Moderator.az Azadlıq.info-ya əsasən məlumat verir ki, 2013-cü il iyunun 13-də DIN-in Insan Alverinə Qarşı Mübarizə Idarəsi və Baş Pasport, Qeydiyyat və Miqrasiya Idarəsinin Qanunsuz Miqrasiyaya Qarşı Mübarizə Idarəsi əməkdaşlarının birgə keçirdikləri əməliyyat nəticəsində Aynur Mehdiyevanın qanunu pozduğunu müəyyən edib. Məlum olub ki, A.Mehdiyeva Filippin vətəndaşının pasportunu götürərək, bir ildən artıq müddətə ev qulluğu şəraitində zor tətbiqiylə onu istismar edib. Keçən ilin iyunun 25-dən faktla bağlı cinayət işi açılıb, filippinli qadını istintaq zərərçəkən kimi tanınsa da, A.Mehdiyeva və ailə üzvləri bugünədək məsuliyyətə cəlb olunmayıb.
Əvəzində, A.Mehdiyevanın və qardaşı M.Mehdiyevin əsassız şikayəti əsasında Milli Şura üzvü, keçmiş deputat Gültəkin Hacıbəyliyə qarşı Yasamal Rayon Məhkəməsində hakim Sərdar Mehbalıyev xüsusi ittiham qaydasında işi icraata qəbul edib. A.Mehdiyeva G.Hacıbəylini qəzetimizin 2013-cü il 5 sentyabr tarixli sayında onun tutulması haqqında yalan məlumat yaymaqda ittiham edib. Nəzərinizə çatdırmaq istəyirik ki, A.Mehdiyevanın tutulması, saxlanılması haqqında xəbəri 2013-cü il 13 iyun tarixində bir çox KIV-lər DIN-in mətbuat xidmətinə istinadən yaymışdı. Daha sonra həmin KIV-lərə istinadən xəbər “Azadlıq”da da yayımlandı. G.Hacıbəyli bu xəbərə müsahibəsində yalnız ən sonda, iki ay sonra istinad etdiyi halda, hakim S.Mehbalıyevin ilkin mənbə rolunda çıxış edən KIV-ləri deyil, Gültəkin xanımı hədəf alması, şübhəsiz ki, keçmiş millət vəkilinin aktiv siyasi fəaliyyəti ilə bağlıdır və siyasi təqibdir.
Hakimiyyət G.Hacıbəyliyə qarşı saxta icraata dərhal başlasa da, M.Mehdiyevin 17 may 2013-cü il tarixindəki “məşhur” mətbuat konfransında xanım Hacıbəylinin ünvanına səsləndirdiyi və hakimiyyətin bütün ölkəyə yayımladığı açıq təhqir və böhtanlara görə onu məsuliyyətdən yayındırır. Hazırda maraqlı məqamlardan biri A.Mehdiyevanın saxlanması faktıdır. A.Mehdiyeva saxlanmayıbsa, niyə hakimiyyətyönlü KIV-lər DIN-ə istinadən onun tutulması ilə bağlı kütləvi məlumatlar yayıblar. Burada KIV-lərin və DIN-in mətbuat xidmətinin hansı marağı ola bilərdi? Ən maraqlı məqam isə, yuxarıda qeyd edilən bu qədər aşkar cinayət faktlarının qarşılığında A.Mehdiyevanın onu ifşa edən DIN-in iki idarəsinin əməkdaşları tərəfindən saxlanmamasıdır. Axı belə ağır bir insan alveri faktını aşkar edən polis əməkdaşlarının bu əməli törətməsi şübhə doğurmayan (bu barədə DIN-in rəsmi saytı dərhal məlumat yerləşdirib) A.Mehdiyevanı saxlamaması qulluq səlahiyyətlərini aşma, ciddi qanun pozuntusudur. Bu suala, eləcə də istintaqın niyə 8 aydan artıq bir vaxtda yekunlaşmaması, A.Mehdiyevanın hansı məqsədlə məsuliyyətdən yayındırılması suallarına cavab almaq üçün DIN-in mətbuat xidmətinə müraciət etdik. Əvvəlcə DIN-in mətbuat xidmətindən Insan Alverinə Qarşı Mübarizə Idarəsi ilə əlaqə saxlamağımızı tövsiyyə etdilər. Amma sözügedən idarədən suallarımızı cavablandırmaqdan imtina edərək, mətbuat xidmətiylə əlaqə saxlamalı olduğumuzu bildirdilər. Ötən üç gün müddətində isə mətbuat xidmətiylə dəfələrlə əlaqə saxlamağımıza baxmayaraq, cəhdimiz nəticə vermədi.
Amma Miqrasiya Mərkəzinin rəhbəri Əlövsət Əliyevdən mövzu ilə bağlı xeyli yeni məlumat öyrəndik. Filippinli miqranta hüquqi yardımı təmsil etdiyi təşkilatın həyata keçirdiyini deyən Ə.Əliyev vurğuladı ki, hazırda həmin şəxsin durumu, yaşayış vəziyyəti normaldır: “Biz bu işin məhkəməyə gedəcəyinə çox ümidliyik. Insan Alverinə Qarşı Mübarizə Idarəsinin rəhbərliyilə əlaqə saxlamışam. Idarənin rəhbərliyi də həmin işin daha etibarlı sübutlarının toplanmasının vacibliyini bildiriblər. Hazırda bu işlə bağlı istintaq aparılır və filippinli xanım miqrantlar üçün nəzərdə tutulan xüsusi yerdə yaşayır”.
Ə.Əliyevin fikrincə, sözügedən iş Azərbaycanda insan alverinə qarşı aparılan mübarizənin ən yaxşı nümunəsi kimi müxtəlif hesabatlara daxil edilib. Bununla bağlı AŞ-nın “insan alverinə qarşı mübarizə ilə bağlı” hesabatını hazırlayan QRETA təşkilatına məlumat verdiklərini deyən Ə.Əliyev vurğuladı ki, Azərbaycanda insan alverinin yeni növünün aşkarlanması təqdir edilib. Ə.Əliyev söylədi ki, ABŞ Dövlət Departamenti də hər il insan alveri ilə bağlı illik hesabat hazırlayır. ABŞ DD-nin də bu işlə bağlı məlumatının olduğunu deyən Ə.Əliyev qeyd etdi ki, Azərbaycan üçün insan alverinə qarşı mübarizənin yaxşı nümunəsi kimi iş qeydə alınıb: “Insan alverinin qurbanı olan Filippin vətəndaşı bizim hüquqşünasın iştirakı ilə ibtidai istintaq orqanına ifadə verib. Filippin vətəndaşı onu istismar edən şəxs Aynur Mehdiyeva ilə üzləşdirilib və o, həmin şəxsin üzünə onu istismar etdiyini söyləyib”.