Moderator.az saytı Xocalı faciəsinin 22-ci ildönümü ərəfəsində Azərbaycanın sabiq müdafiə naziri Rəhim Qazıyevin 7 mart 1992-ci il tarixində Ali Sovetə təqdim etdiyi layihəni oxuculara təqdim edir. Hesab edirik ki, məlum layihə Xocalı faciəsindən dərhal sonra bu soyqırımına verilən operativ reaksiya kimi əhəmiyyətlidir və bu gün də öz aktuallığını qoruyub saxlayır.
BMT-yə, Təhlükəsizlik Şurasına, Helsinki təşkilatına, parlamentlərə, dini, elmi, siyasi, mədəni, iqtisadi, hüquqi birlik və partiyalara!
“26-27 fevral 1992-ci ildə müstəqil Azərbaycan Respublikasının Xocalı şəhərində Ermənistan Respublikası, terrorçular və MDB-nin Qarabağda yerləşən hərbi alayı tərəfindən vəhşilik törədilmişdir. Dinc sakinlərə : qadına, qocaya, xəstəyə, hətta bələkdəki körpəyə belə aman verilməmiş, bütün canlılar məhv edilmiş, Xocalı şəhəri yerlə- yeksan edilmişdir. Sağlam ağılın təsəvvür etmədiyi vəhşilik insan idrakını sarsıdır. Azərbaycan torpağında, Azərbaycan xalqına qarşı elan edilməmiş müharibə ən vəhşi üsullarla aparılır, əsirlər təhqir edilir, qadınları zorlayır, qulaqlarını, döşlərini kəsir, heç bir əxlaqa sığmayan cəza verilir. Bəzi meyitlərin gözləri çıxarılır, baş dərisi (skalp) soyulur, hətta meyitlərə qarşı törədilən vəhşilik, soyğunçuluq ən ağır müharibədə belə, bu qədər dəhşətli qəddarlıqla olmamışdır.
Xatın, Sonqmi qırğını, Naqasaki və Xirosima faciəsi Xocalı fəlakəti qədər dəhşətli olmamışdır. Bu faciələr elan edilmiş müharibələrdə törədilmiş vəhşilikdirsə, Xocalı faciəsi elan edilməmiş ən qəddar, məkirli niyyətlərlə insan hüquqları, milli azlığın hüquqları, demokratiya bayraqları arxasında gizlənərək, bütün dünya ictimaiyyətini aldadaraq, imperiya tərəfindən törədilən yalnız azərbaycanlı, türk olduğuna görə planlaşdırılmış soyqırımı genosididir. Qaçanlara, əsir alınanlara da aman verilməmişdir.
Artıq dörd il davam edən, ən vəhşi üsullarla və bəşəri qanunlara zidd, qeyri hüquqi, qeyri insani, iradlarla aparılan, elan edilməmiş bu müharibəyə Azərbaycanın zorən cəlb edilməsi, siyasi, iqdisadi, informasiya blokadasına alınması, haqq səsinin boğulması, beynəlxalq norma və qanunlardan Azərbaycanın təcrid olunması və bu qanun və normalara zidd hərəkətlərin qanun cildində məharətlə müdafiə edilməsi belə bir genosidə şərait yaratmış, yalan məlumatlarla aldadılma, bilərəkdən susmaq, Azərbaycanı təkləmə siyasəti isə bu genosidi ən vəhşi üsullarla həyata keçirmişdir.
Malıbəyli, Cəmilli və s. kəndlərdə törədilən faciələrə, kütləvi genosidin mərhələlərinə beynəlxalq ictimaiyyət və dövlətlər tərəfindən qəbul edilmiş bütün norma və qanunlara, BMT-nin insan hüquqları bəyannaməsinə, helsinki sazişinə bu bəyannamə, norma, saziş və konvensiyalara imza edən dövlətlərin susması, ona tələbkarlıqla yanaşılmaması, SSRİ-nin hüquqi varisi kimi elan edilən Rusiya federasiyasının, eləcə də MDB-nin bu qanunlara hörmətsizliyi və etinasızlığı, xırda, azlıqda qalan xalqlara qarşı imperiya siyasəti yeritməsi, bu məkrli siyasətin erməni lobbisi, erməni diasporası və Qarabağ erməniləri arxasında gizlənə bilməsi, bu silahlı zorakılığa şərait yaratmış, soyqırımına xidmət edən qladiator döyüşləri təşkil etmişdir. Qladiator olmazdan qabaq əsir alınmaq, qul olmaq lazımdır. Xalqlar isə məhz azadlıq uğrunda mübarizə aparırlar. Ermənistanın və digər qonşuların əzəli torpaqlarında heç vaxt gözü olmayan, bütün xalqlara humanizm, ədalət prinsipləri ilə yanaşan Azərbaycan, imperiya siyasətinin qurbanı kimi bu qladiator döyüşünə cəlb edilir. Bu soyqırıma məruz qalan Azərbaycanı demokratik, milli-azadlıq hərəkatını dinc və siyasi yollarla gedən məcradan çıxarmaq üçün imperiya bütün vasitələrə əl atır.
Qan və qırğınlar üzərində doğulan,özünü SSRİ adlı imperiyanın varisi elan edən MDB, respublikaların müstəmləkə vəziyyətinin yeni variantının olduğunu Xocalı genosidi ilə təstiq etmişdir.
