İkinci qrup Qarabağ əlili Zaur Həsənəvon özünü yandırması müharibə əlilləri və veteranlar arasında ciddi rezonansa səbəb olub. Dünən 5 saylı şəhər klinik xəstəxanasının qarşısına yığışan xeyli sayda əlil və müharibə veteranı xəstəxana rəhbərliyi və hakimiyyətdən Z.Həsənovun həyatının xilas edilməsi üçün zəruri addımlar atamağı, habelə müharibə veteranlarına diqqət və qayğını artırmağı tələb edib.
Məlumat üçün qeyd edək ki, son vaxtlar müharibə əlilləri və veteranlarla bağlı oxşar tendensiyaların sayı artmaqdadır. Sosial problemlərin çoxluğundan, maddi çarəsizlikdən və ədalətsiz münasibətdən cana doyan müharibə iştirakçılarının bəzisi vəziyyətdən çıxış yolunu özünə qəsd etməkdə və ya Azərbaycanı tərk etməkdə görür ki, bu da formalaşmaqda olan gənc nəslin vətənpərvərlik ruhunda tərbiyəsi baxımından mənfi örnək rolunda çıxış edir. Sağlamlığını vətən uğrunda qurban verən insanlara biganə münasibət yeniyetmələrdə bütövlükdə dövlətin etibarına inamsızlıq formalaşdırır ki, bu da istənilən dövlət üçün faciə deməkdir.
“Zaur Həsənovu ölümün pəncəsindən qurtarmaq lazımdır”
Zaur Həsənovla bağlı baş verən olaylara münasibət bildirən Qarabağ Azadlıq Təşkilatının (QAT) sədri Akif Nağı əlil və veteranların etirazının kökündə dayanan amillərə aydınlıq gətirdi: “Mən özüm təxminən yarım saat olar ki, oradan gəlmişəm. Hazırda xəstəxana qarşısında xeyli insan var. Qazilər Birliynin sədri, Əlillər Cəmiyyətinin rəhbəri və s. şəxslər oradadırlar. Orada ümumi fikir ondan ibarət oldu ki, hələlik baş verənlər şəxsiləşdirilməsin. Ora yığışmağın mahiyyəti xəstəyə dəstək vermək və onu ölümün pəncəsindən qurtarmaq üçün xəstəxana rəhbərliyi və hakimiyyətə dəstək verməkdən ibarətdir. Hələlik mövcud vəziyyətin mahiyyəti belədir. Biz QAT olaraq bildirdik ki, hansı qərar qəbul edilsə, təşkilatımız da bu qərara dəstək verəcək”.
A.Nağının qənaətincə, bu gün istər dövlət, istərsə də cəmiyyət tərəfindən müharibə əlilləri və qazilərinə layiqli münasibət göstərilmir: “Hesab edirəm ki, bu, mənfi və heç bir ölçüyə sığmayan bir hadisədir. Bütövlükdə, vaş verənlər Qarabağ əlillərinə, müharibənin qurbanlarına olan münsibətin göstəricisidir. Odur ki, məlum olay və onun fonunda baş verənləri rüsvayçılıq kimi xarakterizə edirəm. Son dövrlər cəmiyyət tərəfindən də bu insnalara münasibət bir qədər dəyişib. Sanki zaman keçdikcə bu insanların vətən qarşısındakı xidmətlərinə qarşı bir laqeydlik formalaşır. Halbuki, belə olmalı deyil”.
