“Pandemiya xalqımızın ali mənəvi dəyərlərini bir kəs daha üzə çıxardı”
Bütün dünyada olduğu kimi, Azərbaycanda da koronavirusa qarşı mübarizə davam edir.
Moderator.az olaraq millət vəkili Cavid Osmanovla söhbətimizdə ölkəmizdə koronavirusa qarşı mübarizə baxımından atılan addımlar, bu addımların effektivlik dərəcəsi və s. kimi məsələləri şərh etməyə, ölkəmizdə və dünyada baş verən olayları fərqli rakurslardan dəyərləndirməyə çalışdıq.
-Cavid müəllim, koronavirus pandemiyasının ilk günündən etibarən ölkəmizdə əhalinin, xüsusilə də aztəminatlı ailələrin, cəmiyyətin sosial baxımdan həssas hissəsinin, o cümlədən sahibkarların dəstəklənməsi baxımından silsilə tədbirlər həyata keçirildi. Sizcə bu tədbirlər yetərincə faydalı oldumu?
-Bildiyiniz kimi, bütün dünyada koronavirus pandemiyası tüğyan edir. Hər bir dövlət də bu mübarizədə ÜST-ün tövsiyyələrinə uyğun şəkildə, öz gücünü uyğun formada addımlar atır. Dünyanın bir sıra ölkələri bu baxımdan daha sabit ölkələr sayılır ki, bunlardan da biri Azərbaycandır.
Ölkə prezidenti cənab İlham Əliyev hələ ilin əvvəlində, fevralın 28-də koronavirusla bağlı ilk yoluxma müəyyən edilən zaman dərhal çevik addımlar atdı. Nazirlər Kabineti yanında Operativ Qərargahın yaradılması, zəngin sosial paketin təqdim edilməsi, 600 min nəfərə iki ay ərzində 190 manatın verilməsi, ünvanlı sosial yardım alan ailələrin sayının 10 min nəfər artırılması, ödənişli iş yelərinin sayının 90 minə çatdırılması və s. bu kimi tədbirlər, sahibkarlara dövlət dəstəyinin göstərilməsi, özəl sektorda çalışan 700 minə yaxın insanın dövlət tərəfindən dəstəklənməsi həyata keçirildi.
Bütün bu tədbirlər istər sahibkarların, istərsə də sosial baxımdan aztəminatlı ailələrin dəstəklənməsi baxımından olduqca faydalı oldu. Insanlar dövlətin dəstəyini öz üzərində bilavasitə hiss etdi. Dövlətimiz ən çətin məqamda belə hər bir vətəndaşına sahib çıxmaq iqtidarında olduğunu əməli surətdə sübut etdi.
-Pandemiyaya qarşı mübarizə bütün dünyada aparılsa da, bu mübarizədə hər ölkə fərqli nəticə sərgiləyir. Sizcə bu fərq nə ilə bağlıdır?
-Bu məsələdə hər dövlətin öz yanaşma üsulundan da çox şey asılıdır. Bura ölkənin iqtisadi qüdrəti, onun səhiyyə infrastrukturunun vəziyyəti, təşkilati baxımdan çevik addımların atılması və s. daxildir.
Təbii ki, koronavirus pandemiyası dövründə Operativ Qərargah tərəfindən ÜST-nin tövsiyyələrinə uyğun bir sıra tədbirlər həyata keçirdi. Karantin rejimi tətbiq olundu. Sərt şəkildə tətbiq edilən karantin rejimi sonrakı mərhələdə yumşaldıldı.
Ölkəmizin səhiyyə infrastrukturunun yüksək səviyyədə olması qeyd olunması gərəkən vacib məsələlərdən biridir. Bu günə kimi ölkə prezidenti cənab İlham Əliyevin rəhbərliyi ilə 700-ə yaxın tibb müəssisəsi əsaslı şəkildə təmir olunub və ya yeni müəssisələr tikilib. Koronavirus pandemiyası dövründə də 20-dən çox yeni laboratoriya quraşdırıldı, yeni klinikalar istifadəyə verildi. 10 modul tipli xəstəxananın quraşdırılması nəzərdə tutulub ki, bunlardan 4-ü artıq quraşdırılaraq istifadəyə verilib.
-Azərbaycanda pandemiyaya qarşı uğurlu mübarizədə ölkəmizin güclü iqtisadiyyata sahib olması faktı nə dərəcədə həlledici rol oynadı?
-Şübhəsiz ki, ölkə iqtisadiyyatının vəziyyəti də bu cür fors-major hallarında xüsusi əhəmiyyət kəsb edən amillərdən biridir. Azərbaycan prezident İlham Əliyevin rəhbərli altında son illər beynəlxalq reytin cədvəllərində, eləcə də “duinq biznes” hesabatlarında Azərbaycanda iqtisadi artım tempinin inkişaf etdiyi görünür. Bütün bunlar ölkə prezidentinin birbaşa nəzarətində olan məsələlərdir. Ölkə başçısının tapşırıq və tövsiyyəsi ilə həyata keçirilən tədbirlər koronavirus pandemiyasına qarşı effektli mübarizəni şərtləndirən əsas amillərdir.
