Başlıqdakı ifadə hansısa Azərbaycan, yaxud Türkiyə vətəndaşı tərəfindən deyil, Rusiyanın müttəfiqi sayılan  Ermənistanın aparıcı nəşrlərindən birinin yazarı tərəfindən işlənib. 

Əslində erməni jurnalist həmin ifadəni  populyar söyüşdəki kimi fotodan da bəlli olan daha sərt formada işlədib. Biz etik baxımdan onu xeyli yumşaltmışıq. Və o da var ki, Azərbaycan tərəfdən bu epitet Ermənistanın həm keçmiş, həm də indiki siyasi və hərbi hakimiyyətinə, o cümlədən ter-petrosyanlara, köçəryanlara, sərkisyanlara, eləcə də Qarabağdakı separatçı rejim rəhbərlərinə münasibətdə işlənə bilər. Çünki Qarabağ məsələsi ilə bağlı Kreml və son 20 ildə konkret Rusiya lideri V.Putin erməni siyasi və hərbi isteblişmentini, eləcə də Bakıdan onlara dəstək verən əsl “5-ci kalon”u bəsləməsə, torpaqlarımızı çoxdan azad etmək imkanı yaranmışdı. Bəs erməni yazar Tevos Arşakyan öz soydaşları haqqında  bəhs edilən ifadəni konkret kimlərə qarşı və hansı məqsədlə işlədir?..

Bu suala cavab tapmaq üçün Moderator.az işğalçı ölkənin “Armenian report” nəşrində dərc olunmuş  “Putinin bəslədiyi ermənistanlı it uşaqları”  başlıqlı məqalənin əsas hissəsinin tərcüməsini nəzərinizə çatdırır:

“Bizim rəsmilər, gürcülərdən fərqli olaraq Ukrayna kimi, sinəsində ilan bəsləyən "strateji müttəfiqi" ilə eyni tonda danışmağa cəsarət tapmadılar.  Keçən bütün həftə boyu postsovet müttəfiqləri - Gürcüstan və Ukrayna arasında  Ukrayna Prezidenti Vladimir Zelenskinin Gürcüstanın keçmiş prezidenti Mixail Saakaşvilini öz hökumətində baş nazir müavini təyin etmək niyyəti ilə bağlı diplomatik qalmaqal yaranmışdı. Təsadüfən qeyd etmədik ki, bu gün Kiyev və Tiflis əslində əsas hərbi-siyasi müttəfiqlərdir - hər iki dövlət MDB-dən ayrılıb və anti-Rusiya siyasətini davam etdirir.  Bu, ötən həftəyədək, yəni Zelenski  Qərbin təzyiqi ilə Saakaşvilini baş nazirin müavini təyin edənə qədər idi. Tiflisin reaksiyası gecikmədi - Baş nazir Georgi Qaxariya Ukrayna prezidenti Gürcüstanın keçmiş prezidenti Mixail Saakaşvilini baş nazirin müavini təyin edəcəyi halda Gürcüstanın, ən azı, məsləhətləşmələr üçün Ukraynadakı səfirini geri çağıracağını söylədi. Gürcüstan tərəfinin fikrincə, Saakaşvili ağır cinayətlərdə ittiham olunur və onun Ukraynada yüksək mövqe tutması qəbuledilməzdir. Bu vəziyyətdə Tiflisin açıqlamalarının tonu şübhə doğurmur - əgər Saakaşvili Kiyevdə yüksək vəzifə tutarsa, o zaman məsələ diplomatik münasibətlərin pozulmasına da gedə bilər.  

Gürcüstan-Ukrayna qalmaqalı, yeri gəlmişkən,  bizdə - Ermənistanda da yaxından izlənildi və təhlil edildi. Bu, ümumiyyətlə, Gürcüstanın coğrafi qonşumuz olduğuna görə deyil, İrəvanda, yumşaq desək, gürcülərin ağır cinayətlərdə ittiham olunan bir insanının Ukraynada hakimiyyətə gəlməsinə mane olmaq qərarına həsəd aparmağına görədir. Axı, səlahiyyətlilərimiz, gürcülərdən fərqli olaraq, Ukraynadakı kimi, Ermənistanda əzmək istədikləri ilanları sinəsində qızdıran "strateji müttəfiqi" ilə(Rusiya ilə-S.L.) eyni tonda danışmağa cəsarət tapmadılar. Söhbət "məxməri inqilab" dan sonra Ermənistan hüquq-mühafizə orqanları tərəfindən tələb olunan keçmiş Ermənistan məmurlarının İrəvana təhvil verilməsindən imtina edən Rusiyadan gedir.  Üstəlik, Moskva bunu siyasi və hüquqi nöqteyi-nəzərdən motivasiya edir. Deyir, bəli, onlar cinayətkar və it  uşaqlarıdır, amma bunlar mənim təhqir etməyəcəyim övladlarımdır. “Söhbət 1 Mart” işi üzrə istintaq qrupunun keçmiş rəhbəri Vahan Arutyunyan, sabiq baş prokuror Gevorq Kostanyan, keçmiş müdafiə naziri Mikael Arutyunyan, Məhkəmə İşləri İcbari İcra Xidmətinin sabiq rəhbəri və keçmiş deputat  Miqran Poqosyan haqqında Ermənistan prokurorluğu tərəfindən axtarılan şəxslərdən gedir. Hər üçü 1 mart 2008-ci il qanlı hadisələrində müttəhim kimi keçir. V. Arutyunyan hətta Rusiya vətəndaşlığını da ala bilib, G. Kostanyan isə Rusiya güc strukturları tərəfindən idarə olunan bir dövlət akademiyasında dərs deyir. Ermənistanın müvafiq qurumlarının çoxsaylı müraciətlərinə baxmayaraq Rusiya yuxarıda qeyd olunan keçmiş məmurları təhvil verməkdən qəti şəkildə imtina edir. Anlaşılan məsələdir - hamısı Rusiyanın Ermənistandakı “beşinci kolon” un nümayəndələri, onun çirkin anti-Ermənistan siyasətinin aparıcı nümayəndələri olublar...”

Sultan Laçın