“Müdafiə Nazirliyini nazirlik səviyyəsində idarə etməyi bacaran adam yoxdur”
“Qarabağın azadlığı üçün Azərbaycana beynəlxalq dəstək lazımdır”
“Qarabağ probleminin həll olunmamasının ən böyük səbəbkarı Azərbaycan hakimiyyətidir”
Ələkbər Məmmədov: “Nə qədər ki, bu hakimiyyət var, Qarabağ problemi həll olunmayacaq”
General Zakir Həsənovun Daxili Qoşunlar komandanı vəzifəsindən azad edilərək Müdafiə Nazirliyinin rəhbəri postuna gətirilməsindən sonra orduda müsbət yöndə ciddi dəyişikliklərin baş tutacağı ilə bağlı əsaslı gözləntilər olsa da, hələ ki, bu gözləntilər özünü doğrultmuş deyil. Belə ki, Səfər Əbiyev dönəmində mövcud olan bütün problemlərin - əsgər ölümlərinin, intiharların, rüşvət və korrupsiyanın bu gün də eynən davam etməsi cəmiyyətdə ciddi məyusluqla qarşılanmaqdadır. Fəqət bununla belə, Z.Həsənovun gəlişinin yaxın gələcəkdə orduda əhəmiyyətli dəyişikliklərə səbəb olacağına ümid edənlər də yox deyil. Bu qəbildən olan mütəxəssislər hesab edir ki, nazir təyin ediləndən dərhal sonra Müdafiə Nazirliyinin rəhbərliyində kütləvi dəyişikliklərə imza atan Z.Həsənovun kadr islahatları və bu islahatların nəticəsi özünü qısa müddətdən sonra büruzə verəcək. “Silahlı Qüvvələrə Demokratik Vətəndaş Nəzarəti” Azərbaycan Mərkəzinin direktoru, hərbi ekspert Ələkbər Məmmədovla söhbətimizdə Z.Həsənovun gəlişindən sonra orduda baş verən dəyişikliklərə aydınlıq gətirməyə, bu dəyişikliklərin səbəblərini öyrənməyə çalışdıq.
- Ələkbər bəy, Zakir Həsənov yenicə nazir təyin olunanda ictiami rəydə belə bir fikir var idi ki, orduda müsbət mənada ciddi inkişaf və yeniliklər olacaq. Sizcə Z.Həsənovun müdafiə naziri postuna gəlişindən sonra müsbət mənada hansısa dəyişiklik baş veribmi?
- Yeni təyin edilmiş müdafiə naziri Zakir Həsənovun keçmiş komandanı özünün yeni komandası ilə əvəz etməyindən başqa hələlik yeni bir şey görmürəm. Adamı sadəcə işdən çıxarmaq qayda-qanun yaratmaq demək deyil. Hər kəs qanunsuz əməlinə görə cəzalanmalıdır ki, digərlərinə dərs olsun. Müdafiə Nazirliyində nə baş verir? 20 ilə yaxın Səfər Əbiyevlə hakimiyyət özünü qoruyub saxladı, indi də Zakir Həsənovla özünü qoruyub saxlayacaq. Təzə nazir də ətrafında öz komandasını yaratmaqla məşğuldur. Bunu da guya "orduda islahat aparılır" adı ilə cəmiyyətə sırıyırlar. Necə ki, bunu vaxtilə Səfər Əbiyev etmişdir. Onda da deyirdilər ki, Səfər Əbiyev guya bunu orduda qayda-qanun yaratmaq üçün edir. Nə oldu? Mən elə o vaxtlarda da kimin kim olduğunu deyən adam olmuşdum. Atəşkəs dövrü S.Əbiyevin nazir olduğu dövrdən başlayırdı. Qeyri-döyüş şəraitində baş verən ən çox əsgər ölümləri də elə bu dövrə düşürdü. 1995-2000 və bundan sonrakı illərdə bu məsələni hər dəfə mən qaldıranda Səfər Əbiyevin işdən çıxarılması gündəmə gəlirdi. Lakin onu işdən çıxarmırdılar. İndi görünür İlham Əliyev siyasətində onu qurban vermək lazım olub ki, o, bu addımı atıb.
