Bu günlərdə Maliyyə Nazirliyi belə bir məlumat yaydı ki, ötən ilin büdcə vəsaitlərindən 381 milyon manatı xərclənməmiş qalıb. Millət vəkili, iqtisadçı ekspert Vahid Əhmədovla söhbətimizi də elə bu məlumatdan saldıq. Beləliklə, Moderator.az-ın suallarını V. Əhmədov cavablandırır:
-Vahid müəllim, məmurların nəfsinin Həzrət Əlinin qılıncından iti olduğu bir vaxtda qanunvericilikdə hansı boşluq var ki, onlar 381 milyon manatı xərcləməyə fürsət tapmayıblar?
-Burada
qanunvericilikdəki boşluqlardan söhbət gedə bilməz. Bilmək lazımdır ki, dövlət
büdcəsi heç vaxt yüz faiz icra olunmayıb. Yəni gəlirlərin xərc hissəsində ən
yüksək icra faizi elə ötən il olub-səhv etmirəmsə 96,1 faiz. Bu baxımdan müstəqilliyimizdən
bu yana 2013-cü il bu baxımdan ən yaxşı il sayılır. Sadəcə ayrılan vəsaitlərin
xərclənməsində elə tələblər qoyulur ki, onu icra edə bilmirlər. Hər hansı bir
nazirlik və ya təşkilat Maliyyə Nazirliyinə vəsait üçün müraciət edəndə ondan tələb
edirlər ki, proqramını gətir görək bu pulu necə və konkret nəyə xərcləyəcəksən.
Əsasən də investisiya layihələrinin icrası zamanı bu kimi suallar və tələblər
ortalığa çıxır və bu zaman pul istəyən təşkilat tələbləri sonadək icra edə bilmədiyinə
görə Maliyyə Nazirliyindən həmin pulu ala bilmir.
-Bəlkə
də dövlət büdcəsinin ora-burasından budayırlar ki, büdcə kəsirini bu yolla
qapatsınlar...
-Yox.
Büdcə təsdiq olunubsa, maliyyə ayrılıbsa icra olunmalıdır. Əgər icra olunmursa
deməli hansısa layihələrdə və proqramlarda çatışmazlıqlar aşkarlandığından Maliyyə
Nazirliyi tərəfindən pulun ayrılması məqsədəuyğun hesab edilməyib.
-Bu
gün cəmiyyətdə ən çox müzakirə predmetinə çevrilmiş bir problem də Azərbaycan
ailələrinə qənim kəsilən, çoxsaylı sosial-humanitar fəlakətə yol açan yüksək kredit
faizləri və az qala bir milyard manata çatan qaytarılmayan kreditlərdir.
-Srağagün
də İTV-də bununla bağlı yarım saatlıq çıxışım oldu. Bu gün ölkənin ən ciddi məsələlərindən
biri də budur. Biz niyə az qala hər gün bank faizlərindən danışırıq? Təbii ki,
riskləri nəzərə aldıqda bank faizlərinin yüksək olması müəyyən qədər
anlaşılandır. Amma daha bu dərəcədə də yox. İnsanları aldatmaq üçün çoxsaylı
reklam kampaniyalarına əl atmaq, bir sözlə, müştərini yoldan çıxarmaq, faizsiz
kredit adıyla insanları şirnikləndirərək bəlaya düçar etmək sonda humanitar fəlakətə
səbəb olur. İnsanlar da bu kreditlərə möhtac olduğundan asanlıqla bu tələyə
düşür. İmkanı olan gedib belə bir məngənəyə özünü salarmı? Kredit nədir? Əvvəllər
borc və ya sələm verərdilər, indi də bunu kreditlə əvəz ediblər. Aldığım son məlumatlara
görə artıq qaytarılmayan bank kreditləri 900 milyon manatı keçib. Halbuki bir
neçə il bundan qabaq bundan iki dəfə az idi bu cür problemli kreditlərin həcmi.
