Dekabrın 17-də Türkiyədə korrupsiya və rüşvət ittihamı ilə bağlı həbs edilən iş adamı Rza Zərrabla bağlı yeni xəbərlər yayılıb. Bu xəbərlərdə Azərbaycan oxucusu üçün daha çox maraq doğuranı R.Zərrab və digərlərinin Azərbaycanla əlaqələri barədə bilgilərdir.

Xəbər verdiyimiz kimi, Qafqaz Müsəlmanları İdarəsinin sədri, Allahşükür Paşazadənin deputat qardaşı Cavanşir Paşazadə adının R.Zərrabın Azərbaycandakı əsas ortağı kimi hallandırılmasına etiraz edib.

Deputat özü ilə yanaşı mediada R.Zərrabın şəriki kimi tanıdılan “Palmali” Şirkətlər Qrupunun rəhbəri Mübariz Mənsimovu da müdafiə edib: “”Palmali" Şirkətlər Qrupunun da adını bu çirkin işdə hallandırırlar. Türkiyə hüquq-mühafizə orqanları bir il ərzində tədqiqat aparıblar və cinayətkarları həbs ediblər. Əgər Mübariz Mənsimovun bu cinayətlərə aidiyyəti olsaydı, onu da həbs edərdilər". Xatırladaq ki, həmin məlumatlarda Rza Zərrabın “Palmalı” şirkətlər qrupunun sahibi ilə dost olduğu bildirilirdi. Türkiyə polisindəki qaynaqlardan biri isə demişdi ki, hazırda istintaq M.Mənsimovun Rza Zərrabla işgüzar münasibətlərini və böyük rüşvət prosesindəki rolunu araşdırır.

Qeyd edək ki, lənkəranlı iş adamı Mübariz Mənsimovun Paşazadə ailəsi ilə yaxın münasibəti heç kimə sirr deyil. Şeyxin istər Həccə, istərsə də Almaniyaya müalicəyə M.Mənsimovun özəl təyyarəsi ilə getdiyi də iddia olunub. Bu səbəbdən C.Paşazadənin hələ ki bu xəbərlərə, eləcə də Türkiyədəki həbslərə heç bir reaksiya verməyən M.Mənsimovu müdafiə etməsi başadüşüləndir.   

Azerinfo.org saytı isə M.Mənsimovla bağlı yeni sensasion xəbər yayıb. Türkiyədəki qaynaqlardan sayta verilən xəbərə görə, Mənsimovu həbs dalğasından qurtaran onun iş ortağı olub.

Belə ki, əməliyyat haqda hələ aylar öncə camaatın “ağır toplarından” sayılan ( M.Mənsimovun şəriki) İhsan Kalkavan xəbərdar olub: “Məlumatlı şəxsin sözlərinə görə, Mübariz Mənsimovla yaxın dost və partnyor olan İhsan Kalkavan ”Palmali" şefini bu həbs təhlükəsindən qurtarıb.  Mənsimov Türkiyə vətəndaşlığı alarkən, onun işlərini yoluna qoyan və Türkiyə Daxili İşlər Nazirliyinin bu vətəndaşlıqla bağlı yaratdığı problemləri qısa zamanda həll edən Beşiktaş Dənizçilik Şirkəti İdarə Heyətinin sədri İhsan Kalkavan bu dəfə də şərikinə  yardımını əsirgəməyib. Araşdırmaları aparanlar və içərisində nazir oğullarının da olduğu  rüşvət izləmələrini hazırlayanlar Kalkavanın dostu Mənsimovu “görməzdən” gəliblər. Təbii ki, holdinqini İstanbuldan idarə edən “Palmali” şefi də dostuna qulaq asaraq, əməliyyatın hədəfində olanlardan uzaq durub və özünü sığortalayıb".