- Demək belə çıxır ki, Səfər Əbiyevin ordudan uzaqlaşdırılması Azərbaycan ordusunun maraqları baxımından deyil, siyasi hakimiyyətin mənafeyi baxımından gerçəkləşib?
- Bilin! Hakimiyyətdə edilən hər hansı bir dəyişiklik yalniz İlham Əliyevin maraqları çərçivəsində edilir. Belə dəyişiklikdən yaxşı heçnə gözləməyin. Yadınızdan çıxarmayın ki, millətin səsini boğanlardan, millətin üstünə qoşun çəkənlərdən biri də Zakir Həsənovdur. Onu da deyim ki, Daxili Qoşunlar hakimiyyəti qoruduğuna görə orada təminat məsələsi birinci yerdə dururdu. Bu, heç də Zakir Həsənovun bacarıq və qabiliyyətindən irəli gəlmirdi. Bir də yadınızdan çıxarmayın ki, Zakir Həsənovun bu günlərə qədər rəhbərlik etdiyi Daxili Qoşunlarda da istənilən qədər problemlər var idi.
- Lakin nədənsə ölkə mətbuatında Daxili Qoşunların adı mənfi tendensiya və olaylar baxımından digər qoşun növləri ilə müqayisədə daha az hallanıb.
- Bu, ona görə belə olub ki, Daxili Qoşunlardakı problemləri açıb-ağardan yox idi. Çünki şikayət edən yox idi. Bilirsiniz niyə? Çünki ora pul verib düşürdülər. Buna görə də səslərini çıxarmırdılar. Qorxurdular ki, şikayət etsələr onları cəbhə bölgəsinə göndərərlər. Ona görə də dözürdülər, amma səslərini çıxarmırdılar.
- Sizcə orduda mövcud olan ənənəvi problemlərin ”“ korrupsiyanın, dedovşinanın və s.qanunsuzluqların qarşısını almaq üçün konkret olaraq hansı addımlar atılmalıdır?
- Dediklərinizin hamısıni yaradan iqtidarın qurduğu rejimdir. Başında da onlar durur. Onlar düz olsalar hər şey də öz qaydasına düşər. Görülən işlərin hamısı isə görüntü xarakteri daşıyır və xalqı aldatmaqdan başqa bir şey deyildir. Ölkədə bu illər ərzində, görürsünüz ki, hüquqi dövlət baxımından yaxşılığa doğru heç bir dəyişiklik olmur. Əksinə, vəziyyət günü-gündən daha da pisləşir. Belə olduğu halda ayrıca MN-yi sistemində hansısa dəyişikliyə nail olmaq olarmı? Qətiyyən yox. Necə deyərlər - balıq başından iylənir. Əvvəla, prezident vəzifəyə qabiliyyət və bacarığına görə adam təyin etmir. Onun təyin etdiyi adamlar bacarığına görə deyil, prezidentə nə dərəcədə yaxın olub-olmaması, sədaqəti ilə ölçülür. Prezident tərəfindən təyin olunan hər kəs ilk növbədə qayda-qanunun yaradılmasını fikirləşmir. Onların fikirləşdikləri o olur ki, prezidentə göstərdikləri sədaqətdə səhvə yol verməsinlər. Bu prinsiplə də işləyirlər. Belə yanaşmada az-cox qabiliyyəti olan da sonradan oz qabiliyyətini itirir.
- Söylədiklərinizdən belə bir nəticəyə gəlmək olar ki, bu gün Müdafiə Nazirliyi rəhbərliyində təmsil olunan şəxslərin əksəriyyəti öz vəzifələrinin öhdəsindən gələ bilmir, elədir?
