Bugünlərdə Azərbaycan Daxili Qoşunlarının sabiq komandanı Fəhmin Hacıyev “Yeni Müsavat” qəzetinə açıqlamasında müxalif düşərgədəki bəzi insanların, eləcə də ADP sədri Sərdar Cəlaloğlunun ünvanına bəzi ittihamlar səsləndirib. Öz açıqlamasında S.Cəlaloğlunun sərgilədiyi mövqeyin müxalifətçiliklə bir araya sığmadığını bildirən F.Hacıyev, ADP sədrini İlham Əliyevdən daha çox Müsavat Partiyasını ittiham etməkdə təqsirləndirib: “Sərdar Cəlaloğlu deyir müxalifətəm, ancaq onun son iki ildə ən çox vurduğu partiya Müsavat Partiyasıdır. Əgər Sərdar bəy müxalifəti tənqid etdiyi qədər İlham Əliyevi də tənqid etsəydi, mən ona bəraət qazandırardım. Bu tip problemlər bu şəxslərlə bağlı xalqda qeyri-ciddilik təsəvvürü formalaşdırır”.
Moderator.az "Hürriyyət" qəzetinə istinadən bildirir ki, ADP sədri Sərdar Cəlaloğlu isə bu ittihamların heç birini qəbul etməyib. Partiya sədrinin sözlərinə görə, o, bu vaxta qədər müxalif partiyaların idarəedilməsi, strukturu və ya lideri haqqında deyil, onların qəbul etdiyi yanlış qərarlarla bağlı açıqlama verib.
“Müsavatçılar İsa Qəmbəri dəyişmək istəyəndə buna mən qarşı çıxdım”
Partiya sədrinin bildirdiyinə görə, bir müddət bundan öncə İsa Qəmbəri başqa bir liderlə əvəzləmək məsələsi gündəmə gələndə, məhz o, Müsavat başqanını müdafiə edib: “Mən heç vaxt Müsavat partiyasını tənqid etməmişəm. Nə onun ideologiyası, nə strukturu, nə idarəetməsi, nə də lideri ilə bağlı tənqidi fikir səsləndirməmişəm. Deməmişəm ki, Müsavatın lideri pisdir. Əksinə, Müsavatın bəzi üzvləri İ.Qəmbəri dəyişmək istəyəndə buna qarşı çıxmışam və bildirmişəm ki, belə bir dəyişiklik Müsavat üçün ağır nəticələrə səbəb ola bilər. Mənim tənqidim Müsavat Partiyasının qəbul etdiyi ayrı-ayrı qərarlarla bağlı olub. Bu tələblərin gündəmə cavab verməməsi və s. ilə əlaqədar olub. Bunu isə Azərbaycanda baş verən hadisələrin gedişi və nəticəsi göstərir. Bunun günahı məndə deyil. Bunun günahı məndə deyil ki, Müsavat Milli Şuranın yaranmasında aktiv iştirak etdi. Sonda isə Milli Şuyra ilə münasibətləri bu həddə gəlib çatdı”.
“Müsavat və AXCP-nin müttəfiqliyi saxtadır”
S.Cəlaloğlu AXCP və Müsavat arasındakı müttəfiqlik əlaqələrinin də formal mahiyyət daşıdığını və heç bir səmimiyyətə söykənmədiyini qeyd etdi. Partiya sədrinin fikrincə, iki partiya yetkililərinin son görüşü də bunu təsdiq edir: “Baxın, Müsavat və AXCP partiyaları arasında 4 ildir ki, əməkdaşlıq var. Onlar öncə İctimai Palatada, daha sonra isə Milli Şurada guya müttəfiq olublar. İki partiyanın rəhbərliyi arasında keçirilən son görüş mənim bugünə qədər səsləndirdiyim tənqidlərin təsdiqi baxımından da əhəmiyyətlidir. Bu göstərdi ki, Müsavat və AXCP bir ölkənin iki müxalif partiyasından daha çox müxtəlif ölkələri təmsil edən siyasi qüvvələrə bənzəyir. Tərəflər arasındakı son görüşdə həm İctimai Palata, həm də Milli Şura ilə bağlı çox ciddi fikir ayrılığı meydana çıxdı. Partiyalar bir-birlərinə fərqli şeylər təklif ediblər. Onların bir-birinə etdikləri təkliflər əksəriyyət tərəfindən birmənalı qarşılanmayıb. Bu görüş sübut etdi ki, AXCP və Müsavat bir-biri ilə tanış olmayan iki fərqli siyasi qüvvədir. Belə müttəfiqlik olmaz. Bu ağla sığan deyil ki, 4 il müttəfiqlik münasibətləri qurasan və axırda da bəlli olsun ki, cəmiyyətə müttəfiq kimi təqdim edilən qüvvələrin hətta bir məsələ ilə bağlı da oxşar fikri yoxdur. Mən belə müttəfiqliyi tənqid edirəm. Müsavat Partiyasının tənqidini bu aspektdən irəli sürürük. Biz bu qüvvələrin yaxınlaşmasının əleyhinə deyilik”.