Qeyd edək ki, hər iki şəxs Türkiyənin “Kasımpaşa” futbol komandasının İdarə Heyəti üzvüdürlər və klub Ərdoğana yaxın klub sayılsa da, İhsan Kalkavan camaata yaxınlığı ilə tanınır. Hər il camaata 1 milyon dollar bağışlayan Kalkavan “Gülən üçün ölərəm” sözləri ilə məşhurdur.

M.Mənsimov  “Palmali” Şirkətlər Qrupunu 1998-ci ildə Türkiyəyə gətirib. Hazırda dünyanın ən böyük 5 dənizçilik şirkətindən biri olaraq göstərilən “Palmali” prezidenti yalnız 2009-cu ildə  Türkiyə vətəndaşlığını qəbul edib. Maraqlıdır ki, bir neçə gün əvvəl “GQ Türkiyə” jurnalı “2013-cü ilin  adamı” nominasiyasında ən yaxşılar sırasında M. Mənsimovun da adını çəkib.

“Türkiyədə rüşvət əməliyyatının vaxtından əvvəl həyata keçirilməsi üzündən Rza Zərrabın ”Rəisim" dediyi iranlı milyarder Babək Zəncanini yaxalamaq mümkün olmayıb. “Habertürk”ün verdiyi   məlumata görə, o, bu həftə Antalyada Rza Zərrabla görüşməliymiş. B. Zəncani saxta sənədlə Beyrutdan Antalyaya gəlməyi planlaşdırıb. Ancaq son anda o, polisin əməliyyatından yayına bilib. ABŞ-ın dünyadakı bank hesablarını dondurduğu Babək Zəncani Türkiyədəki işlərinin həyata keçirilməsini Rza Zərraba tapşırıbmış. 39 yaşlı Babək Zəncaninin 13,5 milyard dollarlıq sərvəti var.

Babək Zəncani hava yolları şirkəti, maliyyə qurumları və çoxlu sayda neft tankerlərinin sahibidir. Onun Türkiyədə “Onur Air” hava yolları şirkətini, eləcə də, “Ulusoy” və “Varan” avtobus şirkətlərinin səhmlərinin yarısını satın aldığı bildirilir. 2013-cü ilin əvvəlində “Onur Air”  250 milyon dollara İran əsilli Dubaydan olan iş adamı Mehdi Şəmsə satılıb. İddiaya görə,  telefonla ümumiyyətlə danışmayan Zəncani Zərrabla ancaq email vasitəsilə şifrəli əlaqə saxlayıb. 

Qeyd edək ki, B.Zəncani 2012-ci ildə Avropa Birliyinin, daha sonra isə ABŞ-ın qara siyahısında yer alıb. Zəncani özünü İranda radikallığı ilə seçilən İnqilab Keşikçiləri Ordusuna (BƏSİC) bənzədir. Onun karyerasındakı ən maraqlı məqam 1999-cu ildə İran Mərkəzi Bankının müdiri Nurbəxşin sürücüsü olması olub. 

Zərrabla Zəncaninin tanışlığı isə hər ikisinin ata yurdu olan Təbrizdə baş tutub. 2012-ci ildə  Dubaya uçan təyyarədə saxlanan 1.208 ton qızılın da əsl sahibinin Zəncani olduğu bildirilir. İki həftə sonra Zərrab qızılı Dubaya göndərməyə müvəffəq olduqda isə Zəncani ona email yazaraq “Afərin, qardaşım. Sən artıq böyüdün. Gözüm arxada qalmayacaq”, -  deyib. 

İbrahim Tatlısəs də “Rza Zərrab xərçəngdir” dedi

Musavat.com-un milliyet.com.tr-yə istinadən verdiyi məlumata görə, məşhur müğənni İbrahim Tatlısəs Rza Zərraba öz dəstəyini ifadə edib. Müğənni bu dəstəyi  özünün twitter səhifəsində paylaşıb. Zərrabın xərçəng xəstəsi olduğunu bildirən Tatlısəs bunları yazıb: “Rza Zərrab mənim çox önəmli bir dostumdur. Və mən bunu hər dəfə söyləyəndə qürur hissi keçirirəm. Zərrabın xərçəng xəstəliyinə tutulması doğrudur. Biz bu məsələ ilə bağlı onunla həbs edilməmişdən iki gün öncə telefonla söhbət etmişdik. O, xəstəliyi barədə məlumat verdi. Kiməsə özünü yazıq göstərmək Rzanın tərzi deyil. O mənim can yoldaşımdır”.

