Şuşanın Salatınkəndinə də erməni terrorçuları toplandı?!.

Artıq bir neçə gündür ki, ermənilər Şuşa rayonunun 1988-1991-ci illərdə Ermənistan və xaricdən gələn terrorçuların bazasına çevrilmiş  Böyük Qaladərəsi və Kirov(əsl rəsmi adı Kiçik Qaladərəsi) kəndlərinin ətrafında, guya orada “insan haqlarının pozulması” haqda hay-küy yaradıb. Məsələ ondadır ki,  ordumuzun 44 günlük müzəffər yürüşündən sonrakı məlum razılaşmaya əsasən Rusiya sülhməramlılarının əraziyə daxil olmasıyla həmin kəndlər yenidən terrorçu ermənilərin oylağına çevrilib. Və bu ərazidə toplanan erməni silahlıları “xalqa” müraciət edərək Qarabağı, Şuşanı, Hadrutu və s. Azərbaycan ordusundan geri almaq üçün qüvvə toplamağa, birləşməyə çağırırlar.  Görünür,  məhz bu səbəbdən Azərbaycan ordusu adekvat tədbirlər görməyə məcbur olmuş  və dünən axşam saatlarında yayılmış məlumatlara görə,  bəhs edilən kəndlərdə toplanmış 160-dək erməni terrorçusu əsir götürülüb. 

Moderator.az xəbər verir ki, erməni mənbələri Qaladərəsi və Kirov kəndləri haqda ziddiyyətli məlumatlar yaymaqda davam edir. 

Belə ki, ərazidəki Rusiya sülhməramlılarının köməyi ilə Kirov kəndinin Azərbaycan ordusunun nəzarətindən çıxarıldığı bildirilir.  Bu haqda danışan separatçı tör-töküntülərin rəhbəri Araik Arutyunyanın mətbuat katibi Vaqram Poqosyan bildirib ki, əlavə olaraq Şuşa-Laçın yolu üzərində yerləşən “Yexsaox” adlandırılmış Salatınkənd də hazırda erməni silahlı birləşmələrinin əlindədir.

Xatırladaq ki,  1991-ci il yanvarın 9-da Milli Qəhrəman, jurnalist Salatın Əsgərova və 3 rus hərbçisi  Qaladərəsi və Kirov kəndlərində  toplanmış erməni terrrorçuları tərəfindən edilən silahlı hücum nəticəsində  məhz qonşu Yexsaox(Salatınkənd) kəndinin ərazisində qətlə yetirilib. Elə həmin il Azərbaycan parlamentinin qərarıyla bu kənd qəhrəman jurnalistimizin xatirəsinə Salatınkənd adlandırılıb.

Xəbər verildiyi kimi, bu gün -16 dekabr  Milli Qəhrəman Salatın Əsgərovanın doğum günüdür...

Sultan Laçın