Alış kişi 80 yaşına çatsa da, söyüşlərini yerə qoymazmış və tez-tez arvadını “pornoqrafik” söyüşlərə qonaq edərmiş. Günlərin birində yenə də Alış kişinin ağzı açılır və başlayır arvadı söyməyə: “Ay sənin”¦” Nə isə, ardını özünüz bilirsiniz. Arvad da dözür-dözmür, soruşur ki, “nəynən, Alış?””¦

Bu populyar lətifə artıq Azərbaycanda müxtəlif situasiyalar üçün atalar sözünə çevrilib. Bu dəfə milli komandamızın 2016-cı ildə futbol üzrə Avropa çempionatının final mərhələsinə çıxmaq planları barədə AFFA prezidenti Rövnəq Abdullayevin açıqlaması bu lətifəni yadıma saldı. Aha, deməli, Rövnəq müəllim Azərbaycanın futbol üzrə millisini 2016-cı ildə Avropa çempionatının qrup mərhələsindən final mərhələsinə çıxarmağı planlaşdırır. Baxaq və görək, “nəynən”...

Millinin baş məşqçisi Berti Foqts Rövnəq Abdullayevi şantaj edəndən bu yana AFFA prezidenti daha nə danışdığını özü də bilmir. Yadınızdadırsa, bir müddət əvvəl Foqtsun baş məşqçi postundan uzaqlaşdırılması məsələsi ciddi şəkildə gündəmə gələndə, alman məşqçi bildirmişdi ki, buradan gedəndən sonra onun danışacaqları UEFA-da çoxlarını sevindirəcək. Yəni Foqts AFFA-nı zibillərinin üstünü açmaqla hədələmişdi və Rövnəq Abdullayev də dərhal “sönmüşdü”. O vaxtdan bu yana baş məşqçinin əvəzlənməsi ilə bağlı sualları cavablandırarkən R.Abdullayevin qarşısında yalnız bir prinsip dayanır: Elə cavab vermək lazımdır ki, Berti Foqts əsəbiləşməsin.

Bu dəfə də eyni prinsip qüvvədə qaldı: “Bu məsələyə AFFA-nın İcraiyyə Komitəsi qərar verəcək. Hələlik isə baş məşqçi Foqtsdur”. Bura qədər aydındır: AFFA rəhbəri Foqtsun şantajlarından qorxub - maxinasiyaların üstünün açılması qorxusu onu son vaxtlar dəfələrlə Foqtsun biabırçı fəaliyyətini tərifləməyə məcbur edib. Amma hələ bu harasıdır?.. Rövnəq Abdullayevin açıqlamasının ardına fikir verin: “Elə seçim etməliyik ki, millimiz 2016-cı ildə Fransada keçiriləcək Avropa çempionatının final mərhələsində çıxış edə bilsin”.

Əla! İndi gəlin, bu böyük uğurun ehtimalını hesablamağa çalışaq. Görək, nə etməliyik ki, Ermənistan və Gürcüstanı qabaqlayıb “Avro 2016”-nın qrup mərhələsindən çıxaq. FİFA-nın avqust ayında açıqladığı reytinq cədvəlində Azərbaycan 115-ci, Gürcüstan 97-ci və Ermənistan 66-cıdır. Amma söhbət Avropa çempionatından gedir axı. O zaman biz bu siyahıda yalnız Avropa millilərini saxlayaq. Bu zaman Azərbaycan 43-cü, Gürcüstan 40-cı və Ermənistan 34-cü olacaq.

Hələ ardına baxın. Azərbaycan milli komandası heyətinin ümumi transfer dəyəri 9 milyon 225 min avrodur. Ən bahalı oyunçumuz Rəşad Sadıqovdur ki, onun da transfer dəyəri 650 min avrodan çox deyil. Bütün heyət Azərbaycan klublarında oynayır.

Gürcüstan millisinin ümumi transfer dəyəri 26 milyon 625 min avrodur. Ən bahalı oyunçusu Quram Kaşiadır, transfer dəyəri 5 milyon avrodur, Hollandiyanın “Vitesse” klubunun oyunçusudur. Bir az da səy göstərsə, 26 yaşlı gürcü futbolçunun transfer dəyəri Azərbaycan millisinin ümumi dəyərini geridə qoyacaq.

