Bu günlərdə
Laçın rayonundan olan məcburi köçkün, I qrup əlil, dializ xəstəsi,
hazırda İmişli rayonu Əliqulular kəndi yaxınlığında Şirinqum deyilən ərazidə
məskunlaşan Cəfərov Vahid Məhəmməd oğlu ölkə başçısı İlham Əliyevə müraciət
ünvanlayıb. Müraciətdə deyilir:
“Cənab prezident! 15 iyul 2012-ci ildə bir xanım sürücünün günahı üzərində avtomobil qəzası zamanı ciddi xəsarət almışam, hətta bir neçə gün morqda qalmışam. Qəzada böyrəyimin birini itirmişəm, digəri işləmir, dializlə yaşayıram. Həyatım alt-üst, cəhənnəmə çevrilib. Əgər körpə balalarım olmasa idi, bu əzabdansa çoxdan intihar edərdim. Həyatımı iflic edən bir məsuliyyətsiz sürücünün mənim yolumun əksi istiqamətində çıxaraq, məni şikəst etməsi, eyni zamanda asfalt üzərində al-qan içərisində qoyaraq qaçması, məni tək, yararsız böyrəyə möhtac qoyması bir yana, məmur özbaşınalığı İmişli RPŞ-nin müstəntiqi Ramiz Balayevin qəzanın səbəbkarı kimi məni günahkar etməyə çalışması, Fizuli rayon Mərkəzi Xəstəxanasının dializ həkimi Anarın məndən böyrək operasiyası üçün 6 000 manat pul alması, şikayətlərimin isə Fizuli MRX-nin baş həkimi Cümşüdə göndərilməsi məni öldürmək kimi bir addım idi. Yəni mənə həm mənəvi, həm də fiziki terror edilmişdi. Bir neçə şikayətdən sonra ombudsman xanım E. Süleymanovanın cavabı məni ağrıtdı, təəssüf etdim: “Sizin başqa (rüşvət, pul) məsələləri ilə bağlı faktlarınız təsdiqini tapmamışdır.” Bu məktub mənə o vaxt çatdi ki, ondan bir neçə gün əvvəl Fizuli MRX-nin baş həkimi Mürşüd, dializ həkimi Anar, İmişlidəki dos-tanışları, İmişli MRX-nin baş həkimi Cəsur Paşayev, mənim vəkillərimin də iştirakı ilə mənə minnətçi düşmüşdülər ki, ifadə-izahat verim ki, həkimlərə rüşvət və pul verməmişəm. Mənə özlərinin hesabladıqları ziyanı 6 000 manatdan 2 dəfəyə 4 000 manat qaytaracaqlarını 5-6 şahidin yanında dedilər. 3 gün İmişlidə qalıb, mənə minnətçi düşmüşdülər, mən isə pulumun hamısını istədim. Səhiyyə Nazirliyi isə ərizələrimi Cümşüd həkimə qaytarırdı. İndi mən nazir O. Şirəliyevdən sual edirəm ki, məndən nə vaxt izahat alınıb. Ombudsmana saxta cavablar yazılıb. Belə çıxır ki, mənim adımdan saxta izahat yazılıb. Dializ xəstəsiyəm deyə, tez öləcəyimi düşünüblər. Ömrü yazan da, pozan da Allahdır. Anar həkim mənə dedi ki: “Sən kürdsən, kürdlər şikayət etmirlər, heç vaxt yalvarmırlar.” Ona bildirdim ki: “Dağ adamı Laçın kürdüyəm, PKK-filan üzvü deyiləm, İraq, Türkiyə yox, Azərbaycanlı kürdəm. Yoxsa elə bilirsiniz ki, kürdlərin hamısı terrorçudur? Əsil terrorçu məni qəzaya salıb, asfalt üzərində ölmüş bilib qaçan, sürücüdür. Onu müdafiə edən müstəntiq R. Balayevdir, sən Anarsan ki, bir böyrəklə əzablı yaşamağımı bilib, 6 000 manat pulumu almısan, üstəlik də operasiya etdirməmisən. Mən Məsud Bərzaniyə, Öcalana yox, qarantım saydığım öz ölkəmin prezidentinə, dövlətimin rəsmilərinə üz tutub, kömək istəmişəm, hələki şikayətlərim eşidilmir.”
