Zarui Postancyan rus hərbçiləri ilə də dalaşmışdı, 2009-cu ildə isə Dağlıq Qarabağın “müstəqilliyinin” tanınması üçün AŞ PA-ya layihə təqdim etmişdi
Ermənistanda müxalifətdə olan “İrs” Partiyasının təmsilçisi, bu ölkəni Ermənistanın Avropa Şurası Parlament Assambleyasındakı nümayəndə heyətinin üzvü Zarui Postancyan prezident Serj Sarkisyanı AŞ PA-nın iclasında ifşa etdiyi üçün təqiblərə məruz qalır. Onun cəzalandırılması üçün mexanizmlər aranır. Məsələ ondadır ki, Postancyan assambleyada çıxış edən prezident Sarkisyanı çıxılmaz duruma salıb.
O, ölkə prezidentindən AŞ PA-da soruşub: “Məlumdur ki, siz buraya erməni xalqının iradəsi ilə yox, mütəşəkkil cinayətin - 18 fevral seçkilərində erməni xalqının səsinin oğurlanması hesabına gəlib çıxmısız. Ona görə də de-yure siz erməni xalqının iradəsi və haqlarını təmsil edə bilməzsiniz. Mən sizə başqa bir sual verəcəm. Bu yaxınlarda Avropada kazinoda olmusunuzmu? Çünki cəmiyyət sizi qumarbaz olaraq tanıyır. Kazinoda 70 milyon avro uduzmusunuzmu? Sizin əvəzinizdə bu qədər pulu kim verib? Əgər məbləğ başqa olubsa, kazinoda nə qədər uduzduğunuzu açıqlayın”.
Xanım deputat Sərkisyana qarşı bu ittihamları səsləndirəndən sonra düşmən ölkənin prezidentindən hesab istəyənlər çoxalıb.
“Sarkisyan İrəvana gələndə heç pişiyi də yox idi”. Bunu Ermənistanın müxalif siyasi partiyasının üzvü olan Qurgen Yeqiazaryan bildirib: “Ölkə əhalisinin 60%-nin yoxsulluq vəziyyətində yaşadığı bir vaxtda Serj Sarkisyan kazinoda milyonlar uduzub. O ki Silvio Berluskoni deyil ki, öz pullarını uduzsun, o xalqın pulu ilə oynayır”. (ANSPRESS)
İrəvanda nəşr olunan “Joxovurd” qəzetinin yazdığına görə isə AŞ PA-da Ermənistan nümayəndə heyətinin rəhbəri David Artyunyanın başının üstündə qara buludlar dolaşır. Çünki Ermənistan nümayəndə heyətinin üzvü Zair Postancyana qalmaqallı sualla müraciət etməyə o imkan verib.
Qəzetin hakimiyyətdə olan etibarlı mənbələrə istinadən verdiyi məlumata görə, Artyunyan Ermənistan Kasasiya Məhkəməsinin sədri vəzifəsinə təyin olunmalı idi. Artıq bu məsələ gündəlikdən çıxarılıb və ölkənin AŞ PA-dakı nümayəndə heyətinin sədri çox pis vəziyyətdədir. Bu həqiqətin beynəlxalq qalmaqala çevrilməsinə görə o məsuliyyət daşıyır.
Ermənistan parlamentinin sədri Ovik Abramyan isə Zarui Postancyanın Avropa Şurası Parlament Assambleyasındakı davranışı ilə əlaqədar ölkənin AŞ PA-dakı nümayəndə heyətinin tərkibinə dəyişiklik ediləcəyini açıqlayıb. APA-nın “epress.am” saytına istinadən verdiyi məlumata görə, Ovik Abramyan bu barədə parlament fraksiyaları ilə məsləhətləşmə apardığını söyləyib.
Parlamentin rəhbəri qeyd edib ki, siyasi mövqenin azad şəkildə ifadəsi demokratiyanın təməl daşlarından biridir, lakin bu, özlüyündə mütləq bir hüquq deyil: “Ermənistan Konstitusiyasının 66-cı maddəsində deyilir ki, deputatın azad mövqe bildirmək hüququ təhqir və böhtanın yolverilməzliyi şərti ilə məhdudlaşdırılır. AŞ PA reqlamentinin 21.6 maddəsi də insan ləyaqətini təhqir edən ifadələrdən istifadə olunmasını qadağan edir”.
Zarui Postancyan bir müddət öncə Gömrük İttifaqına daxil olan ərəfədə buna etiraz etdiyi üçün daha bir qalmaqalla üzləşmişdi. Belə ki, Rusiya Federal Təhlükəsizlik Xidməti Sərhəd İdarəsinin məlumatına görə, sentyabrın 25-də Ermənistan-Türkiyə sərhədi yaxınlığında sənədləri yoxlamaq üçün bir avtomobil saxlanıb. Avtomobildə olan Ermənistan parlamentinin üzvü Zarui Postancyan çox kobud tərzdə hərbçilərdən avtomobilin saxlanma səbəbini izah etməyi tələb edib. Sərhədçilərdən müfəssəl cavab alan deputatın sifəti dəyişib və özünü daha ədəbsiz aparıb. Rusiyaya qarşı təhqirlər və millətçi şüarlar səsləndirən deputat hərbçiləri təhqir edib.
Yalnız əlavə dəstə gəldikdən sonra qızışan millət vəkilini və onun yoldaşlarını sakitləşdirmək mümkün olub.
Zarui Postancyan Sərkisyan hökumətinə aqressiv münasibəti ilə yanaşı Azərbaycana qarşı da pozitiv münasibətdə deyil. O, AŞ PA-nın 24 iyun 2009-cu il plenar iclasında səs-küyə səbəb olan təkliflə çıxış etmişdi. Zarui Postancyanın təqdim etdiyi layihədə Azərbaycanın işğal olunmuş Dağlıq Qarabağ bölgəsinin müstəqil dövlət kimi tanınması əksini tapırdı.
Moderator.az