Sadəcə hamı bu barədə danışsa da problemin kökünü araşdırmaq istəyənlər sanki
azdır. Niyə bank faizləri bu qədər yüksəkdir? Gəlin baxaq görək bankın kapitalı
hardan əmələ gəlir? Birincisi müştərilər tərəfindən qoyulan əmanətlərdir.
İkinci mənbə Mərkəzi Bankın ayırdığı mərkəzləşdirilmiş kreditlərdir, üçüncüsü də
ola bilər ki, beynəlxalq maliyyə qurumları müəyyən faizlərlə kredit tranşı
ayrırır. İndi gəlin əmanətlərə baxaq. Bu vaxta qədər əmanətlərin yalnız illik
12 faiz olmaqla 30 min manatadək olan hissəsi sığortalanırdı,amma sonradan
risklərin artdığını əsas gətirərək banklar bu əmanətlərin faizlərini 2 faiz də
aşağı saldılar. Hələ son vaxtlar bu faizləri yenə də aşağı salmaq barədə
söz-söhbətlər danışılır ki, əmanətləri 2 faiz də aşağı salaraq illik 8 faiz
etsinlər. Mərkəzi Bank tərəfindən verilən mərkəzləşmiş kreditlərsə ümumi
kreditlərin uzağı 7-8 faizini təşkil edir. Hər beynəlxalq təşkilat da banklara
asanlıqla kredit verən deyil. Onlar bankın reytinqinə, kapitalına, dövriyyəsinə,
likvidliyinə baxdıqdan sonra kredit verməyə razılaşır. Deməli, əsas ağırlıq elə
banka pul qoyan əmanətçilərin üzərinə düşür. Elə isə niyə onlardan bu cür aşağı
faizlərlə depozit götürüldüyü halda bundan az qala 3 dəfə baha kredit təklif
edirlər? Bilirsiniz, gizlətmək lazım deyil ki, banklar da inhisardadır və ona
görə də rəqabət mühitinin olmaması sonda bu cür acınacaqlı vəziyyətə gətirib
çıxarır. Amma bank faziləri mütləq aşağı salınmalıdır. Çünki əhalinin hamısı
banklardan asılı vəziyyət düşüb. Biz hətta Mərkəzi Banka təklif etdik ki, gəlin
Milli Məclislə bir yerdə oturub müzakirə edək. Biz də öz arqumentlərimizi
qoyaq, onlar da, nəticədə ortaq məxrəcə gələrək müəyyən bir qərar qəbul edək.
Milli Məclisin sədri cənab Oqtay Əsədov da dedi ki, gəlin oturub bu məsələni
müzakirə edib ortaq məxrəcə gələk.
-Təcrübə
göstərir ki, bu cür problemlərin qismən də olsa həlli üçün hökmən prezidentin
siyasi iradəsi tələb olunur, əks halda buzu yerindən tərpətmək olmur...
-Haqlısınız.
Ümumiyyətlə bir çox məsələlərdə hamı gözləyir ki, prezident müdaxilə etsin. Axı
prezidentin də hər şeyə müdaxilə etməyə imkanı yoxdur. Amma bir daha deyirəm,
Milli Məclisin sədri səviyyəsində bu problemə müdaxilə edilib və ola bilsin ki,
yaz sessiyası dönəmində bu məsələyə bir daha qayıdılsın. İlikin olaraq bizim
komitə və Mərkəzi Bank işləməlidir ki ümumi bir rəyə gəlmək mümkün olsun.
-Həmin
problemli kreditlərin əksəriyyəti avtokreditlərdi. Əslində son günlərin müzakirə
predmeti olan bu kreditlərin verilməsi qaydalarının sərtləşdirilməsi ona görə
xeyirlidir ki, yerindən duran gedib maşın alıb sonradan bankı da, özünü də, məhkəmələri
də işə salmasın.
-Gəlin
açıq danışaq. Mən hələ 92-ci ildə baş nazirin birinci müavini işləyəndə də biz
bu hesablamaları aparırdıq. O vaxt Azərbaycanda cəmisi 80 min avtomobil vardı.