“Səhvim varsa, əsaslandırın”
S.Cəlaloğlu onun səsləndirdiyi tənqidi fikirlərin mövcud reallıq və elmi əsaslara söykəndiyini qeyd etdi. Partiya sədrinin sözlərinə görə, onun tənqidi açıqlamaları ilə bağlı narazı olan qüvvələr bu açıqlamanı qəbul etmirlərsə, o zaman bu fikirlərin həqiqətən də qəbuledilməz olduğunu elmi-fəlsəfi qaydada sübut etməlidirlər: “Mən səsləndirdiyim tənqidi fikirlərdən narazı olan bütün qüvvələrə elan edirəm ki, mən sadəcə siyasdətçi deyiləm. Mənim ağzımdan çıxan hər bir söz həm fə elmi-fəlsəfi fikirdir. Mənim apardığım siyasət elmi-fəlsəfi siyasətdir. Mən hər bir fikrimi 50-100 nəzəriyyə, 50-100 fəlsəfi təlimlə sübut edə bilərəm. Mən bir çoxları kimi hadisələrə şəxsi mülahizə və maraqlardan münasibət bildirmirəm. Buna görə də mənim səsləndirdiyim tənqidlərə Fəhmin Hacıyev kimi adamlar cavab verə bilməz. Qoy barəsində tənqidi fikir səsləndirdiyim partiyaların alimləri, siyasət elmini bilənlər cavab versinlər. Qoy onlar əsaslandırsınlar və desinlər ki, S.Cəlaloğlunun bu fikri filan nəzəriyyə və ya fəlsəfi təlimə görə əsassızdır”.
“Verdiyim heç bir proqnoz yanlış çıxmayıb”
Partiya sədrinin qənaətincə, onun bu günə qədər səsləndirdiyi bütün açıqlamalar xalqın və dövlətin maraqlarına hesablanıb və bu vaxta qədər verdiyin hər hansı bir proqnoz yanlış çıxmayıb: “Azərbaycan jurnalistlərinin böyük əksəriyyətinə məlumdur ki, mənim bugünə qədər verdiyim heç bir proqnoz yanlış çıxmayıb. Mənim təhlillərimin heç biri empirik təhlillər yox, elmi təhlillərdir. Əgər barəsində tənqidi fikir səsləndirdiyim insanlar həqiqətən də öz xeyirlərini istəyirlərsə, mənim tənqidlərimi nəzərə alsınlar. Mənim Müsavat, AXCP, hətta YAP-la bağlı səsləndirdiyim tənqidi fikirlərdə belə elmi prinsipləri nəzərə alıram. Mən bu tənqidləri hər kəsin, həmin partiyaların özünün və eləcə də dövlətin və xalqın maraqlarını nəzərə alaraq səsləndirirəm”.