- Elədir. Nazirliyi nazirlik səviyyəsində idarə etmə bacarığı olan adam yoxdur. Ona görə də yaxın gələcəkdə yaxşı nəsə olacağına inanmıram. Çünki bu illər ərzində biz bunun şahidi olmuşuq. Hər şey eyni ilə təkrarlanır. Görürsünüz, əsgər ölümlərinin qarşısını ala bilmirlər. Onları insan taleyi maraqlandırmır. Öz maraqlarını güdürlər. Səfər Əbiyevi də əsgər ölümlərinə görə işdən çıxartmadılar.
- Bəs nə üçün çıxartdılar?
- Onu Azərbaycandakı ABŞ səfiri ilə danışığını yazmasından sonra dövlətlərin S.Əbiyevə itirdikləri etimad İlham Əliyevi məcbur etdi ki, S.Əbiyevi işdən çıxartsın. Əks halda, ölkə başçısının özü onlar qarşısında pis vəziyyətdə qala bilərdi. S.Əbiyevi qurban verməklə özünü təmizə çıxardı. Eyni zamanda da ordunu qıraq, yad adama - Qərbi qane edən adama tapşırmadı.
- Sizcə mövcud ordu, mövud hakimiyyət və mövcud siyasətlə Qarabağı işğaldan azad etmək mümkündürmü? Azərbaycan ordusunun qüdrəti və məğlubedilməzliyi ilə bağlı hərbi-siyasi yetkililərin açıqlamalarında həqiqət payı varmı?
- Sözsüz ki. Azərbaycan ordusu əvvəlki kimi pərakəndə vəziyyətdə deyil. Amma bu da o demək deyildir ki, Qarabağı işğaldan qurtarmaq imkanına malikdir. Erməni işğalçılarının müdafiə olunmaq istiqamətində gördükləri hazırlığı da yaddan çıxarmamalıyıq. Həm də Qarabağın işğaldan azad olunmasında əsas rolu ordudan çox Azərbaycana beynəlxalq aləmin göstərəcəyi dəstək həll edəcək. Bax bu istiqəmətdə hakimiyyət nə iş görüb, önəmli olan budur. Hər şey beynəlxalq aləmin dəstəyindən asılı olacaq. Təəssüf ki, hakimiyyətin bu müstəvidə gördüyü iş də Azərbaycanın əleyhinə olan işlərdi, hansı ki, erməni tərəfi də bundan əleyhimizə yaxşıca istifadə edir. Qarabağı fikirləşən ölkəni bu vəziyyətə gətirib çıxarmazdı. Ölkədə tikinti işləri aparmaqla dünyanin dəstəyini qazanmaq olmaz.
- Beynəlxalq dəstəyə nail olmaq üçün nə etmək lazımdır?
- Dünyada Azərbaycanı korrupsiyalaşmış, antidemokratik, insan hüquq və azadlıqları pozulan bir dövlət kimi tanıyırlar. Belə olduqda Qarabağ probleminin həllində ermənilər beynəlxalq aləmin dəstəyini daha çox qazanırlar, nəinki, Azərbaycan. Baxmayaraq ki, Azərbaycan torpaqları işğal olunub. Azərbaycan hakimiyyətinin yürütdüyü siyasət Qarabağ probleminin həllində beynəlxalq aləmin Azərbaycana dəstək verməsinə imkan vermir. Görülən işlərin hamısı popilist işlərdən başqa bir şey deyil. Qarabağ probleminin istər sülh yolu ilə, istərsə də hərbi əməliyyat yolu ilə həll olunmamasının ən böyük səbəbkarı Azərbaycan hakimiyyətidir. Azərbaycan hakimiyyətinin antidemokratik, korrupsioner və nəhayət cinayətkar olması beynəlxalq birliyə mövcud pronblemə Azərbaycan maraqları çərçivəsində yanaşmağa imkan vermir. Buna görə də nə qədər ki, bu hakimiyyət var, Qarabağ problemi də həll olunmayacaq.
Seymur Əliyev
.