Ancaq bu gün artıq bu avtomobillərin sayı milyon yarımı keçib. Yollarda da çox
böyük dəyişiklik olmayıb və demək olar ki, həmin yollardı. Əksinə, 7 rayonumuz
işğalda və həmin rayonların da maşınları burdadır. Ona görə də dəhşətli sıxlıq
yaranıb. Xəbəriniz oldu yəqin, Nazirlər Kabineti də idxal olunan benzinə tətbiq
edilən verginin ləğvi barədə qərar qəbul elədi. Yəni Azərbaycanın öz
zavodlarında istehsal olunan benzin çatışmır. Biz məcburuq ki, xaricdən benzin
idxal edək.
-Bəs
xaricdə 50 milyard vəsaiti niyə yatızdırmışıq, onu gətirib tutaq ki, Yevlaxda,
Şirvanda, Gəncədə müasir neftayırma zavodları tikə bilmərikmi?
-Tamamilə
düz deyirsiniz. Ümumiyyətlə, belə bir proqram üzərində iş gedir və zavodların
Qaradağ rayonuna köçürülməsinə başlanılacaq. Bundan əlavə də siz dediyiniz kimi
bu cür emal sənayesini regionlara yaymağa ehtiyac var. Bu böyük bir mövzudur.
Qaytarılmayan kreditlər yalnız bank üçün yox, ölkənin maliyyə bazarı üçün ciddi
problemə çevrilməkdədir. Tutaq ki, sabah həmin vətəndaş pulu ödəyə bilmədi.
Bank həmin maşını geri qaytarıb kimə satasıdır ki? Doğrudur, burda banklar ola
bilsin ki, ilk baxışda görünməyən əlavə gəlirlər də götürürlər və bu zaman o qədər
də ziyana düşmürlər. Ona görə də Mərkəzi Bankın avtokreditlərin verilməsindəki
sərtləşdirmə qərarını başa düşmək lazımdır və məncə bu doğru qərardır. Bu sahəni
indiyədək başlı-başına buraxıblar deyə xaos yaşanır.
-Dəfələrlə
toxunsaq da yenə də açıq qalan bir mövzuya da toxunmağa ehtiyac var. 50 milyard
manatı xaricdə mənasız şəkildə saxlamaqdansa niyə onun bircə milyardını gətirib
tutaq ki, islam bançılığı modeliylə ölkənin aztəminatlı təbəqəsinə kredit şəklində
vermirlər? Bunu etmək bu qədərmi çətin məsələdir?
-Yadınızdadırsa
hələ 2008-ci ildə dünyada qlobal maliyyə böhranı yaşanmağa başlayanda cənab prezident
hökumətin iclasında gösəriş verdi ki, 2-3 milyard gətirib banklara verin, onlar
da aşağı fazilə camaata versin. Ancaq bunu etmədilər. Bunu etsəydilər birincisi,
həmin bankların dövriyyə vəsaitləri genişlənərdi, likvidliyi təmin olunardı,
ikincisi də həmin vəsaitlərin aşağı faizlərlə əhaliyə verilməısi problemin belə
bir miqyas almasına gətirib çıxarmazdı. Bunu niyə etmədilər, mən başa düşmədim.
-Sonradan
prezidentin bu məsələnin üstünə bir daha qayıtmaması ondan xəbər verib ki, onu
da lazımınca təlimatlandırdıblar...
-Görünür,
prezidenti inandırıblar ki, buna ehtiyac yoxdur. Amma mən hesab edirəm ki, həmin
vəsaitə bu gün də ehtiyac var. İslam bankçılığı isə tamam başqa mövzudur və
onun da müsbət-mənfi cəhətləri var. Bu yaxınlarda Bakıda bununla bağlı bir
geniş konfrans keçirildi və mən də orda çıxış elədim. Düşünürəm ki, islam
bankçılığı da tezliklə ölkəmizdə genişlənəcək. Mən biləni bu istiqamətdə də işlər
gedir.
-Hər
gün telekanallarda Quba fermerlərinin giley-güzarını eşidirik ki, meyvələri
bazar dərdindən ya xarab olur, ya da əlacsızlıqdan mal-qaraya verirlər.
