“Vətən Müharibəsi və onun nəticələrini əks etdirən sənəd tarixin yaddaşında xalqımızın yernilməzlik nümunəsi kimi əbədi yaşayacaqdır”
Məlum olduğu kimi, dünən
- 1 dekabr tarixində Laçın rayonu Ermənistan Silahlı Qüvvələrindən azad edlib və
Azərbaycan ordusunun nəzarətinə keçib.
Moderator.az olaraq Azərbaycan
Gözdən Əlillər Cəmiyyətinin sədri Səmyar Abdullayevlə söhbərimizdə bu tarixi
olayı şərh etməyə çalışdıq.
-Səmyar bəy, bildiyiniz kimi, dekabrın 1-i tarixində
Laçın rayonu da erməni işğalından azad edildi və Azərbaycanın faktiki nəzarətinə
keçdi. Öncə bu tarixi olayla bağlı düşüncənizi bilmək istərdik.
-Təbii ki, erməni
işğalındakı hər qarış torpağımızın azadlığı özlüyündə son dərəcə mühüm hadisədir
və bu baxımdan Laçının azad edilməsi də son dərəcə böyük əhəmiyyətə malikdir. Hər
şeydən əvvəl qeyd edim ki, Laçın erməni işğalı altında qalan sonuncu rayonumuz
idi və onun azad edilməsi ilə uzunmüddətli işğal faktına son qoyulmuş oldu.
Bununla da Azərbaycanın ərazi bütövlüyü faktiki olaraq bərpa edilmiş oldu. Bu
baxımdan Laçının azad edilməsi torpaqlarımızın azad edilməsi uğrunda aparılan mübarizənin
məntiqi sonluqla başa çatdırılması, ərazi bütövlüyümüzün bərpa edilməsi deməkdir.
Və mən bu münasibətlə bütün Azərbaycan xalqını təbrik edir, şəhidlərimizə
Allahdan rəhmət diləyirəm. Bir daha qeyd edirəm ki, Vətən Müharibəsində əldə
etdiyimiz bu qalibiyyət son dərəcə qiymətli, əvəzsiz və misilsizdir.
-Qarabağın işğaldan azad edilməsi ölkəmizin gələcək
inkişaf perspektivi baxımından nə vəd edir?
-Qarabağ və ətraf
rayonların erməni işğalından azad edilməsi heç şübhəsiz ölkəmizin yaxın gələcəkdə
daha sürətli inkişafına təkan vermiş olacaq. Çünki işğaldan azad edilən
rayonlarımızın böyük kənd təsərrüfatı və iqtisadi perspektivi var ki, bu
perspektivin dəyərləndirilməsi ölkəmizin qısa zamanda iqtisadi inkişaf
baxımınan böyük məsafə qət etməsinə imkan verəcək. Nəzərinizə çatdırım ki,
işğaldan azad edilən rayonlarımızın bir çoxu zəngin yataqları, maddi resursları,
təbii ehtiyatları ilə diqqəti cəlb edir və bu ərazilərin turizm potensialı da
kifayət qədər böyükdür. Bu baxımdan Qarabağda həyatın yenidən canlanması yalnız
bu bölgənin deyil, ümumilikdə ölkəmizin inkişafı baxımından böyük əhəmiyyətə
malikdir və heç şübhə yoxdur ki, biz yaxın gələcəkdə bu inkişafa şahid
olacağıq.
-Səmyar bəy, bəzən bu cür fikirlər səslənir ki,
guya rus hərbçilərinin sülhməramlı kimi prosesə cəlb edilməsi o qədər də doğru
deyil və bu, hansısa fəsadlara səbəb ola bilər. Sizcə doğrudanmı rus ordusunun
Qarabağda sülhyaratma missiyasına cəlb edilməsinin ölkəmizin maraqları
baxımından risklidir?