Regionda yalnız Azərbaycan və Ermənistan respublikalarının deyil, bütün region dövlətlərinin mənafeyi təhlükə altındadır. Azərbaycan xalqının soyqırımı ilə aparılan Qarabağ “münaqişəsi” Ermənistan və MDB tərəfindən çıxılmaz qan çanağına çevrilmişdir və Azərbaycan bu qan çanağına çevrilmiş doğma torpağında hər tərəfli təcavüzə məruz qalır. SSRİ-nin hüquqi varisi olan MDB-Rusiya Federasiyası isə bu varislik hüququndan istifadə edərək öz ordusundan zorakı vasitə kimi istifadə edir. Bir tərəfdən imperiyanın Qafqaz və yaxın Şərq siyasəti üçün bu münaqişə beynəlxalq səviyyəyə qaldırılır, digər tərəfdən ağlasığmaz fəlakət və genosid törədilir ki, bu xalqlar heç vaxt münasibətlərini dinc yolla nizama sala bilməsinlər. Regionda olan ordu bu siyasəti tənzimləyən alətə çevrilmişdir və rus silahı qan tökür. Qarabağ və Azərbaycan müdafiəsiz qalmış, blokadaya çevrilmiş müharibə ocağıdır. O, bu talehi ilə barışmasa, bu köləlik üçün xilasını MDB-də tapmasa, təcavüzkarlara cavab verilməsə, Azərbaycan xalqını kütləvi terror gözləyir. Bu isə BMT-nin nizamnaməsinə zidd olaraq Azərbaycan Respublikasına, BMT üzvü olan dövlətə qarşı MDB tərəfindən təcavüz, təziq, zorakılıq və həqarətdir.
Müstəqil xarici siyasət yürüdən, öz müqəddəratını təyin etmək istəyən, vətəndaşlarının təhlükəsizliyini, ərazi bütövlüyünü təmin etmək istəyən Azərbaycan Respublikası Rusiya Federasiyasının imperiya siyasəti ilə zorla imperiyanın yeni variantı olan MDB-yə qoşulmağa məcbur edilir. Bu isə müstəqilliyini elan etmiş dövlətlər tərəfindən tanınmış respublikanın həyati mənafeyinə və beynəlxalq hüquq normalarına ziddir.
Xocalı genosidi MDB-nin 366-cı hərbi hissəsinin bilavasitə iştirakı nəticəsində bu qədər dəhşətli dərəcədə törədilə bilmişdir.
İmperiya Qarabağ məsələsini bu dərəcəyə çatdırmaqla, onu genosid səviyyəsinə qaldırmaqla, öz hərbi qüvvəsindən köməksiz və müdafiəsiz xalqa qarşı istifadə etməklə maskasını yırtdı, əsl simasını göstərdi və bir daha sübut etdi ki, Azərbaycan Respublikasının taleyini zorakı, siyasi, diplomatik vasitələrlə həlli Rusiya Fedorasiyasının daxili işidir. Bu isə bütün beynəlxalq qanunlara, normalara daban-dabana zidd olduğundan təcavüzkarlar və hər cür təcavüz qiymətləndirilərək vaxtında cəzalanmalıdırlar.
Qarabağ və Azərbaycan Respublikasının digər yerlərində, sərhəd boyu ərazilərdə törədilən qırğınlarla imperiya Azərbaycanın daxili və xarici siyasətini imperiya mənafeyi istiqamətində kökləyir və respublikada gərginliyi artırmağı, daha vəhşi və dəhşətli üsul və vasitələrlə böyük genosid həyata keçirməyi planlaşdırır. MDB müstəqil dövlətlərin birliyi kimi yaranıb demokratiya, öz hüququnu təstiq etmək və bu prinsipləri elan etsə də, həqiqətdə xalqları silahlandırır, sonra bu qırğınları tarazlayır, nəticədə heç bir ağıla, idraka, hüquq və əxlaqa sığmayan Xocalı genosidi kiimi faciələr törədilməsini, genosidi mümkün edir.
Azərbaycan Respublikası bütün vəziyyəti və şəraiti nəzərə alaraq müraciət edir:
Xocalı şəhərində erməni döyüşçüləri, Ermənistan və MVD-nin 366-cı matorlaşdırılmış hissəsi tərəfindən törədilən faciə Azərbaycan xalqına qarşı ən qəddar üsul və vasitələrlə həyata keçirilən genosid olduğunu qeyd edir, ona Xatın, Sonqmi faciəsi kimi siyasi qiymət verir, Xatın, Sonqmi, Naqasaki və Xirosima faciələrinə verilən qiymət və status verilməsi məsələsini qaldırır.
Təcavüzkarların pislənməsi, münaqişənin zorakı vasitələrlə davam etdirilməsində maraqlı olan MDB və Ermənistan Respublikasına qarşı cəza tədbirlərinin tətbiq edilməsi, iki qonşu dövlətin üçüncü dövlətin siyasi və iqdisadi mənafeyinin ifadəçisinə çevrilmədən öz münasibətlərini dinc siyasi vasitələrlə nizama salması, regionda BMT nizamnaməsinin, digər beynəlxalq aktların təstiqinin əməli ifadəsi olardı.
Azərbaycan Respublikası BMT-nin üzvü kimi bütün bəşəri hüquqlarının qəbul edilmiş beynəlxalq normalara, beynəlxalq hüququn subyekti kimi dinc, siyasi və diplomatik vasitələrlə müdafiə edilməsi, Azərbaycanın tam və hərtərəfli müdafiə edilməsi, Azərbaycan xalqının soyqırımına, insan hüquqlarının və azadlıqlarının tapdanmasına, Xocalı soyqırımına, insan hüquqlarının və azadlıqlarının tapdanmasına, Xocalı genosidinə siyasi qiymət verilərək Azərbaycanın daha böyük miqyaslı fəlakət zonasına çevrilməsinə son qoymuş olar və bu məqsədlə də parlament müraciət edir”.
