Oktyabrın 21-də Müsavat Partiyasının qərargahında Demokratik Qüvvələrin Milli Şurasının prezidentliyə vahid namizədi, professor Cəmil Həsənli mətbuat konfransı keçirdi. 

Tədbiri giriş sözü ilə açan Cəmil Həsənlinin mətbuat xidmətinin rəhbəri Oqtay Gülalıyev Milli Şuranın vahid namizədinin Avropa səfərlərindən danışdı və qeyd etdi ki, professor xaricdə  bir sıra mühüm görüşlər keçirib. O. Gülalıyev vurğuladı ki, Cəmil Həsənli bu görüşləri seçkidən öncə nəzərdə tutubmuş. Təşviqat kampaniyasının başlaması ilə Avropa səfəri seçkidən sonraya ertələnib.

Sonra çıxış edən C.Həsənli əvvəlcə 9 oktyabrda ölkəmizdə keçirilən prezident seçkisindən danışdı. O bildirdi ki, 9 oktyabrda baş verənlər seçki deyil, hakimiyyətin mənimsənilməsi prosesi olub. Onun sözlərinə görə, Mərkəzi Seçki Komissiyası bu prosesdə fəal iştirak edib: “Özünüz gördüyünüz ki, nə seçkidən əvvəl, nə də sonra Konstitusiyaya riayət olunub. Azərbaycanda Konstitusiya məhkəməsinin nəticəni tələm-tələsik müzakirəyə çıxarması tam qanunsuzdur”.

C. Həsənli seçki saxtakarlığı ilə bağlı geniş danışdı: “Biz seçki saxtakarlığı ilə bağlı şikayətimizi oktyabrın  21-də Ali Məhkəməyə təqdim edəcəyik. Konstitusiya Məhkəməsinin qeyri-qanuni və tələsik qərarından sonra, gizli inaqurasiya mərasimi keçirildi. Prezdident Administrasiyasından inauqurasiya mərasiminin səssiz və gizli keçirməsini İlham Əliyevin sadə həyat tərzi ilə bağladı.  Halbuki 2003-cü ildə heç də belə deyildi. Reallıq isə başqa şeyi deyir. Dünya birliyi dövlətləri qeyri-legitim seçkiyə nümayəndə göndərməkdən imtina ediblər”.

C.Həsənli bildirdi ki, Azərbaycanda seçki yox, “karusel” əməliyyatı keçirilib: “Bülletenləri topa-topa seçki qutularına atıblar. Bu faktlar toplanıb. 9 oktyabra qədər Azərbaycanda keçirilən istər prezident, istərsə də parlament seçkilərində saxtakarlıq gizlicə olurdusa, budəfəki seçkidə saxtakarlığı göz görə-görə etdilər”.

C. Həsənli qeyd etdi ki,  xaricə səfəri zamanı Avropa Birliyinin Xarici Siyasət Komissarlığında, Avropa Parlamentinin Xarici Siyasət Komitəsində, eyni zamanda, Avropa Şurasının İnsan Haqları Komissarlığında, Parisdə bir sıra siyasi dairələrlə, mətbuat nümayəndələri ilə görüşləri olub: “Ondan sonra mən Brüsselə getdim. Oktyabrın 15-16-da Brüsseldə görüşlərimiz oldu.

Görüş zamanı Azərbaycandakı seçkilər ətrafında geniş müzakirə apardıq. Onlar Avropa Parlamentinin 7 nəfərdən ibarət müşahidə missiyasının seçkiyə müsbət rəy verməsindən narahat olublar. Oktyabrın 16-da bu məsələni müzakirəyə çıxardılar. Bir qayda olaraq, Avropa Parlamentinin rəyi həmişə ATƏT-in Demokratik Təsisatlar və İnsan Haqları Bürosunun rəyilə üst-üstə düşdüyü halda, bu dəfə vəziyyət fərqli oldu. İndi onlar həmin 7 nəfərin necə seçildiyini, hansı yollarla müşahidə missiyasının tərkibinə daxil olduğunu, saxtakarlığı təsdiq olunmuş bir seçkiyə necə demokratik, şəffaf seçki rəyi verdiklərini araşdırırlar. Onlar seçkilərin total şəkildə saxtalaşdırılmasından ciddi şəkildə narahatdılar".

C.Həsənli söylədi ki, Avropa Parlamentində keçirdiyi görüşdə Xarici Siyasət Komitəsinin sədri Elmar Brok artıq bu 7 nəfərlik qrupu formalaşdıran departamentin məsul işçisindən məlumat alıb: “Onlar ətraflı şəkildə bu məsələni müzakirə etməkdə qəti qərarlıdır. Mən bu müzakirələrdən belə başa düşürəm ki, Avropa Parlamentinin rəyini ATƏT-in rəyinə uyğunlaşdıracaqlar. Çünki onların əlində seçki saxtakarlığına dair sübutlar barədə kifayət qədər məlumat var. Ən azı, ”AppGate" hadisəsi seçkiyə şəffaf və demokratik don geyindirənlərə nümunə olmalıdır".