-Öncə qeyd edim ki, Azərbaycan
bu müharibənin qalib tərəfidir və Ermənistanın imzaladığı kapitulyasiyada Azərbaycanın
tam, qəti üstünlüyü qeyd olunub. Ermənistan işğal etdiyi torpaqları azad etməklə
bağlı üzərinə öhdəlik götürüb və bu, rəsmi İrəvanın üzərinə götürdüyü öhdəliklərdən
sadəcə biridir. Qarabağa rus hərbçilərinin gəlişinə gəlincə, onların missiyası
Ermənistanın üzərinə götürdüyü öhdəlikləri yerinə yetirməsinə nəzarət etmək, bölgədə
sülhü və təhlükəsizliyi təmin etmək, qarşılılqı etimad mühitinin yaradılmasına
yardım etməkdir. Onlar 5 il ərzində məhz
bu missiyanı yerinə yetirəcəklər. Bunun xaricində onların hər hansı səlahiyyəti
yoxdur. Bu baxımdan Rusiyanın bölgəyə göndərdiyi sülhməramlıları Rusiyanın bölgədə
hərbi baza yaratmaq, burada həmişəlik möhkəmlənmək cəhdi kimi xarakterizə etmək
yanlışdır. İşğaldan azad edilmiş bütün torpaqlara məhz Azərbaycan ordusu nəzarət
edir və vətəndaşlarımızın təhlükəsizliyini də məhz Azərbaycan əsgəri təmin edəcək.
-Laçında 5 kilometr enində dəhlizin yaradılması ilə
bağlı da fərqli fikirlər səslənməkdədir.
Hətta bəzi şəxslər hesab edir ki, belə bir dəhlizin yaradılması Laçın şəhərinin
mövcudluğu üçün təhlükədir...
-Hesab edirəm ki, bu kimi
fikirlər bəzi qüvvələr tərəfindən məqsədli şəkildə səsləndirilir və məqsəd dövlətimizin
bu böyük qələbəsinə kölgə salmaq, tarixi zəfərimizin əhəmiyyətini azaltmaqdır. Məhz
buna görə də onlar Ermənistanın kapitulyasiya ilə bağlı sənəddə bəzi məqamları
fərqli cür tədim etməyə çalışır, bununla da ictimai rəydə çaqınlıq yaratmağa cəhd
edirlər. Unutmaq olmaz ki, Laçın ərazisindən keçən 5 kilometrlik dəhliz nə
Laçın, nə də ətraf yaşayış məntəqələri üçün hər hansı təhlükə kəsb etmir.
Burada məqsəd təhlükəsiz gediş-gəlişin təmin edilməsi, qarşılıqlı etimad
mühitinin formalaşdırılmasına nail olmaqdır. Laçın rayonu Azərbaycan torpağı
kimi ölkəmizin nəzarəti altındadır və bu ərazidə ölkəmizin iradəsinə zidd
hansısa adımın atılması mümkün deyil.
Bunu da xatırladım ki,
Naxçıvanla Azərbaycan arasında dəlizin yaradılması da sənəddə əksini tapan
mühüm müddəalardan biridir və bunun reallaşması həm Naxçıvanın, həm də ölkəmizin
inkişafı, yeni kommunukasiya yolları əldə etməsi baxımından mühüm əhəmiyyətə malikdir.
Bu baxımdan, hesab edirəm
ki, hər hansı qüvvənin Azərbaycan xalqının, Azərbaycan ordusunun, Azərbaycan
Ali Baş Komandanının fədakarlığı, qəhrəmanlığı sayəsində əldə etdiyi qələbəyə
kölgə salmasına, onun nəticələrini təhrif etməsinə imkan vermək olmaz. 44
günlük Vətən Müharibəsi və onun nəticələrini əks etdirən tarixi razılaşma Azərbaycanın
böyük uğurudur və bu uğur tarixin yaddaşında hər zaman xalqımızın yernilməzlik
nümunəsi kimi əbədi olaraq yaşayacaqdır.
Seymur ƏLİYEV