Məktubda deyilirdi: “Bankda çalışan bütün əməkdaşların ümumi problemi banka rəhbərlik edən Hüseyn Özmenin, sədr müavinləri Doğan Tandoğanın və Ramin Kərimovun, onların əlaltısı olan insan qaynaqları şöbəsinin müdiri Cəmil Novruzovun özbaşınalıqlarıdır. 

Ümid edirik ki, bizi heç kim eşitməsə də, siz eşidəcəksiniz və yazdıqlarımı qəzetiniz vasitəsilə cəmiyyətə çatdıracaqsınız. Bəlkə bu azğınlaşmış adamlar bundan nəticə çıxara bildilər. Bankda özbaşınalıq baş alıb gedir. Sədr Hüseyn Özmen işçiləri onun xoşuna gəlib-gəlməməsiylə qiymətləndirir. Onun xoşuna gəlməyən adam bu bankda işləməməlidir. Azərbaycanın Əmək Məcəlləsinə heç bir məhəl qoymur və öz şəxsi kefinə görə kimi istəsə işdən çıxarır. Doğan Tandoğan isə çox kobud adamdır. O, özünü Azərbaycan mentalitetinə uyğun aparmır. Qabağına çıxan bütün işçiləri xanım demədən, yaşlı demədən təhqir edir. Çünki bilir ki, heç kim ona cavab verməyəcək. Cavab verən elə həmin gün işdən çıxarılacaq". 

Bununla bağlı ASB-nin qəzetimizə təkzib məktubu daxil oldu. Bankın təkzib məktubunda bildirilir ki, həmin yazıda ASB-nin rəhbərliyi barədə bəzi qərəzli fikirlər və həqiqətə uyğun olmayan məlumatlar öz əksini tapıb: “Həmin yazıda qeyd olunanlara etirazımızı bildirir və aşağıdakıları diqqətinizə çatdırırıq. Bildirmək istəyirik ki, əmək müqaviləsinin müddətli və müddətsiz bağlanması əsasları və şərtləri Azərbaycan Respublikasının Əmək Məcəlləsində göstərilib. Bankımızda həm müddətli, həm də müddətsiz əmək müqaviləsi ilə çalışan işçilər var. Həm Azərbaycanda, həm də dünya praktikasında əmək müqavilələrinin müddətli və müddətsiz bağlanması təcrübəsi mövcuddur. Azərbaycanda fəaliyyət göstərən bankların böyük əksəriyyəti müddətli əmək müqaviləsinin tətbiq edilməsi təcrübəsindən istifadə edirlər. Bankımızda da bu təcrübə tam qanunauyğun şəkildə tətbiq edilir, heç bir işçi ilə məcburi qaydada müddətli əmək müqaviləsinin bağlanması hallarına yol verilmir. Bu müddət ərzində işçilər tərəfindən banka qarşı hər-hansı məhkəmə iddiası da qaldırılmayıb. Bu barədə qəzetinizdə dərc olunan məlumatlar həqiqətə uyğun deyil”.

Bununla belə, sözügedən məktubun tam mətni musavat.com-da dərc olunduqdan sonra yazılan şərhlər yeni nüansları ortaya çıxartdı. Şərhlərin məzmunundan bəlli olur ki, müəlliflər kənar şəxslər yox, elə bankın öz əməkdaşları və ya oradakı proseslər barədə kifayət qədər məlumatlı şəxslərdir. Həmin şərhləri maraqlı tərəflərdən birinin - işçilərin mövqeyi olaraq ictimailəşdirməyi lazım bildik. 

Əkbər adlı oxucu yazır:  “Deyilir ki, ASB işçiləri müddətli əmək müqaviləsi bağlamağa məcbur etmir. Bilirsiniz, 16 yanvar tarixində, yəni ASB haqqında yazı dərc olunduqdan sonra Abdulbari bəy (patron) göstəriş verdi (”Azərsun-holdinq"-in prezidenti Abdulbari Gözəl nəzərdə tutulur - red.). Bütün işçilərdən 6 aylıq müqavilələri yığdılar və gözlərinin qarşısında cırdılar. Hamı bilirdi ki, bu, işçilərə hörmət üçün deyil, sadəcə ortada dəlil saxlamamaq üçün edirlər bunu. Belə də oldu. Müqavilələr cırılandan sonra təkzib yazdılar. Bəs əlil işçi olan Nailə Vəliyevanı kim məcbur etdi 3 aylıq müddətli əmək müqaviləsi bağlamağa? Sonra onu da işdən çıxartdılar. Əlil işçini, hansı ki öz gəliri ilə kasıb olan ailəsinə ciddi dəstək verirdi, çıxarmaq rəvadırmı? Allah xətrinə bu işçini saxlamaq lazım idi. Bəs Şəhriyar Paşalını kim məcbur etdi müddətli əmək müqaviləsini bağlamağa? Çox adamın adını çəkmək olar. Saxta sənədləri kim tərtib edir işçi barədə, adını da audit hesabatı qoyurlar, hansı ki yalan informasiyalarla dolu və qərəzlidir".

