Milli Şuranın son sessiyasında Cəmil Həsənli adıçəkilən qurumun sədri, Rüstəm İbrahimbəyov isə fəxri sədri seçilməsindən sonra ortalıq yenidən bərk qarışıb. R.İbrahimbəyovun Milli Şurada fəxri sədr seçilməsi Müsavat Partiyasının etirazına səbəb olub. R.İbraimbəyovun Azərbaycanla yanaşı, həm də Rusiya vətəndaşı olduğunu bildirən Müsavat yetkililəri, xarici ölkə qarşısında öhdəliyi olan bir şəxsin Milli Şurada fəxr sədr kimi təmsilçiliyinin doğru olmadığını iddia edib. Hələ sessiyadan öncə R.İbrahimbəyovun fəxri sədr seçiləcəyi təqdirdə bu qurumda qalmaqla bağlı qərarlarına yenidən baxacaqlarını bildirən Müsavat liderləri, belə bir təmsilçiliyin məntiqli olmadığı qənaətindədir. Hələlik Müsavat partiyasının Milli Şurada qalmaq və ya bu qurumu tərk etməklə bağlı prinsipial qərarı olmasa da, əksər siyasilər baş verənlərdən sonra Müsavatın Milli Şura sıralarını tərk edəcəyi qənaətindədir. Siyasilərin fikrincə, baş verənlərdən sonra R.İbrahimbəyovun Müsavatla bağlı səsləndirdiyi fikirlər də məlum partiyanın gediş niyyətinə təsir göstərəcək. Müsavatın R.İbrahimbəyovun fəxri sədrlik məsələsi ilə bağlı sərgilədiyi mövqeyə münsibət isə kifayət qədər fərqlidir. Qurumun bəzi üzləri hesab edir ki, R.İbrahimbəyovun Milli Şurada təmsilçiliyi sözügedən qurumun fəaliyyəti və gələcək mübarizəsi baxımından ciddi önəm kəsb edir. Məhz bu baxımdan da onlar R.İbrahimbəyovun ikili vətəndaşlıq məsələsinin problemə çevrilməsini doğru hesab etmirlər. Onların fikrincə, R.İbrahimbəyovun Milli Şuranın sədri olduğu zamanlarda bu məsələ haqqında hər hansı fikir bildirməyən Müsavat yetkililərinin indiki dönəmdə məlum məsələni gündəmə gətirməsi anlaşılan deyil.
“El” hərəkatının Ali Məclisinin sədri, Milli Şura üzvü Eldəniz Quliyev Müsavat partiyasının sərgilədiyi bu mövqeyi məntiqsizlik kimi dəyərləndirib. Onun sözlərinə görə, əgər Müsavat partiyası R.İbrahimbəyovun ikili vətəndaşlığından bu qədər narahat idisə, bunu hörmətli kinorejissorun sədr olduğu dönəmlərdə qaldıra bilərdi. E.Quliyevin sözlərinə görə, əgər belə olsaydı, o zaman indi Müsavatın mövqeyini başa düşmək olardı: “Hesab eləmirəm ki, Müsavat partiyası bununla bağlı ortaya hansısa mövqe qoyub. Bu, mövqe deyil. Bu, arqumentsiz, məntiqsiz açıqlamadır və tənqidi dözümsüzlüyü ilə diqqət çəkir. Əgər R.İbrahimbəyovun ikili vətəndaşlığı Müsavatı belə narahat edirdisə, onda nə üçün R.İbrahimbəyov Milli Şuranın sədri olanda bu barədə danışmırdılar? Niyə R.İbrahimbəyovun vahid namizədliyi məsələsi gündəmə gələndə dillənmirdi? Əgər o zaman Müsavat partiyası belə bir mövqe ortaya qoysaydı, indi bu mövqeyi başa düşmək olardı ”.
E.Quliyevin bildirdiyinə görə, R.İbrahimbəyovun Milli Şuradan uzaqlaşdırılması ən çox ölkə iqtidarının maraqlarına cavab verir və bu mənada Müsavatın da eyni istəklə çıxış etməsi olduqca düşündürücüdür: “Çox qəribədir, sessiyada maraqlı bir fikir səsləndirildi, hansı ki, bu fikirdə bəlkə də böyük bir həqiqət mövcuddur. Hər kəsə məlumdur ki, R.İbrahimbəyovun Milli Şuradan uzaqlaşdırılmasında ən çox iqtidar maraqlıdır. Əgər indi Milli Şuraya daxil olan hər hansı bir qurum belə bir istəklə çıxış edirsə, artıq istər-istəməz paralellik aparmaq məcburiyyəti meydana çıxır”.
R.İbrahimbəyovun Milli Şuradakı mövcudluğunun istənilən baxımdan faydalı olduğuna diqqət çəkən E.Quliyev, Müsavat partiyasının mövqeyinin yanlış olduğunu vurğuladı: “Düşünürəm ki, Müsavat partiyasının sərgilədiyi dırnaqarası mövqe səhv və əsasssızdır. Bu, ziyanlı bir mövqedir. Hər halda R.İbrahimbəyovun Milli Şurada olması olmamasından daha faydalı və daha gərəklidir”.
Sonda E.Quliyev Müsavatı Milli Şuranı parçalamaq cəhdində ittiham etdi: “Müsavat istəyir ki, 20 il bundan sonra da müxalifət daxilində çəkişmələr mövcud olsun və ölkədə heç bir demokratik dəyişiklik baş verməsin. Çox güman ki, məhz bu səbəbdən Milli Şuranın parçalanmasına rəvac veriblər”.
Müsavat başqanının müavini, Milli Şura üzvü Gülağa Aslanlı isə hesab edir ki, baş verənləri Müsavatın Milli Şuranı paçalamaq cəhdi kimi xarakterizə etmək doğru deyil. Sədr müavininin sözlərinə görə, Müsavat partiyasının istəyi bütün məsələlərin Mili Şuranın nizamnaməsinə uyğun şəkildə həyata keçirilməsindən ibarətdir. R.İbrahimbəyovla bağlı məlum məsələdə də Müsavat partiyası məhz əsasnaməyə istinad etməyi vacib sayır: “Müsavat partiyasının Milli Şuranı parçalamaq, onun fəaliyyətinə hansısa problemlər yaratmaq marağı yoxdur. Müsavat partiyası Milli Şuranın yaranmasında kifayət qədər güc sərgiləyən partiyalardan biridr. Biz sadəcə olaraq Milli Şuranın idarə edilməsində Milli Şuranın əsasnaməsinə istinad edilməsinin tərəfdarıyıq. Əsasnaməyə zidd olan məsələləri gündəliyə çıxardaraq bunu dəstəkləyən insanlar dərk etməli idilər ki, hər şey əsasnamə çərçivəsində baş verməlidir”.
G.Aslanlının bildirdiyinə görə, Müsavat partiyası bundan sonra da bütün məsələlərin nizamnəyə uyğun şəkildə həll edilməsi siyasətini yürüdəcək: “Biz Müsavat partiyası olaraq Milli Şura ilə bağlı məsələlərin Milli Şuranın əsasnaməsinə və Azərbaycan xalqının maraqlarına uyğun olaraq həll edilməsinin tərəfdarıyıq. Biz hər zaman bu istəyi ortaya qoymuşuq və bundan sonra da bu istəyimizi nümayiş etdirəcəyik”.
Seymur Əliyev