Noyabrın 21-də vəkil Elçin Sadıqov Milli Təhlükəsizlik Nazirliyinin istintaq təcridxanasında jurnalist Pərviz Həşimli ilə görüşüb. Vəkil "Bizim Yol" qəzetinə açıqlamasında Pərviz Həşimlinin səhhətinin çox pis olduğunu söylədi: "Mənə dedi ki, onun belə şəraitdə saxlanılması faktiki olaraq işgəncədir, qeyri-insani rəftardır. Bu üsulla onu həyatdan bezdirmək, özünə ümidsizlik, inamsızlıq və acizlik yaratmaq istəyirlər. Onun sağlamlığına qəsd edirlər. Bildirdi ki, sabah istintaq təcridxanasının rəisinə məktub yazıb gələn həftənin birinci günündən aclıq aksiyasına başlayacaq. Tələbi isə ailəsi ilə görüşə icazə verilməsi, insan həyatına təhlükəli olmayan və insan ləyaqətini alçaltmayan şəraitdə saxlanması üçün Bakı İstintaq Təcridxanasına köçürülməsi, müdafiə hüququnun həyata keçirilməsinə şərait yaradılmasıdır”.

Pərviz Həşimli təcridxanada ona verilən yeməkləri yeyə bilmir

Pərviz Həşimli həm də İstintaq Təcridxanasında verilən yeməkləri yeyə bilmir. Odur ki, "çox zəifləyib", - deyir Elçin Sadıqov. Jurnalistin həyat yoldaşı İlahə Həşimli isə deyir ki, həftədə ancaq bircə dəfə yemək göndərmək icazələri var: "Evdən yemək hazırlayıb göndəririk. Götürürlər. Özü də biz istədiyimiz qədər ərzaq göndərə bilmərik. Təcridxana ancaq özünün icazə verdiyi qədərini götürür. Məsələn, əti çox az miqdarda götürürlər. O da ki, ancaq qaynadılmış və sümüksüz olmalıdır".
İlahə Həşimli həyat yoldaşının təcridxanada verilən yeməklərlə bağlı narahat olduğunu da deyir: "Pərviz ordan verilən yeməklərə görə narahatçılıq keçirir. Vəkilinə deyirmiş ki, "əvvəllər qazanı gətirib gözümün qabağında qoyurdular. Amma son zamanlar gəlib boşqabı aparırlar, özləri istədikləri qədər yemək qoyub gətirirlər". Pərviz də qorxur ki, birdən yeməyinin içinə nə isə qatarlar. Ona görə də ən çox evdən göndərdiyimiz yeməkləri yeyir. Onu da dəqiq bilmirik Pərvizə hamısı gedib çatırmı, yoxsa yox. Bir sözlə, göndərdiklərimizdən ona nəyin çatıb-çatmadığını bimirik. Özü də həftədə yalnız bircə dəfə, o da ki, 5-ci günlər yemək göndərmək icazəmiz var".

"Arzu olunan hər şeyə köməklik göstərmək mümkün deyil"

Hüquq müdafiəçisi Novella Cəfəroğlu deyir ki, məhbusların ailələri ilə görüşlərinin təşkil edilməsi həmişə problemli məsələ olub, indi də problemli olaraq qalır: "Biz bütün siyasi məhbuslara hər zaman demişik ki, arzu olunan hər şeyə köməklik göstərmək mümkün deyil. Sadəcə, biz onları nəzarətimizə götürmüşük. Pərviz Həşimli Milli Təhlükəsizlik Nazirliyinin təcridxanasında olduğu üçün heç kəslə görüşməyinə icazə verilmir. Biz Kürdəxanı Təcridxanasında çox çətinliklə insanların ailələri ilə görüşünü təşkil edə bilirik. O da ki, həbsxana rəisindən xahiş edəndən sonra".
Novella Cəfəroğlu Pərviz Həşimlinin əziyyət çəkməsini istəmir. Ancaq qanunla jurnalistin ailəsi ilə görüşməyə MTN-nin icazə vermədiyini də deyir: "Biz sadəcə olaraq mübarizə aparırıq ki, onu Milli Təhlükəsizlik Nazirliyindən Kürdəxanı Təcridxanasına köçürsünlər. Çünki orada biz görüş üçün icazə ala bilərik. Məsələ bundan ibarətdir. Biz daim çalışırıq ki, onu ordan çıxartsınlar. Onlara orda yaxşı baxsalar da, mühiti insana ağır gəlir. Mənim Pərvizə ürəyim ağrıyır ki, onu çox pis vəziyyətdə həbs etdilər, ailəsinin üzərinə hücum çəkdilər. Bu məsələlərin hamısını həm hakimiyyət, həm də beynəlxalq təşkilatlar qarşısında qaldırmışıq”.