Oktyabrın 17-də Avropa Şurasının İnsan haqları üzrə komissarı Nils Mujniekslə görüşən Cəmil Həsənli bildirdi ki, onlar Azərbaycanda insan haqlarının vəziyyəti, o cümlədən siyasi məhbus problemi, toplaşma, ifadə azadlıqlarının məhdudlaşdırılması kimi məsələləri müzakirə ediblər: “Eyni zamanda, Avropa Şurası Parlament Assambleyasının müşahidə missiyasının tutduğu mövqe müzakirə mövzusu oldu. Onlar təəssüf etdilər ki, Avropa Şurası belə bir mövqe tutub. Biz onların nəzərinə çatdırdıq ki, Avropa Şurasının müşahidə missiyası, ümumiyyətlə, bir qurum kimi Azərbaycanda gözdən düşüb, ona etimad yoxdur. ”Kürü diplomatiyası", ayrı-ayrı parlamentarilərin hərəkətləri, Azərbaycan hökumətini müdafiə etmək üçün xüsusi canfəşanlıq göstərənlərlə bağlı ətraflı söhbətimiz oldu. Onlar özləri də bildirdilər ki, bu məsələlərdən məlumatlıdılar".

C. Həsənli onu da qeyd etdi ki, bütün görüşlərdə Azərbaycanda seçkinin saxtalaşdırıldığını təsdiqləyən sübutlar qarşı tərəfin diqqətinə çatdırılıb.

C.Həsənli dedi ki, növbəti mitinqlə bağlı Bakı Şəhər İcra Hakimiyyətinə müraciət ediblər. Oktyabrın 27-də Bakıda seçki saxtakarlığına görə, mitinq keçirmək istəyirlər. O bildirdi  ki, keçiriləcək mitinqdə özü də iştirak edəcək. Milli Şuranın vahid namizədi qeyd etdi ki, 9 oktyabra gedən yol iqtidar və müxalifəti müəyyənləşdirib, saxta müxalifəti ifşa etdi: “İqtidar hakimiyyəti qəsb etməklə yanaşı, özünə müxalifət də yaratmaq istəyir. Saxta müxalifətin taleyini bütün Azərbaycan xalqı gördü. Milli Şura müxalifətin güc mərkəzidir. Biz millətimizin iradəsi ilə bu prosesə getmişik və onların iradəsi ilə də yolumuza davam edəcəyik, mübarizəmizi gücləndirəcəyik”.

C.Həsənli bildirdi ki, bu seçki üsulu ilə parlament seçkilərinə getmək niyyətində deyillər: “Biz görə-görə bu saxtakarlığa gedə bilmərik. Mərkəzi Seçki Komissiyasının seçki keçirməyə nə siyasi, nə hüquqi, nə də mənəvi haqqı var”.

C.Həsənli Milli Şuranın gələcəyi ilə bağlı da fikirlərini bölüşdü: “Milli Şura bu seçkilərdə iradə nümayiş etdirdi, mənəvi qələbəni təmin etdi. Bu mənəvi qələbənin siyasi qələbə ilə yekunlaşması üçün mübarizə aparacağıq. Ola bilsin ki, Milli Şuranın tərkibində  bəzi dəyişikliklər olacaq. Rəsmi şəkildə də hökumət bizi saxta  seçkinin nəticələrinə görə ikinci yerə qoymaqla sübut etdi ki, real müxalifət Milli Şuradır. Hətta saxta seçkinin nəticəsinə əsasən hakimiyyət də bunu təsdiq etdi. Biz Milli Şuranın yenilənməsi, bura yeni qüvvələrin daxil olmasına çalışacağıq. Təşviqat prosesində öz çıxışları ilə Milli Şuraya zərbə vuran adamlarla isə bir yerdə otura bilmərik.  Oktyabrın 24-də Milli Şuranın sessiyası keçiriləcək. Sessiyada müvafiq dövlət başçılarına, ayrı-ayrı qurumların rəhbərlərinə saxta seçkinin nəticələri barədə müraciət ünvanlanacaq”. 

C.Həsənli məlumat verdi ki, noyabrın 14-dən 24-nə kimi ABŞ-da səfərdə olacaq, Dövlət Departamentində, Konqresdə, Senatda, “Freedom House” və başqa təşkilatlarda görüşlər keçirəcək.

Rusiyada baş verən hadisələr barədə danışan C.Həsənli qeyd etdi ki, məsələyə fərqli prizmadan yanaşmaq lazımdır: “Hanı açdıqları iş yerləri? Niyə bizim vətəndaşlar bir tikə çörək üçün Rusiya və digər xarici ölkələrə  pənah aparıblar? Azca pulu olan biznezmenleri də ölkədə işləməyə qoymurlar. Bütün sahələr üzrə işləyən sahibkarlara divan tutulur, onların ölkədə normal çalışmasına şərait yaradılmır. Bütün sahələri hakimiyyətdəki məmurlar monopoliyaya alıb. Maşınından tutmuş, mebel. Kartof-soğan biznesinə kimi hamısı harınlamış məmurların əlindədir”.