Dünən bir qrup şəhid ailəsi və Qarabağ əlilləri Prezident Administrasiyasının (PA) binası qarşısında aksiya keçirdi. Aksiya polis təzyiqi altında dağıdıldı. Etiraz edənlər bildirdilər ki, 2010-cu ildən bu günə kimi Azərbaycanın ərazi bütövlüyü uğrunda şəhid olmuş şəxslərin varisləri və aldıqları xəsarətlərdən əlil olmuş şəxslərə ödənilməli olan dövlət icbari sığorta ödənişləri verilmir. 

Onlar aksiyanın Konstitusiya Məhkəməsinin qarşısına təyin etmələrini belə əsaslandırdılar: Bu ilin oktyabrın 25-də Konstitusiya 

Məhkəməsində Fərhad Abdullayevin sədrliyi ilə və Ali Məhkəmənin sorğusu əsasında “Hərbi qulluqçuların dövlət icbari şəxsi sığortası haqqında” qanunun bəzi müddəalarının şərh olunması üçün növbəti xüsusi konstitusiya icraatı qaydasında keçirilən iclasının qərarı elan olunmayıb. İclasın keçirilmə vaxtından iki ay keçəsə də, nəticəsi barəsində məlumat verilməyib. Aksiyaçılar iclasın qərarının elan olunmamasına etiraz edirlər.

Xatırladaq ki, dekabrın 5-də Qarabağ əlilləri və şəhid ailələri Konstitusiya Məhkəməsinin binasının qarşısında piket keçirmişdilər. Onlara vəd verilmişdi ki, yaxın 10 gün ərzində qərarın təqdim olunacaq. Aksiyaçılar vurğuladı ki, bütün dövlət qurumlarına müraciət ediblər, nəticəsi yoxdur. Odur ki, prezident İlham Əliyevin maşın karvanının keçdiyi yolun kənarında, əllərində plakatla dayanmaq istədilər.

“Şəhidlərin şəkilləri ilə yolda dayanmaq istədik. Prezident bizi görsün, bizimlə maraqlanmasını istədik. Amma polis yolun kənarında, səkidə belə dayanmağımıza icazə vermədi. Bizə təzyiq göstərərək ordan uzaqlaşdırdılar, imkan vermədilər ki, məmurların özbaşınalığı barəsində ona müraciət etdik”, deyə “İtkin düşmüş şəxslərin ailələrin müdafiəsi” İctimai Birliyinin rəhbəri Bətulə Cabbarova bildirdi.

“Şəhid ailələrinə Sosial Dəstək” İctimai Birliyinin hüquqşünası Şəhriyar Əbilov dedi ki, məsələ ilə bağlı şəhid ailələri müvafiq qurumlara müraciət ediblər. Həmin qurumlardan onlara bildirilib ki, 1 sentyabr 2000-ci il tarixinədək qüvvədə olan Mülki Məcəllənin 73-cü maddəsinə əsasən hüququ pozulmuş şəxsin iddiası üzrə onun hüquqlarının müdafiə etmək üçün ümumi müddət (iddia müddəti) üç il müəyyən edilib. Qeyd edilən hal mülki qanunvericiliyin tələblərinə görə sığorta ödənişinin verilməsindən imtina edilməsi üçün əsasdır. İddia müddəti üçün nəzərdə tutulan üç il keçdiyinə görə sığorta ödənişinin verilməsi qeyri-mümkündür. Şəhid ailələri buna etiraz olaraq məhkəməyə müraciət ediblər. Azərbaycan məhkəmələri bu kateqoriyadan olan vətəndaşların iddialarını haqlı sayaraq, qanunla ödənilməli olan məbləği dövlət, icbari sığorta ödənişinin verilməsi vəzifəsinə cavabdeh Dövlət Sığorta Şirkəti “Azərsığorta”nın üzərinə qoyub. 2012-ci ildən bəri, 42 məhkəmə qərarı “Azərsığorta” tərəfindən icra olunub. 25 oktyabr 2013-cü il tarixində Azərbaycan Respublikası Konstitusiya Məhkəməsində Fərhad Abdullayevin sədrliyi ilə Ali Məhkəmənin sorğusu əsasında “Hərbi qulluqçuların dövlət icbari şəxsi sığortası haqqında” Azərbaycan Respublikası Qanununun bəzi müddəalarının şərh olunması üçün növbəti xüsusi konstitusiya icraatı qaydası iclası keçirilib. Artıq bir aydan çox vaxt keçməsinə baxmayaraq, məlum qərar elan olunmur. Bu da yüzlərlə şəhid ailələrini və Qarabağ müharibəsi əlillərinin ciddi narazılığına səbəb olub. İlk əvvəl qərarın iclas keçirildiyi gündən sonra bir ay ərzində elan olunacağı bildirilsə də, sonradan bu qərarın açıqlanmasının 2-3 ay çəkəcəyi də bildirildi. 

Aksiyaçılardan 5 nəfər Prezident Administrasiyasında qəbula yazıldı. Burada onları Hüquq-mühafizə orqanları ilə iş şöbəsi müdirinin müavini Gülnar Rəsulova qəbul etdi.

“Qəbul zamanı bizi dinlədikdən sonra, yanımızda Konstitusiya Məhkəsinin sədri Fərhad Abdullayeva zəng etdib bizi qəbul etməsini xahiş etdi. Fərhad müəllim bizi əmin etdi ki, narahat olmayın Konstitusiya məhkəməsini qərarı heç vaxt Azərbaycanın ərazi bütövlüyü uğrunda canlarından keçmiş şəhidlərin ailələri, müharibə zamanı əlil olmuş şəxslərin əleyhinə qərar qəbul etməyəcək”, deyə Almaz Zeynalova bildirdi.