Məcburi köçkün müraciətində üzləşdiyi məmur biganəliyindən də söz açıb: “Həkimlər mənə, ikinci yararsız böyrəyimə 4 ay vaxt qoymuşdular. Fizuli həkimlərinin, qaçqınkomun, laqeyd münasibətindən, həyatım tükdən asılıdır. 2 azyaşlı körpə balalarımı da nəzərə almadılar. Birinci qrup əlilə çevrilməyimdən yana yalvardım. Ombudsman da məmurları və həkimləri müdafiə etdi. Qeyd etdiyim kimi, avtoqəzadan sonra, bir böyrəyim çıxarılıb, biri də işləmir, dializlə yaşayıram. Dializ əvvəlcə Sabunçu rayonunda aparılıb. Bu sahə üzrə mütəxəssis həkim Fariz Babayevdən yaxın rayonlardan birinə köçürülməyim barədə xahiş etmişdim. Fizuli MRX-ya məsləhət bildi. Proses gecikdiyindən Fizulidə əvvəlcə 3 dəfə nəğd pulla dializ olundum. Anar adlı dializ şöbə müdiri 1 000 manat istədi, əvvəlcə 800 manat verdim, sonra 200 manatı verəcəyimə söz verdim. Fariz Babayevlə əlaqə saxlayanda, bildirdi ki, artıq köçürmə baş tutub, pulunu geri al. Anar həkimdən pul istədim, əvvəlcə vermədi. Baş həkim Cümşüdə şikayət edəndən sonra pulu qaytardılar. Sonra Anar həkim Heydər Əliyev fondu vasitəsi ilə aksiya keçirildiyini, pulsuz böyrək köçürmə əməliyyatı olacağını 7 nəfərin də aksiyaya qoşulduğuna mən də inandım. Yenidən əvvəlcə Anar həkimə 800 manat, Neftçilər xəstəxanasına isə köçürmə yolu ilə 3 000 manat pul köçürdüm. Mənə bildirildi ki, sənə böyrəyi öz yaxınların verəcək. Əlavə olaraq 1350 manat da istədilər. Anar həkimə zəng etdim ki, axı 2500 manat demişdin, sonralar mənə bildirdilər ki, aksiya söhbəti yalandır, bu fırıldaqdır. Mən pulumu Anar həkimdən istədim. Dedim ki, heç olmasa pulumu Neftçilər xəstəxanasından qaytar, qohum-əqrəbadan pul toplayım, dövlətdən də kömək istəyib, xaricdə böyrəyimi dəyişdirim. Mənə bildirdi ki, əgər o pulu istəsəm, mənim qulağımı və dilimi kəsərlər.”
Məcburi köçkün sözün həqiqi mənasında olum və ölüm dilemması qarşısında qaldığını vurğulayıb: “Mənim həyatım isə tükdən asılıdır. Şikayətlərimə əsasən Fizulinin baş həkimi cavab verir. Onların bu əməli Heydər Əliyev Fondunun nüfuzuna xələl gətirir. Məgər fondun mənim kimi arxasızın pulunamı ehtiyacı var? Əksinə, H. Əliyev fondu imkansız insanların xaricdə müalicəsini istənilən qədər edib. Mən birinci ledi, bu xalqın güvənc yeri Mehriban Əliyevadan kömək istəyirəm. Tək oğlunun Heydər İlham oğlunun və nəvələrinin canına and verirəm, mənim körpə balalarımın yetim qalmaması naminə mənə köməklik edilməsinə aidiyyəti qurumlara göstəriş verilməsini xahiş edirəm. Bütün kütləvi informasiya vasitələrindən QHT-lərdən mənə mənəvi dəstək verib, dövlət rəsmilərinin yadına salmalarını xahiş edirəm. Çünki 10-larla məktubum cavabsız qalıb. Tək böyrəyim isə artıq çürüyür.
Möhtərəm cənab prezident!
Sizdən prezidentim, qarantım azyaşlı körpələrim naminə məndən alınmış pulun geri qaytarılmasına, həyatımın tükdən asılı olmasını nəzərə alıb, müalicəmin sürətlənməsinə mənə köməklik edilməsinə göstəriş verəsiniz. Hər şey üçün təşəkkür edirəm”.
Şamil