Nazir oğulları ifadə verdilər 

Rüşvət əməliyyatı zamanı saxlanılan nazir övladlarının məhkəmədəki ifadələri yayılıb. Daxili işlər naziri Müəmmər Gülərin oğlu Barış Gülər məhkəmədə bəyan edib ki, həbs olunsa, etibarı zədələnəcək.

Barış Gülər hakim qarşısında bildirib ki, heç bir cinayətkar qrupun üzvü olmayıb. O, saxlanılanlardan Rüçhan Bayarla uzaq qohum olduğunu deyib və Rza Zərrabla onun vasitəsilə tanış olduğunu açıqlayıb. Rüçhan Bayarda Gülər ailəsinin pulu olub: “O, iflas etdi və pulu qaytara bilmədi. Bir müddət sonra onun Rza Zərrabın yanında işlədiyini eşitdim. Rza Zərrabla görüşdük və Rüçhan Bayarın maaşından kəsilmək şərtilə pulun bir hissəsini ödədi. Bundan başqa heç bir əlaqəmiz olmayıb”.

“Mənim əleyhimə heç bir ifadə yoxdur. 40 ildir bu dövlətə xidmət edən birinin oğlu olaraq utancverici işlərə qarışmayacağım hər kəsə məlumdur. Azadlığa buraxılmağımı tələb edirəm” deyə, Barış Gülər məhkəmədə bəyan edib.

İqtisadiyyat naziri Zəfər Çağlayanın oğlu Salih Kaan Çağlayan isə bildirib ki, Rza Zərrabla ailə dostu olublar: “8 ay əvvəl həyat yoldaşı toyumda səhnə almışdı. Sağ olsun, yalnız səhnə xərcini aldı, başqa ödəniş tələb etmədi. Rza Zərrabın özü dostluğumuzla əlaqədar bir kostyum almışdı. Rüşvət almaq və ya verməkdən söhbət gedə bilməz”.

Salih Kaan Çağlayan onu da bildirib ki, atasının işlərinə qarışmayıb və öz biznesi ilə maraqlanıb. 

Nazir oğlu qızıl qaçaqmalçılığı ilə əlaqəsinin olmadığını bəyan edib.

Ərdoğan müdafiədə

Baş nazir Rəcəb Tayyib Ərdoğan Girəsundakı açılış törənində izdiham qarşısında çıxışında yenə də əsas diqqəti həbslərə yönəldib. O deyib ki, bu əməliyyat xaricdəki böyük güclərlə daxildəki bəzi qüvvələrin birgə hazırladığı tələdir. Baş nazirə görə həm ittihamlar, həm mediada yayılan iddia və fotolar yalan üzərində qurulub.   

İstanbul Polis İdarəsi isə dekabrın 22-dən  ölkə ərazisində mətbuat nümayəndələrinin polis idarələrinə daxil olmasını yasaqlayıb, Polisin yaydığı yazılı açıqlamada deyilir: “Rəhbərliyin təlimatıyla 22.12.2013-cü il tarixindən etibarən mətbuat nümayəndələrinin bütün Türkiyə ərazisində polis idarələrinə girişi yasaqlanır. Hər hansı bir yenilik və ya açıqlama olacaqsa, Polis özü mətbuatı dəvət edəcəkdir. Polisin Vətən və Qeyrəttəpədə yerləşən mətbuat üçün xidməti otaqlarının açar və giriş kartlarını təhvil vermələri KİV nümayəndələrindən xahiş olunur”.

Belə görünür ki, hökumət mətbuata sızan məlumatları nəzarətə almaq və səngitmək üçün bu addımı atmağa məcbur olub.