"Milli Təhlükəsizlik Nazirliyinin İstintaq Təcridxanasında görüşə icazə yoxdur"

İşgəncələrə Qarşı Azərbaycan Komitəsinin sədri Elçin Behbdudov Pərviz Həşimli ilə sonuncu dəfə prezident seçkiləri qabağı görüşüb: "Həmin vaxt jurnalist ailəsinin fotoşəkillərini istəyirdi. Ailəsindən fotoşəkilləri alıb ona verdim. Bir də məktublaşmaq istəyi var idi. Bu istəyinin də təmin olunması məsələsini həll etdim. Ailəsi ilə görüş istəməyi məsələsi isə belədir ki, Milli Təhlükəsizlik Nazirliyinin İstintaq Təcridxanasında görüşə icazə yoxdur. Bu yaxınlarda mən gedib görüşəcəm Pərvizlə. Amma yenə deyirəm istintaq altında olduğundan görüş istəyi təmin olunmayacaq. O ki qaldı, təcridxanada ona verilən yeməklərin keyfiyyətinə, Milli Təhlükəsizlik Nazirliyinin İstintaq Təcridxanasında nə qədər məhkumlar, təqsirləndirilən şəxslər olub ancaq heç biri yeməkdən narazılıq etməyiblər. Özüm də hər dəfə gedəndə yeməyin keyfiyyətini yoxlayıram. Əgər yeməklərin təhlükəli olmağından, ona ziyan verəcəklərindən qorxursa qoy o zaman ona evdən yemək göndərsinlər. Təcridxana göndərilən yeməkləri qəbul edir”.

"İndiyə kimi istintaq zamanı bir nəfərə belə ailəsi ilə görüşə icazə verilməyib"

Hüquq müdafiəçisi Leyla Yunus isə deyir ki, ümumiyyətlə Pərviz Həşimlinin durumu çox dəhşətli məsələdir: "Bizim hökumətə alver lazımdır ki, seçki prosesini yola verə bilsin. Sonra da siyasi dustaqların sayı artır. Bundan sonra da siyasi dustaqların sayı artacaq və məhkəmələr çox ağır keçəcək. Rusiya və Avropa Şurası dirənib deyə, Azərbaycan hökumətinin əli-qolu daha da açılıb. Siyasi məsələlərin həll olunmasında isə insan hüquqlarına heç fikir verən olmayacaq. Ailəsi ilə görüşə gəldikdə isə bu imkanı heç kimə vermirlər. İstintaq zamanı bir nəfərə belə indiyə kimi ailəsi ilə görüşə icazə verilməyib”.

Pərviz Həşimli niyə MTN-də saxlanılır?

Vəkil Elçin Sadıqov deyir ki, təqdimat və vəsatətlərdə Pərviz Həşimlinin Bakı İstintaq Təcridxanasında saxlanılması xahiş edilsə də, məhkəmələr qanunsuz olaraq təqdimatın həcmindən kənara çıxaraq Pərviz Həşimlinin Milli Təhlüksəzilki Nazirliyinin istintaq təcridxanasında saxlanmasına qərar veriblər: "Ümumiyyətlə, təqsirləndirilən şəxs istintaq aparan orqanın əlində olmalı deyil və bu, ümumi bir prinsipdir. Ancaq MTN bu prinsipə əməl etmir - istintaqı özü apardığı halda təqsirləndirilən şəxsi də öz tabeçiliyndə saxlayır. Təbii ki, təqsirləndirilən şəxsi öz tabeçiliyndə saxlaması da onlara istənilən vaxt qanunsuz təsir etmək imkanı verir. Bu da Pərviz Həşimli ilə qanunsuz görüşlərə və ona təsir etmək imkanlarına münbit şərait yaradır. Ona görə də obyektivliyin təmini baxımından MTN özü Pərviz Həşimlinin orada saxlanmasından imtina etməlidir. Amma görünən odur ki, vəziyyət tam əksinədir - MTN Pərviz Həşimlini öz istintaq təcridxanasında saxlayaraq, onun hüquqlarını pozmaqda maraqlıdır”. 
Vəkil onu da vurğuladı ki, bununla bağlı dəfələrlə İnsan Haqları üzrə Müvəkkil (Ombudsman) Elmira Süleymanovaya müraciətlər edilib. “Eyni zamanda Pərviz Həşimlinin özü 6 dəfə milli təhlükəsizlik naziri cənab Eldar Mahmudova ərizə yazıb. Ancaq təəssüfləndirici haldır ki, məktuba heç bir münasibət bildirilməyib. Saxlanma yerinin dəyişdirilməsi ilə bağlı da məhkəməyə müraciət etmişik” deyən vəkil qeyd etdi ki, yaxın günlərdə şikayətə baxılacağı gözlənilir".
Pərviz Həşimli sentyabrın 17-də Milli Təhlükəsizlik Nazirliyinin keçirdiyi əməliyyatla saxlanıb. Ona qarşı Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən odlu silahın və döyüş sursatının qaçaqmalçılığı) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini və döyüş sursatını əldə etmə, saxlama, daşıma) maddələri üzrə ittiham irəli sürülüb və barəsində Səbail rayon məhkəməsi tərəfindən 2 aylıq həbs-qətimkan tədbiri seçilib. Noyabrın 7-də həbs-qətimkan tədbirinin müddəti 3 ay artırılıb.
Pərviz Həşimli ittihamları qəbul etmir, hüquq müdafiəçiliyi və jurnalist fəaliyyətinə görə saxta ittihamla həbs edildiyini bəyan edir. Amnesty İnternational beynəlxalq hüquq müdafiə təşkilatı Pərviz Həşimlini “vicdan məhbusu” kimi tanıyıb.