Bu gün Qarabağ mövzusu ilə zəngin olub. RF Xİ naziri Sergey Lavrovun Dağlıq Qarabağ probleminin həlli istiqamətində Madrid prinsiplərinin və Kazan prinsiplərinin müzakirə predmeti olduğunu, münaqişənin mərhələli həllinin müzakirə edildiyini və bir sıra rayonların Azərbaycana qaytarılacağını bəyan etməsi yenilik olmasa da, ciddi siyasi hadisə hesab olunmalıdır. Ardınca Ermənistan XİN rəhbəri Mnatsakanyanın sərt şəkildə Lavrova cavab verməsi və heç zaman Artsaxın (ifadə Mnatsakanyana mıxsusdur) Azərbaycanın tərkibində olmayacağını bildirməsi və qeyd olunan rayonların da Artsax xalqının təhlükəsizlik zolağı olduğunu vurğulaması vəziyyəti kifayət dərəcədə gərginləşdirib. 

Ermənistan faktiki olaraq Rusiyanın mövqeyindən rəsmən imtina edib və pandemiyanı bəhanə gətirərək indi bu müzakirələrin zamanı olmadığını bildirib. Təxminən günorta saatlarında yayılan bu xəbərdən sonra bir neçə saat əvvəl Azərbaycan və Ermənistan XİN rəhbərləri ATƏT-in Minsk Qrupu həmsədrlərinin iştirakı ilə birgə videokonfransı keçirilib. Bu barədə Azərbaycan XİN mətbuat xidməti məlumat yayıb. Təəssüf ki, mətbuat xidmətinin məlumatında konfrans iştirakçılarının birgə bəyanat imzalaması barədə xəbər verilməyib. 

 

Qeyd etmək lazımdır ki, Mnatsakanyanın bu gün Lavrova verdiyi sərt cavab və Qarabağın heç vaxt Azərbaycanın tərkibində olmayacağı barədə verdiyi bəyanatdan sonra Azərbaycan XİN rəhbəri bu videokonfransdan tamamilə imtina etməli olduğunu bildirməliydi. Birmənalı olaraq Qarabağın heç vaxt Azərbaycanın tərkibində olmayacağını bildirən şəxslə danışığa gedilməsi hansı məntiqə sığır? Rusiya Fedrasiyasının XİN rəhbərini münaqişənin mərhələli həlli barədə dediklərini tənqid edən və qəbuledilməzliyini vurğulayan bir nazirlə danışığın predmeti nə idi? Azərbaycan XİN mətbuat xidmətinin bəyanatı xalqı aldatmaqdır. Azərbaycan Xİ naziri ilə Ermənistan Xİ nazirinin sonuncu dəfə  birgə bəyanata nə  vaxt imza atması az qala yaddan çıxıb, indi hansı zərurətdən bu loyallıq nümayiş etdirildi? Özü də cəmi bir neçə saat əvvəl Qarabağı qaytarmamaq haqqında rəsmi bəyanat verildikdən sonra. 

 

Bu mövzuya tezliklə yenidən qayıdılacaq. Yaranmış əlverişli vəziyyətdən, (ən azı Lavrovun bəyanatından sonra) qətiyyətli, sərt, nəticə verən real addımlar atılması  əvəzinə ənənəvi yumşaq, hətta mənasız gedişlərin Azərbaycana heç bir xeyri yoxdur. 

Birgə bəyanata diqqət edin. Burada Azərbaycanın ərazi bütövlüyündən bir kəlmə varmı? Necə ki, dünya diplomatiya terminlərindən “Azərbaycanın işğal edilmiş torpaqları” əvəzinə bu gün “Ermənistan silahlı qüvvələrinin nəzarət etdiyi” termini işlətdirib uğursuz diplomatiya aparmısınız,  bu gün də “Qarabağ müstəqil olmalıdır” deyən nazirlə birgə bəyanat imzalayıb düşmən dəyirmanına su tökmüsünüz. 

Mövzuya qayıdacağıq.