Bankın Nailə adlı keçmiş işçisi yazır: “Haqsızlığa uğrayanlardan biri mənəm. Çünki heç bir xəbərdarlıq edilmədən, zorla və təzminat verilməsin deyə ”öz xahişimlə"  işdən çıxarılmışam".

Şəhriyar adlı keçmiş işçi yazır: “Məni bankın ”Dərnəgül"  filialında 3 aylıq sınaq müddəti şərti ilə kredit və satış bölməsinə keçirtdilər. Sınaq müddəti başa çatandan sonra filial direktorunun işim haqda müsbət rəyinə baxmayaraq rəhbərlik ASB-də işləməyimi məsləhət bilmədi". 

Zakir adlı oxucu yazır: “Biz düşünürük ki, Hüseyn Özmen Abdolbari bəyi aldadır, ona hər mövzuda yalan informasiyalar verir. Abdolbari bəy də görünür ki, inanır. Əminik ki, Özmanın tək məqsədi bacarıqlı, təmiz kadrları uzaqlaşdırmaq və bankda öz şəbəkəsini qurmaq, 70 yaşında yeyinti edib, qaçmaqdır. Biz  türkiyəli sədrlərin yeyinti edib qaçdığını bilirik axı.

ASB kollektivi güclü, inamlı, savadlıdır. Bunu bütün bank sektoru bilir. ASB kollektivini dəyişdirmək istəyən ancaq pis niyyətli ola bilər. Biz imkan verməyəcəyik ki, 70 yaşında, həyatda tək dərdi oğluna (işsiz və avara) sərvət qoymaq olan bu adam öz şəbəkəsini quraraq bankdan oğurluq etsin".

Tahir adlı oxucu yazır: “ASB Bankın Gəncə filialında Əli adlı əməkdaş əyrilik etmişdi. Filialın müdiri Samir bunun üstünü açdı və rəhbərlikdən tədbir görülməsini tələb etdi. Özmen da özündən əvvəlki sədri ləkələmək üçün Samiri əsassız yerə prokurorluğa verib karyerasını korladı”. 

Ayxan adlı sabiq işçi yazır: “Bir çox peşəkar, xaricdə təhsil alıb gəlmiş təcrübəli əməkdaşlarımız var idi. Qeyri-peşəkar və savadsız insanları qəbul etmədilər bir-bir istefa edib getdilər. Hər biri də daha gözəl işlərə dəvət olundular. Özünə hörmət eləyən heç kəs bu savadsız və qabiliyyətsiz rəhbərlərlə işləməyi özünə rəva bilməz. Mən Özmen ilə Dünya Bankı layihəsində bir yerdə işləmişik. Qeyri-peşəkarlığı ilə layihəni batırdı”.

Bir oxucu ASBBANK adı altında yazır: “Bank rəhbərliyi ilə uzun müddətdir dostluq edən Yadigar bəy vardı. Gözəl insandır. Yadigar bəy bunların qeyri-peşəkarlığına (vəziyyətin bu nöqtəyə gəldiyini qabaqcadan görə bilirdi) dözə bilməyib iradını bildirdi, başa düşmədilər, istefa verməyə məcbur oldu. Hətta öz etibar etdikləri şəxs də bunların hərəkətindən qorxdu.  Bu rəhbərlik gələndən sonra kredit portfeli 70 faiz azalıb, bank zərərlə işləyir. AMAY-dakı problemli yer 4 milyona satıldı. Bu, təsadüfü gəlirdir. İndi patrona deyəcəklər ki, ”bu il gəlirlə işləyirik". Patron haradan biləcək ki, gəlir haradandır?"

Bir çox hallarda şərhlər bir-birini təkrarlayır, bəzilərində isə təhqir halları var idi. Ona görə də şərhlərin qısa xülasəsini verməyə məcbur olduq. Yazıda adı çəkilən hər bir şəxsin və bank rəhbərliyinin mövqeyini yenidən dərc etməyə hazırıq.