- Müsavat rəhbərliyinin Gürcüstana gəlməsindən xəbərsizəm. İndi sizdən eşidirəm ki, İsa Qəmbər Gürcüstana gəlib. Mənim burada işlərim həddən artıq sıx olduğu üçün indi özüm təşəbbüs göstərə bilməmişəm ki, görüşək. Bu gün axşam saat 17-də Moskvaya dönürəm. Bir neçə saat vaxtım qalır. Saat 17-dək məmnuniyyətlə onlarla görüşməyə hazıram. Yetər ki, mənimlə əlaqə saxlasınlar və necə görüşməyimizi danışaq, sonra da görüşüb müzakirələr aparaq. Nədənsə mənimlə əlaqə saxlamayıblar ki, indiyə qədər görüşək. Mən Mehman Əliyevlə danışmışdım. Dünən Mehman Əliyev Tiflisə gəlməli idi. Mehman Əliyev Tiflisdə bir neçə saat qalacağını əsas göstərərək mənə görüşə bilməyəcəyini bildirmişdi.

- Bir həftədən artıqdır Gürcüstandayam. Bilirsiniz ki, mən siyasətçi deyiləm, kinodramaturqam. Biz bir böyük kino layihəsinə başlayırıq. Məşhur “Əli və Nino” əsərini ssenariləşdirib film çəkməyə başlayırıq. Bu, Gürcüstan, Fransa, İspaniya və Rusiya dövlətlərinin birgə layihəsidir. İndi aktyorları hazırlayırıq, çəkiliş yerlərini müəyyənləşdiririk. Başqa bir filmin də çəkilişi ilə məşğuluq. Filmin çəkilişləri Bakıda da gedir. Kim istəsə tanış ola bilər. Cürbəcür şayiələr yayırlar ki, biz guya ermənilərin ssenarisidir. Bu cür söhbətlər axmaq-axmaq şayiələrdir. Mən bu filmlərin Rusiya tərəfindən prodüseriyəm.   

- Mənim sizdən bir xahişim var ki, bu fikirlərimi ixtisar etmədən verin. Mənim bir neçə gün öncə “Kontakt.az” saytına müsahibəm var idi. Həmin müsahibəni siz tərcümə olunmuş variantda qəzetinizdə vermisiniz. Lakin mənim Nicat Quliyevlə bağlı söylədiyim bir fikri düzgün verməmisiniz. Mən müsahibədə demişəm ki, tanışım Nicat Quliyevin evinə silah qoyub ona böhtan atıblar, indi məlumatlar var ki, Nicata Quliyevi Milli Şuranın terror qolu kimi təqdim etmək istəyirlər. Mən demişəm ki, Nicat Quliyevi istintaqın bu istəyini təsdiq etməyə məcbur eləməyə çalışırlar. Sizin qəzetdə isə belə getmişdi ki, Nicat Quliyev bunu təsdiq edib. Mən bilmirəm qəsdən, yoxsa bilməməzlikdən belə bir yanlış informasiya gedib. Çünki bu cür informasiya çox ziyanlı informasiyadır. Bu informasiya Nicatı ağır vəziyyətə qoyur. Nicat Quliyev özünü çox yaxşı aparır, kişi kimi aparır. Belə olduğu halda onun sındığının və istintaqa lazım olan şəkildə ifadə verdiyini yazmaq yaxşı deyil, müəyyən mənada böhtandır. Xahiş edirəm ki, bu cür həssas məsələdə ehtiyatlı olasınız.

- Demokratiya olan təşkilatda mütləq fərqli mövqelər olmalıdır. Bu, təbiidir. Hamının eyni cür düşünməsi, heç bir fərqli fikrin olmaması təəccüblü olardı. Hansısa ideyaya cürbəcür yanaşmanın olması təbiidir və demokratiyanın olduğu təşkilatın taleyindən narahat olmaq lazım deyil. Mənim fikir ayrılığının olmasından narahatlığım və narazılığım yoxdur. Milli Şuranın sessiyası keçiriləcək və hər kəs öz mövqeyini ifadə edəcək. Məsələ sessiyada həllini tapacaq. Mən hesab edirəm ki, sessiya istəsə həmsədrlik məsələsini səsvermə ilə, istəsə qərarla həll edə bilər. Bu, sessiyanın hüququdur və daxili işidir. Necə etsələr mən onunla razılaşacağam. 

- Həmsədrlik institutunun yaradılmasının təşəbbüskarı mən olmuşam. Cəmil Həsənlinin Milli Şuranın sədri olması təşəbbüsünü də mən qaldırmışdım. Onun prezidentliyə namizəd olmasını da mən təklif etmişəm. Mənə elə gəlir ki, Cəmil Həsənli həmsədr olsa çox yaxşı olar. Mən iki əlimlə səs verərəm ki, Milli Şuranın sədri Cəmil Həsənli olsun. Mən dəfələrlə bəyan etmişəm ki, siyasətçi deyiləm, sədr vəzifəsini öhdəmə ona görə götürmüşəm ki, mən öhdəmə götürməsəydim Milli Şura yaranmayacaqdı. İndi Milli Şura xeyli vaxtdır yaranıb, öz tarixi missiyasını həyata keçirməkdədir. Cəmil Həsənli özünü müdrik, iradəli siyasətçi kimi təsdiq etdi. Bundan sonra da mən Milli Şuraya lazımamsa, həmsədrlik vəzifəsinə razılıq verərəm. Yox, əgər belə qərara gəlsələr ki, mənim əvvəlki təklifim reallaşsın, yəni həmsədrlik olmasın Milli Şuranın sədri Cəmil Həsənli olsun mən buna nəinki razılıq verərəm, hətta xahiş edərəm dərhal həyata keçirsinlər.

- Əlbəttə qalacağam. Mütləq Milli Şuranın üzvü olaraq qalacağam. Mənim tərəfimdən nə lazımdırsa, Milli Şura üçün edəcəyəm. Mənim bir fikrim odur ki, partiyaların sədrlərinin Milli Şuraya sədr olmasını istəmirəm. Bunda mövqeyim qətidir. Çünki Milli Şura geniş koalisiya kimi nəzərdə tutulub və geniş koalisiya olmalıdır. Milli Şura iki-üç partiyanın birliyi kimi olmamalıdır.

Redaksiyadan: Hörmətli Rüstəm bəyin diqqətinə çatdırırıq ki, Nicat Quliyevlə bağlı məsələ Turan İA və “Yeni Müsavat” qəzetinin rəhbərləri tərəfindən araşdırılıb. Məlum olub ki, qəzetimiz heç bir təhrifə yol verməyib, Agentlik xəbəri necə yayıbsa, o cür də dərc olunub. Bu barədə müvafiq təkzib yazısı da bir gün sonra oxucuların diqqətinə təqdim edilib.