Nəhayət, düşmən ölkə barədə. Bu hissəni Rövnəq Abdullayevin oxuması vacibdir, baxmayaraq ki, bu heç nəyi dəyişməyəcək. Ermənistan millisinin ümumi transfer dəyəri 50 milyon 300 min avrodur. Düz gördünüz, 50 (əlli) milyon 300 min avro!

Heyətin ən bahalı oyunçusu barədə danışmazdan əvvəl 2 başqa oyunçu barədə məlumata baxaq. Moskvanın “Spartak” klubunun heyətində oynayan Aras Ozbiliz transfer bazarında 6,5 milyon avro səviyyəsində qiymətləndirilir. Elə bu klubun heyətində oynayan Yura Movsisyan isə 7,5 milyon avro transfer dəyərinə malikdir. Yeri gəlmişkən, Movsisyan 1987-ci ildə Bakıda doğulub. Topla ilk ünsiyyətini Ermənistanda qurub və 1999-cu ildə ailəsi ilə birlikdə ABŞ-a köçüb. Avropaya isə artıq futbol ulduzu kimi qayıdıb.

Nəhayət, Ermənistanın ən bahalı oyunçusu: Henrix Mxitaryan. Onun transfer dəyəri 26 milyon avrodur. Bəli, bir erməni futbolçunun dəyəri Azərbaycan millisinin ümumi dəyərindən 3 dəfə çoxdur. Elə bilməyin ki, Mxitaryan futbolu haradasa Ermənistandan kənarda öyrənib. Qətiyyən elə deyil. Mxitaryan futbol sənətini nə vaxtsa Azərbaycan klubuna məğlub olmuş bir erməni klubunda mənimsəyib. O, 1989-cu ildə İrəvanda anadan olub. Elə orada da Bədən Tərbiyəsi İnstitutunu bitirib. Futbolu Ermənistanın “Pyunik” klubunda öyrənib. Uşaq yaşlarında bu kluba üzv yazılıb və artıq 15 yaşında bu klubdan ilk maaşını alıb. Səhv etmirəmsə, 2005-ci ildə Birlik Kuboku oyunlarında “Neftçi” bu erməni klubunu 2-0 hesabı ilə məğlub etmişdi. Amma nə fayda? Bu klub Mxitaryan kimi bir futbolçu yetişdirib, onun dəfəri milyonlarla ölçülür.

Mxitaryan futbol ulduzu olaraq Donetskin “Şaxtar” klubunda parlayıb, bu il isə dünya nəhənglərinin siyahısında yer alan Dortmund “Borussiya”sının heyətinə qatılıb. İndi daha hara qaçsaq da, Mxitaryandan yaxamızı qurtara bilməyəcəyik. Tez-tez bu oyunçu “İdman Azərbaycan” kanalının efirinə gələcək və top bu oyunçuda olanda aparıcılarımız susacaqlar. Heç birinin cəsarəti çatmayacaq soruşsun ki, “axı belə oyunçular bizdə niyə yetişmir?”.

”¦Və soruşuruq: Nədən Azərbaycanda da transfer dəyəri 20-30 milyona çatan və adlı-sanlı klublarda oynayan oyunçular yetişmir? Bu sualın cavabını Rövnəq Abdullayev hamıdan yaxşı bilir. Çünki məhz o, Azərbaycanın uşaq futbolundan tutmuş AFFA-nın ən yüksək kürsüsünə qədər korrupsiya maşınının necə işlədiyini aydın görür, daha doğrusu, bu maşını onun özü sürür”¦

Bəli, “Neftçi” ermənilərin “Pyunik” klubunu yenə də uda bilər, ancaq hələ yaxın perspektivdə Rövnəq Abdullayevin sevimli futbol klubunun öz xalqına Mxitaryan səviyyəli bir “Muxtarov” yetişdirib verəcəyini gözləməyin. Bütün bunlar Rövnəq Abdullayevdən sonra baş verəcək - o, bu uğuru görməyəcək”¦

P.S. Gürcüstan millisinin baş məşqçisi 45 yaşlı gürcü Temur Ketsbaya, Ermənistan millisinin baş məşqçisi isə 39 yaşlı erməni Vardan Minasyandır.

M.Tofiqoğlu