Ukrayna azərbaycanlıları adından bu ölkənin Baş Prokurorluğuna və Təhlükəsizlik Xidmətinə müraciət olunması üçün qərar qəbul olunub.

Bu barədə "BakuPost"a Ukrayna Azərbaycanlılarının Birləşmiş Diasporu (UABD) təşkilatının hüquqşünası Pavel Boqomazov məlumat verib. O bildirib ki, hazırda buna hüquqi prosedurda hazırlıq gedir, sənədlər toplanır.

Onun sözlərinə görə, son vaxtlar intensiv şəkildə Ukraynada Azərbaycan diasporu, azərbaycanlılarla bağlı hər hansı müsbət yeniliyə qarşı, xüsusilə də ölkədə aparıcı təşkilat olan UABD barədə ifrat yalanlardan ibarət naməlum mənbəli yazılar, müxtəlif dövlət orqanlarına saxta müraciətlərlə qarşılaşırlar. Bu cür hallar artmaqda davam edir:

“Bununla bağlı təşkilat tərəfindən mənə tapşırıldı ki, sənədləri, faktları və informasiyaları toplayaraq, hüquq mühafizə orqanlarına rəsmi müraciət edim. Çünki belə hallar qanunvericiliyə əsasən cinayət məsuliyyəti yaradır. Məsələn, bu yaxınlarda UABD barədə müxtəlif diaspor nümayəndələrinin və bir neçə nüfuzlu şəxslərin adından müraciət Azərbaycanın bir neçə internet resurslarında dərc olundu. Biz dərhal araşdırdıq ki, müraciətdə adı çəkilən nüfuzlu şəxslərin bundan heç xəbəri yoxdur, “feyk” müraciətdir. Halbuki orada ağır ittihamlar vardır. Biz əvvəllər də mətbuat vasitəsilə yayılan belə dezinformativ müraciət və yazıları tutuşdurduq, nəticədə hamısında dəsti-xətt eynilik təşkil etdi. Bu yazılar Azərbaycan dilində olduğu üçün təşkilat rəhbərliyi bu dildə linqivistik ekspertizanın aparılması üçün müvafiq orqanlara müraciət edəcək. Bizdə olan ilkin informasiyaya görə bunların arxasında şübhəli şəxs kimi vaxtı ilə Ukraynada jurnalist fəaliyyəti ilə məşğul olmuş Aslanov Möhsüm Qədir oğlu dayanır. Amma təbii ki, dəqiq nəticə hüquq mühafizə orqanlarının araşdırmasından və eləcə də, ekspert rəyi əldə olunduqdan sonra əldə olunacaq. Belə cinayət tərkibli əməllərin davamı iki ölkə ictimaiyyəti arasında arzuolunmaz gərginlik yarada bilər, müvafiq dövlət qurumları bunun qarşısını almalıdırlar”.

Qeyd edək ki, açıqlamada adı çəkilən Möhsüm Aslanov 2019-cu ilin yanvarına qədər AzTV-nin Ukrayna müxbiri olub, qurumda kadr islahatalarına start verilən zaman yol verdiyi çoxsaylı və ciddi nöqsanlara görə o da işdən azad olunub.