“Mənim mübarizəm hər kəsdən daha sərt olub”
S.Cəlaloğlunun sözlərinə görə, vaxtiylə o, hakimiyyətin siyasətinə qarşı müxalif qüvvələrin hamısından daha sərt şəkildə mübarizə aparıb və onun sonralar öz mübarizə üsulunu dəyişməsinə səbəb də aparılan radikal mübarizənin lazımi effekt verməməsi olub: “Mənim İlham Əliyevin hakimiyyətin ünvanına tənqidi fikirlər səsləndirmədiyimlə bağlı söylənilən fikirlər də həqiqətə uyğun deyil. Xalq Cəbhəsinin bəzi nümayəndələri Heydər Əliyev hələ Naxçıvanda olarkən ora gedir, H.Əliyevlə görüşə can atır, Əbülfəz Elçibəyə qarşı danışıqlarda iştirak edirdilər. H.Əliyev hakimiyyətə gələndən sonra da bu cür danışıqlar olub. Mən həmin vaxt H.Əliyevlə bağlı mövqeyimi açıq şəkildə ortaya qoymuşam. Ümumiyyətlə, 1996-cı ildən 2005-ci ilə qədər hakimiyyətə qarşı son dərəcə sərt mübarizə aparmışam. Həmin vaxt mənim apardığım mübarizə müxalifətin indiki mübarizəsindən daha radikal idi. Lakin bu müddət ərzində apardığım mübarizənin nəticəsini, xalqın və dövlətin mövcud durumunu nəzərə alaraq öz siyasətimdə dəyişiklik etməyin vacib olduğu qənaətinə gəlmişəm. Bu səbəbdən də öz siyasətimdə korrektələr etmişəm. Lakin görünən budur ki, insanların çoxu hələ də bunu dərk etməkdə çətinlik çəkir”.
“Mən hakimiyyətə müxalifəm, amma düşmən deyiləm”
Partiya sədri mövcud hakimiyyətin siyasətinə müxalif olduğunu, lakin onun müsbət addımları təqdir etdiyini və bundan sonra da təqdir edəcəyini vurğuladı: “F.Hacıyev iddia edir ki, guya mən İlham Əliyevi tənqid etmişəm. Mən F.Hacıyevə təklif edirəm ki, həftənin hər birinci günü ADP-nin verdiyi bəyanatlara baxsın. Baxın görsün elə bir həftə olubdurmu ki, biz hakimiyyətin hər hansı yanlış addımı ilə bağlı tənqidi bəyanat səsləndirməyək? Həftənin hər üçüncü günü “Qarabağ” blokunda Ümid və ADP birlikdə ictimai-siyasi hadisələrlə bağlı bəyanat verir. Əgər İ.Əliyev xalqın və dövlətin marağına uyğun addım atırsa, bunu tənqid edə bilmərəm. Mən xalqıma düşmən deyiləm ki, onun maraqlarına xidmət edən addımları tənqid edim. Mən müxalifətəm. Lakin bəziləri düşmənçiliklə müxalifətçiliyi səhv salır. Düşmənçilik odur ki, qarşı tərəfin yaxşını da, pisini də qəbul etmirsən. Müxalifət isə odur ki, iqtidarın yaxşını qəbul edir, amma pisini qəbul etmir. Mən düşmənçilik etmək niyyətində deyiləm”.
“Fəhmin Hacıyevin zəkası fikirlərimə qiymət vermək üçün yetərli deyil”
Partiya sədri Fəhmin Hacıyev və məlum kateqoriyalı insanların zəkasının onun fikirlərini araşdırmaq, lazımi səviyyədə tədqiq etməsi üçün yetərli olmadığını qeyd etdi. Habelə, S.Cəlaloğlu müxalif partiya liderlərinin də onun barəsində fikir səsləndirməkdən ehtiyat etdiyini və digər funksionerlərin vasitəsi ilə onun bostanına daş atdığına diqqət çəkdi: “F.Hacıyevin zəkası mən və mənim səviyyəmdə olan insanların fikirlərini qiymət verməyə yetməz. Bu, mümkün deyil. Bəzi liderlər yaxşı bilir ki, onlar mənimlə tərəziyə girə bilməz. Buna göə də heç vaxt görə bilməzsiniz ki, onlar özləri mənim haqqımda hansısa fikir bildirsinlər. Onlar barəmdəki fikirləri üçüncü, dördüncü şəxslər vasitəsi ilə bildirirlər. Çünki onların deməyə sözü yoxdur”.
Seymur Əliyev
