, Azərbaycandakı iqtisadi artım 5,8 fazi yox, hər il ən azı 8 faiz olmalıdır. Buna nail olmaq üçün kifayət qədər yaxşı işlənmiş proqramlar var. Buna nail olmağın perspektivli yollarından biri də regionlarımızın potensialını hərəkətə gətirməkdir. 2013-cü il həm də 3-cü regional inkişaf proqramının son ili olduğu üçün çıxışımda regional konteksdə olan məqamları həm də Şəkinin timsalında qeyd etmək istərdim. Hər bir ölkənin iqtisadi artımının onun sosial göstəricilərinin inteqral şəklində qabarıq verilməsinin ümumiləşdirlimiş nəticəsi ÜDM-də öz əksini tapdığı kimi rayonun da inteqral göstəricisi orda istehsal olunan ümumi məhsuldur. Azərbaycanda ÜDM-in artımı sürətlə getsə də Şəkinin timsalında adambaşına ÜDM 1900 manatdan azdır ki, bu da Azərbaycanın ümumi göstəricisindən 3,3 dəfə aşağıdır. Bunu yeni yaradılmış dəyərə çevirib müqayisə etsəm, bu fərq daha da çoxalmış olar. Eyni zamanda yenə də büdcə vəsaitini Azərbaycan əhalisinin sayına böləndə 2000-dən artıq büdcə gəliri və büdcə xərcləri alınır. Şəkinin gəlirlərini Şəki əhalisinin sayına böləndə isə gəlir üzrə 116 manat, mərkəzləşdirilmiş subsidiya və dotasiya veriləndən sonra isə 216 manat edir. Şəkidə orta aylıq əmək haqqı 238 manatdır ki, bu da Azərbaycanın orta aylıq əmək haqqından 1,8 dəfə, Bakının orta əmək haqqından isə ən azı 2,5 dəfə aşağıdır. Ona görə də hökumət regionlarda inkişaf imkanlarını səfərbər etməli, sərmayə qoyuluşlarının artırılması və biznes mühitinin yaxşılaşdırılması, sahiblkarlığın inkişafı qarşısında burda oturan hər kəsə məlum olan problemlərin, manelərin aradan qaldırılması, perspektivli sənaye müəssisələrinin, layiqli maaşı olan iş yerlərinin açılması, kənd təsərrüfatında iri fermer təsərrüfatlarının, qabaqcıl texnologiyaya əsaslanan istehsal və istehlak kooperativlərinin yaradılması  istiqamətində addımlar atmaqla mərkəzlə regionlar arasında qeyd etdiyim fərqi aradan qaldırmaq olar. Həmin rəqəmlər açıq-aydın göstərir ki, bu sahədə görülməli işlər çoxdur. Bunlardan iki sahəni xüsusi qeyd etmək istəyirəm.

 Birinci sahə bilavasitə yüngül sənayenin inkişaf etdirilməsidir ki, buna regionlarda kifayət qədər imkan var.İkinci sahə isə yeyinti sənayesinin inkişaf etdirilməsidir. Azərbaycanda yerli istehsal hesabına ildə adambaşına 265 manat, ayda 22 manatlıq, gündə 70 qəpiklik qida məhsulu istehsal edirik. Bu da mürəkkəb texnologiya deyil ki, onun mənimsənilməsi vaxt aparsın. Biz nə qədər özgənin yağını-pendirini-smetanını reklam edəcəyik? Bunların hamısını öz ölkəmizdə istehsal edərək həta xaricə də bu məhsullardan xeyli ixrac edə bilərik.

Hesab edirəm ki, hesabatı qiymətləndirən zaman yeni bir yanaşmadan istifadə etmək lazımdır. Hökumətin ümumi göstəricilərini yüksək qiymətləndirirəm, fəaliyyətini məqbul hesab edirəm. Ayrı-ayrı qurumların fəaliyyətinə gəldikdə isə ciddi fərq var. Məsələn, yenə də mən Şəkinin timsalında qeyd edirəm ki, körpü kompleksinin tikilməsi, şəhərdaxili və kəndarası yolların asfaltlaşdırılması, sosial infrastruktura sahəsində və s. Istiqamətlərdə xeyli iş görülüb. Bir il ərzində 7 məktəb tikilib və təmir olunub. Dövlət vəsaiti hesabına 4 bağça təmir olunub. Amma çox təəssüflər olsun ki, başqa məqamları da qeyd edəcəm. Mən dəfələrlə burda məsələ qaldırmışam ki, Şəki kəndlərinin qazlaşdırılması Azərbaycanın qazlaşdırılmasından 3 dəfə, bütün Azərbaycan kəndlərinin qazlaşdırılmasından isə 2 dəfə aşağı səviyyədədir. Yəni qazlaşdırma cəmisi 27 faiz səviyyəsindədir. Ötən il hökumətin hesbatında məhz Milli Məclis qarşısında söz verilmişdi ki, Şəkinin 50 kəndi qazlaşdırılacaq. Bunu vəd edən “Azəriqaz” cəmisi Şəki şəhərinin bir neçə küçəsini və iki kəndi, bir qəsəbəni qazlaşdırıb. Bu da verilən sözün 6 faizi deməkdir. Ona görə də hökumətin fəaliyyətini məqbul hesab etməklə yanaşı Azəriqazın və bu işdə günahı olan insanların fəaliyyətini qeyri-məqbul hesab edirəm. Fürsətdən istifadə edib deputat sorğusu vermək istəyirəm ki, niyə verilən söz 6 faiz yerinə yetirilib? Bu, məmurların Şəkiyə olan sayğısızlığıdır, vəsait ayrılıb, yerinə yetirilməyib, yoxsa vəsait ayrılmayıb?

Eyni zamanda Azərbaycanda 2 milyona yaxın insanın ya mənzilə, ya da mənzil şəraitinin yaxşılaşdırılmasına  ehtiyacı var. İpoteka sahəsində gözəl işlər görülür, amma ipotekanın buna gücü çatmaz. Ona görə də ucuz xalq evlərinin tikilməsi istiqamətində hökumətin fəaliyyət göstərməsini vacib hesab edirəm. Bir də müavinətlərin artırılmasını təklif edirəm. Artırılsa da yenə də aşağıdır, xüsusən də əlillərin müavinətlərinin artırılması istiqamətində hökuməti addım atmağa dəvət edirəm.”