Mövzuya giriş etməzdən öncə isti-isti bildirim ki, heç vaxt Lalə Şövkətə xüsusi hüsn-rəğbətim olmayıb, nə Heydər Əliyevlə çiyin-çiyinə işləyərəkən “yazıq kişi gecə də yatmır” bəyanatı verərək iliyinə-qanınadək heydərçi olduğunu izhar edəndə , nə istefa verərək müxalif düşərgəyə pənah gətirib anti-heydərçilərin ledisi statusuna yiyələnəndə. Bir sözlə, onu hə zaman mövsümi siyasətçi hesab etmişəm. Doğrudan da o hər zaman seçkilər ilinə qədəm qoyanda zühur edib, epizodik fəallıq sərgiləyib, bəyanatlar verərək mövcudluğunu hiss etdirib, hətta arada bir arada bir bəyanat verib ki, Azərbaycanda ondan yoxdur, ölkənin bir nömrəli siyasətçisi məhz özüdür. Təbii ki, öz dediyinə özü də inanmayıb deyə qısa müddətdən sonra onun açıqlamaları da hamının yadından çıxıb. Beləcə hər seçki dönəmində bu cür aktivləşmə artıq ənənə halını aldığından Lalə xanımın siyasətdə epizodik vurnuxmalarına hamı öyrəncəlidir...
Amma gərək
məni bağışlayasınız, bu dəfə məhz ondan sitat gətirməyə məcburam. Çünki kimin
dilindən səsləndirilməsindən asılı olmayaraq əlahəzrət fakt kal armud kimidir,
onu dansan boğula bilərsən. Odur ki, Lalə xanımın yola saldığımız həftə sonu nəhayət
uzun fasilədən sonra zühur edib mətbuata açıqlama verməsi, daha doğrusu fikirlərini
yenə də yazılı formada ştatdankənar poçtalyonu-Əvəz Temirxan vasitəsilə izhar
etməsini ciddiyə almaq lazım. Oxumayanlara qısaca nəql edim ki, Lalə xanım nə
yemisən turşulu aş, illərin kin-küdurətin töküb Milli Şuranın əsas təsisçilərinin,
konkret olaraq İsa Qəmbərin üstünə və ötənlərdə yaşananları xatırladaraq
Müsavat başqanının elçibəyçiliyini məsəxərəyə qoyub. İnsaf naminə qəzəbli olduğu
görünsə də bir çox ağrılı həqiqətləri də söyləyib və sonda Heydər Əliyevi bir
daha tərifləyərək müxalifət liderləriylə müqayisə olunmayacaq bir şəxsiyyət
olduğunu iddia edib.
Onun ən
çox diqqətimi cəlb edən və əslində bu yazının yazılmasına rəvac verən
açıqlaması isə Milli Şurada yaşananları “evcik-evcik” oyunu adlandırmasıdır.
Doğru sözə nə deyəsən? Axı mən də xeyli əvvəldən qosqoca müxalifət liderlərini
qınamışdım ki, belə asanlıqla tovlanmaq onların bütün şərəfli bioqrafiyasına,
saç-saqqallarını ağartdıqları inadkar mübarizə yoluna kölgə saldı və cəmiyyətdəki,
beynəlxalq arenadakı nüfuzlarını alt-üst etdi. Çünki hər dəfə seçkiləröncəsi rusların
gəlib Bakıda antimüxalifət ssenariləri qurduqlarını iddia edirdilərsə bu dəfə
elə tora düşdülər ki, Moskvadan hansısa emissarın gəlişinə də ehtiyac qalmadı. Ancaq əvəzində Putinə
Bakıya gələrək hakimiyyətdən təfərrüatını bilmədiyimiz hansısa iriçaplı güzəşt
qoparması üçün zəmin hazırladılar. Buna nə ehtiyac vardı, bəylər, xanımlar? Axı
Rüstəm İbrahimbəyovun hansı ölkənin vətəndaşı olduğunu dəqiqləşdirmədən onu belə
bir taleyüklü projenin lokomotivi statusunda qabağa verərək siyasi qəza törətmək
gerçəkdən də evcik-evcik oyunu deyildi, bəs nəydi?
Qanmadığım
bir şey var və yəqin ki, heç vaxt bu suala ağlabatan cavab ala bilməyəcəm.
Milli Şura tutaq ki, “evcik-evcik” oyunu yox, əsrin projesi idi. Elə isə niyə
İctimai Palata formalaşan zaman İsa Qəmbər Lalə Şövkəti və İqbal Ağazadəni həmin
quruma yaxın buraxmırdı ki, onlar filankəslərdi və filan yerlərə bağlıdırlar.
Yaxud bir az da qabağa gedək, 2005-ci ilin 26 noyabrında “Qələbə” meydanındakı mitinqi
oturaq aksiya çevirənlərin Rusiyanın dəsti-xəttini həyata keçirdiklərini iddia
etdikləri halda İlham Əliyev demişkən, belə ünsürləri yenidən Milli Şuraya dəvət
etmək, az qala onlara minnətçi düşmək “evcik-evcik” oyunu deyildisə, bəlkə “göydələn”
tikmək idi, biz bilməmişik? Bəlkə mən qərəzli yanaşıram, dostlar, bir Allah bəndəsi
çıxıb bu suallara cavab verə biləcək ki, niyə bu evciyi millətin başına
yıxdılar...? Məncə nə cavab verən tapılacaq, nə səhvini etiraf edən. Axı məğlubiyyətin
yetim olduğunu hamımız lap “evcik-evcik” oynadığımız zamanlardan eşitmişdik...