Cavid Qurbanov:"10 ildə yol infrastrukturunun inkişafı istiqamətində böyük işlər görülüb"

C.Qurbanov bildirib ki, ölkənin ümumi istifadədə olan 18994 kilometr avtomobil yolunun 17521 kilometrinə Nəqliyyat Nazirliyinin tabeliyində fəaliyyət göstərən “Azəryolservis” Açıq Səhmdar Cəmiyyəti tərəfindən xidmət göstərilir. Onun 4366 kilometri respublika əhəmiyyətli, 13155 kilometri yerli əhəmiyyətlidir. Bu yollarda ümumi sayı 1285-a yaxın 46578 poqon metr uzunluğunda körpülər var. Bakı şəhəri ərazisində olan yollar, prospektlər və küçələrin ümumi uzunluğu isə 1552 km təşkil edir. «Bu gün qürur hissi ilə deyə bilərik ki, ölkə başçısı cənab İlham Əliyev tərəfindən diqqət və qayğı nəqliyyat sektorunun dinamik inkişafı üçün böyük imkanlar yaratmışdır. "Gələcəkdə tranzit ölkə kimi bizim bölgədəki və dünyadakı mövqelərimiz daha da güclənəcəkdir". Ölkə başçısının bu kəlamları ölkədə nəqliyyat sisteminə necə böyük diqqət göstərdiyinin bariz nümunəsidir. Bu gün nəqliyyat infrastrukturunun mühüm tərkib hissəsi olan avtomobil yolları şəbəkəsi yüksələn xətlə inkişaf edir. Bu sahədə çox böyük işlər görülür»-deyə, C.Qurbanov vurğulayıb.