“Dövlət səviyyəsində müharibə iştirakçıları ilə bağlı vahid proqram qəbul edilməlidir”
QAT sədri hesab edir ki, Qarabağ müharibəsinin üstündən nə qədər vaxt keçirsə-keçsin bu müharibədə öz həyatını və sağlamlığını qurban verən insanların fədakarlığı unudulmamlıdır: “Unutmaq lazım deyil ki, bu insanlar vətən uğrunda öz sağlamlıqlarını itiriblər və onlara qayğı hər bir kəsin borcudur. Maraqlıdır ki, dövlət səviyyəsində də müharibə əlillərinə heç bir qayğı yoxdur. Hesab edirəm ki, dövlət səviyyəsində bu insanlarla bağlı vahid, ciddi bir proqram qəbul edilməlidir. Deyilənlərə görə belə bir proqram var, lakin biz bu proqrama şahidlik edə bilmirik. Hansı ki, müharibə iştirakçıları ”“ veteranlar, əlillər və şəhid ailələri ilə bağlı belə bir proqramın qəbul edilib yerinə yetirilməsi mütləqdir”.
“Səttar Mehdalıyevə qarşı cinayət işi qaldırılmalıdır”
“Vətən Müharibəsi Əlilləri” İctimai Birliyinin sədri Firidun Məmmədov Z.Həsənovla bağlı baş verənləri bütövlükdə Qarabağ əlillərinə olan münasibətin bariz nümunəsi kimi şərh etdi: “Z.Həsənovun intihar etməyə cəhd etməsi bütövlükdə Qarabağ əlillərinə olan münasibətin göstəricisidir. Əslində bu gün bütün Qarabağ əlillərinin sosial durumu Z.Həsənovla eynidir. Z.Həsənovu bu həddə gətirib çıxardan Səttar Mehbalıyev qanunvericiliyin imkan verdiyi ən yüksək formada cəzalandırılmalıdır. Ona qarşı özünü öldürmə həddinə çatdırma ilə bağlı cinayət işi başladılmalıdır”.
“Səttar Mehbalıyev məhkəməyə təsir göstərib”
F.Məmmədovun sözlərinə görə, S.Mehdalıyevin etdikləri ölkə başçısının göstəriş və tövsiyyələri ilə də bir araya sığmır: “Z.Həsənov çox acınacaqlı durumdadır. O, öz övladlarını aylarla yedirdə, içirdə bilmir. Onun çörək mağazasından tutmuş bütün dükanlara borcu var. Yerini S.Mehdalıyev, evini isə bank əlindən alır. Ölkə başçısı bugünlərdə öz çıxşında bildirdi ki, iş adamları insanlardan nə alır-alsın, bunu halallıqla etməlidir. Insanlardan bunun halallığını almalıdır. Z.Həsənov 17 ildir ki, bələdiyyə ilə icarə müqaviləsi bağlayaraq sahibkarlıqla məşğul olub. Ciddi məbləğdə pul xərcləyib, evini-eşiyi isə girov qoyub. Bunun hesabına obyekt tikdirib. S.Mehbalıyev isə məhkəməyə təsir göstərərək ondan saxta bir qərar alıb. Bu qərarı əsas tutaraq Z.Həsənovun obyektini başına uçurub. Burada maraqlı bir məqam da var. Məhkəmə torpaq üzərində S.Mehbalıyevin hüququnu tanıya bilər, lakin heç vaxt belə bir qərar verə bilməz ki, gedin tikili obyekti uçurun. Hansı ki, uçurulan obyekt Z.Həsənovun mülküdür”.
“Prezidentin mövqeyini gösləyirik”
F.Məmmədovun bildirdiyinə görə, artıq baş verənlərlə bağlı prezidentin konkret mövqe ortaya qoyması vacibdir: “Biz prezidentdən məlum olayla bağlı mövqe ortaya qoymağı gözləyirik. Çünki bu məsələ ilə bağlı bütün yetkili şəxslərlə görüşmüşük. Çalışmışıq ki, bu problem həll olunsun. Lakin göründüyü kimi bu problemi həll etmək mümkün olmadı və nəticədə hadisələr bu məcrada inkişaf etdi. Hesab edirik ki, ölkə başçısının ortaya qoyacağı mövqe bütün bu olaylara aydınlıq gətirməklə yanaşı, Z.Həsənovun haqqının bərpa edilməsi baxımından da mühüm rol oynayacaq”.
Seymur Əliyev (“Hürriyyət” qəzeti)