-Bu
problem var. Özü də çox ciddi problemdir. Doğrudur, əvəlki illərə nisbətən müəyyən
qədər həlli tapılıb. Bu problem təkcə Quba-Qusar zonasında deyil, meyvə-tərəvəzlə
məşğul olan bütün regonlara xas problemdir. İqtisadiyyat və Sənaye Nazirliyi bu
günədək 15-ə yaxın soyuducu anbarlar tikib təhvil verib. Amma bu da çıxış yolu
deyil və unutmaq olmaz ki, bu anbarlar meyvə-tərəvəzin müvəqqəti saxlanılması
üçündür, bu məhsulların bazarı olmalıdır ki, onu sata bilsinlər. Heç kimə sirr
deyil ki, bu məhsulların ən geniş bazarı Rusiya olub. Son vaxtlar bu ölkədə baş
verənlər, soydaşlarımıza qarşı yol verilən özbaşınalıqlar münasibətlərdə bir qədər
gərginlik yaratdı. Bu üzdən bazarlara çıxış məhdudlaşdırılıb. Ən böyük problemlərdən
biri də Azərbaycana geni dəyişdirilmiş məhsulların gətirilməsidir. Bu gün
bazarlara gedin baxın görün yerli məhsul çoxdur, yoxsa xaricdən gətirilən mənşəyi
bilinməyən meyvə-tərəvəzlər? Biz bununla bağlı dövlət başçısı səviyyəsinədək
fikirlərimizi bildirmişik, o da müvafiq göstərişlər verib. İki gün öncə Böyük
Britaniya səfirliyində böyük bir konfransa qatılmışdıq. Həmin tədbirdə də ərzaq
təhlükəsizliyi məsələsi müzakirə edilirdi. Mən orda çıxışımda da geni dəyişdirilmiş
məhsulların bazarlarda üstünlük təşkil etməsinə diqqəti yönəltdim. Başqa bir
problem də regionlardakı fermerlərin İsraildən, Fransadan, Almaniyadan gətirilmiş
toxumlardan istifadə etmələridir. Halbuki öz dədə-baba meyvələrimizün keyfiyyətdə
dünyada anoloqu yoxdur.
-Siz
15 soyuducu anbar tikilməsindən danışdınız. Ancaq hər gün mətbuatdan,
televiziyadan eşidirik ki, fermerlər qiymətlərin baha olması üzündən məhsulu
evlərin damında və ya ya zirzəmilərdə saxlamaq zorunda qalıblar. Yəni bu
soyuducu anbarlar da dərdə dərman olan deyil.
-Soyuducu
anbarlar kifayət qədər deyil. Onların sayını çoxaltmaq lazımdır. Ancaq unutmaq
olmaz ki, soyuducu anbarlar müvəqqəti saxlama üçündür, onu illərlə saxlamaq
mümkün deyil. Yanvarın 17-də cənab prezidentin kənd təsərrüfatının inkişafı
üçün bir sərəncamı oldu. Sərəncamda qablaşdırma və emal sənayesi ilə bağlı da
müddəa var ki, biz məhsulumuzu dünya standartlarına uyğun qablaşdıraraq xarici
bazarlara da asanlıqla çıxara bilək.
-Geni
dəyişdirilmiş məhsulların idxalının məhdudlaşdırılması üşün qanun ola-ola niyə bu
sahədə vəziyyət bu cür acınacaqlıdır?
-Qanun
olsa da işləımir. Əslində bütün sərhədlərimizdə həm Dövlət Sərhəd Xidməti, həm
də Standartlaşma, Metrologiya və Patent üzrə Dövlət Komitəsi tərəfindən xüsusi
laboratoriyalar quraşdırılmalıdır ki, geni dəyişdirilmiş məhsullar ölkəyə
buraxılmasın. Ölkəyə gələn bütün meyvə-tərəvəz həmin laboratoriyalarda
yoxlandıqdan sonra buraxılmalıdır. Ancaq çox təəsüsflər olsun ki, maraq dairəsi
geniş olduğu üçün bu məhsullar asanlıqla bazarlara yol tapır.