-Cavid müəllim, bildiyiniz kimi, koronavirusa qarşı mübarizənin davam etdiyi müddət ərzində Azərbaycan dünyanın 29 ölkəsinə humanitar yardım göstərib, hansı ki, gələcəkdə də bu cür yardımların göstəriləcəyi istisna deyil. Sizcə ölkəmizin pandemiyadan əziyyət çəkən dövlətlərə göstərdiyi bu dəstək Azərbaycanın bütün bəşəriyyətin gələcəyindən duyduğu narahatlığın isbatı sayıla bilərmi?
-Şübhəsiz. Baş verənlər göstərir ki, Azərbaycan dövləti koronavirusa qarşı yalnız milli ruhda deyil, qlobal və regional miqyasda da mübarizə aparır. Azərbaycan 29 ölkəyə müxtəlif yardımlar göstərib ki, bura tibbi ləvazimatlar, ərzaq yardımları və s. daxildir. Ölkəmiz ÜST-ə iki dəfə 5 milyon dollar məbləğində maliyyə yardımı göstərib. Bu, Azərbaycanın koronavirusa qarşı dünya miqyasında mübarizə apardığını, bu mübarizəyə böyük töhfələr verdiyini göstərir.
-Azərbaycanın dünya miqyasında pandemiyaya qarşı mübarizə apardığı bir zamanda, Ermənistan son bir həftə ərzində 10-dan çox ölkəyə kömək məqsədi ilə müraciət edib, pandemiyaya öhdəsindən gələ bilmədiyini etiraf edib. Bilmək istərdik ki, eyni təhlükə qarşısında iki dövlətin nümayiş etdirdiyi fərqli reaksiya Azərbaycanın iqtisadi qüdrəti ilə yanaşı, həm də səhiyyə sisteminin, tibb personalının böyük güc və geniş imkanlara malik olmasının göstəricisi kimi dəyərləndirilə bilərmi?
-Işğalçı Ermənistanda koronavirusla bağlı acınacaqlı vəziyyətin mövcudluğu müşahidə edilir. Ermənistanın baş naziri Nikol Paşinyan bu günə qədər yalnız sərsəm bəyanatları, təxribatçı çıxışları ilə yadda qalıb. Son hadisələr də göstərir ki, Ermənistanda növbəti etiraz dalğası baş qaldıracaq.
Ermənistanda ağır ictimai-siyasi böhran mövcuddur və bu böhran getdikcə daha da dərinləşəcək. Statistik rəqəmlərə nəzər salsaq görərik ki, Ermənistanda son günlər hər gün 600-dən çox yoluxma halı var. Azərbaycanda isə bu götərici 300-dən çoxdur. Burada bir məsələni də diqqətə çatdırmaq lazımdır ki, Azərbaycanın əhalisi Ermənistandan təxminən 4 dəfə çoxdur. Ermənistanda pandemiyadan ölüm halları da Azərbaycandan əhəmiyyətli dərəcədə çoxdur.
Ermənistanın iqtisadiyyatı Azərbaycan iqtisadiyyatından qat-qat aşağıdır. Ermənistanda səhiyyə infrastrukturu tamamilə çökmüş vəziyyətdədir. Bu yaxınlarda Paşinyanın özü sosial şəbəkədəki hesabında vurğulamışdı ki, Ermənistan pandemiyaya görə vəziyyət acınacaqlıdır, günü-gündüən vəziyyət daha da pisləşir.
Ermənistandan fərqli olaraq, Azərbaycan təşkilatı baxımdan da mühüm addımlar atdı. Beynəlxaql KİV-lərdə yer alan məqalələrdən də görünür ki, Azərbaycanın koronavirusa qarşı mübarizə təcrüəsindən dünyanın bir sıra inkiaşf etmiş dövlətləri istifadə etməkdədir. Azərbaycan bütün parametrlər üzrə, eləcə də tibbi personalın hazırlıq səviyyəsi baxımından Ermənistandan qat-qat üstündür.
-Cavid müəllim, koronavirusla mübarizənin davam etdiyi hazırkı məqamda cəmiyyətdə yardımlaşma, imkansız ailələrlə kömək göstərilməsi halları davam edir. Sizcə Azərbaycan xalqının milli-mənəvi dəyərlərinə məxsus bu amil koronavirusa qarşı daha effektiv mübarizəyə kömək edirmi?
-Pandemiya Azərbaycan xalqının ali mənəvi dəyərlərini bir kəs daha üzə çıxardı. Baş verənlər bir daha göstərdi ki, xalqımızda xeyirxahlıq, mərhəmət, ürək yanğısı, bir-brinə sevgisi var. Dövlət başçımızın Azərbaycan xalqına sevgisinin özü buna nümunədir. Heydər Əliyev Fondu tərəfindən pandemiya dönəmində 200 mindən çox vətəndaşa ərzaq yardımının göstərilməsi faktı da buna nümunədir. Koronavirusa Qarşı Mübarizə Fonduna Azərbaycanın hər bir təbəqəsinin imkanı daxilində yardım göstərməsi də xalqımızın böyük mənəvi dəyərlərindən xəbər verir. Hansı ki, bu dəyərlər ermənilərə yaddır. Buna görə də Ermənistandakı ağır böhranın daha da dərinləşməsi, daha böyük fəsadlara səbəb olması qaçılmazdır.
Seymur ƏLİYEV